پاکستانی صوبہ خیبرپختونخوا ٹی پاکستانی لشکر و تحریک طالبان پاکستان نا نیام ئٹ بھلو کچ اسیٹ جھڑپ آتا حوال رسینگانے۔
ٹی ٹی پی دعویٰ کرینے کہ او اِرا سیکورٹی لشکر نا چوکی تے کوزہ کرسا بھلو کچ اسیٹی سلہہ و گولہ بارود تینا کوزہ ٹی ہلکنے۔ و کوالخواہ تا پاننگ ءِ کہ علاقہ ٹی آپریشن برجاء ءِ۔
ترجمان تحریک طالبان پاکستان نا رد ئٹ چترال ئٹی کارروائی کرسا بمبوریت نا علاقہ ٹی اِرا فوجی پوسٹ کوزہ کرینن۔
ترجمان نا رد ئٹ جلہو ئٹی 4 پاکستانی لشکر مرگ ئنا گواچی و ایلوفک ٹپی مسنو، دا کاروائی ٹی بھلو کچ اسیٹ سلہہ ہم دوئی کرینن۔
ترجمان نا پاننگ ءِ کہ ایلو کنڈ آن اندا کاروائی ٹی بمبوریت نا ہند آ فوج ئنا کنڈ آ رادہ کروکا کمک آ اسنائپر و مُر خلوک سلہہ ئٹ جلہو کرسا 5 کارندہ ئے کسفنگانے۔
ایلو کنڈ آن لوئر چترال نا ڈپٹی کمشنر محمد علی برطانیہ نا حوالکاری ادارہ ئے پارینے کہ لوئر چترال نا علاقہ بمبوریت تون اوغانستان تون تفوک سیم آ عسکریت پسند آتا حوال رسینگ آن گڈ آپریشن بناء کننگانے۔
او پاریر کہ آپریشن نا بارث ئٹ شابیت آک آپریشن نا ایسر مننگ آن گڈ فوج ئنا حوالکاری ادارہ نا کنڈ آن شنگ کننگور۔
محمد علی نا رد ئٹ ’کیلاش، بمبوریت نا کنڈ آ ہنوکا کسر ہنوک بروکا تیکن بند کننگانے انتئے کہ آپریشن برجاء ءِ و اشتماعی وڑ ئٹ تیوہ ضلع ٹی ایلیٹ فورس نا گیشتر نفری تعینات کننگانے۔‘
او پارے کہ اشتماعی وڑ ئٹ تیوہ ضلع ٹی حالیت آک کنٹرول ءُ و ہڑدے ئی زند اسُل زیمی متنے۔