ننے دا پاننگے کہ ننے ہرا ہیت ئنا سزا تننگسہ ءِ – رخسانہ دوست

مسہ جولائی 2015 آ پاکستانی لشکر نا دو آن زوراکی ئٹ بیگواہ عظیم دوست بلوچ نا ہیڑ رخسانہ دوست پارینے کہ ننے دا پاننگے کہ ننے ہرا ہیت ئنا سزا تننگ مریسہ ءِ۔

او پارے کہ کنا ایلم ءِ 3 جولائی 2015 آ گوادر آن زوراکی ئٹ بیگواہ کننگاسس، ہرا دائسکان بیگواہ ءِ۔ ایلم نا زوراکی ئٹ بیگواہی آن گڈ نن اذیت نا گواچی مسونن و کنا لُمہ ایلم نا ودار و ڈکھ ئٹ ناجوڑ مسنے و ننا اُرا ٹی خوشی نا جاگہ غا دڑد، تکلیف و خڑینگ آک جاگہ کرینو۔

او پارے کہ داسہ کنا ایلم نا زوراکی ئٹ بیگواہی ءِ 9 سال پوروْ مسنے، دا نہہ سال ءِ نن امر گدارانن کس اس دانا تصور کننگ کپک، ننا دوستخواک زندہ ارفنگانو و نن اوفتے پدا جوڑ سلامت و زندہ خوائنہ۔

او پارے کہ نن تینا ایلم عظیم دوست بلوچ نا رکھوک یلہ مننگ کن پگہ جمعہ 8 ستمبر آ بلوچ وائس فار جسٹس تون اوار مریسہ چاگڑدی احوالکاری تلہ ٹوئٹر “X” آ اسہ کمپین اس کرون، ای غٹ آتیان خواست کیوہ کہ او کمپین ئٹ بشخ ہلیسہ کنا ایلم نا یلہ مننگ کن توار ارفر۔