کوئٹہ پریس کلب نا مونا زوراکی ئٹ بیگواہی تا برخلاف وائس فار بلوچ مسنگ پرسنز نا برجاء برانزی کیمپ ءِ اینو 5163 دے پوروْ مس۔
اینو بی ایس او نا مسکوہی چیئرمین مہیم خان بلوچ و ایلوفک بریسہ خاہوت آتیتون اواری نا درشانی کریر۔
دا وخت آ تنظیم نا وائس چیئرمین ماما قدیر بلوچ نا پاننگ ئس کہ اسہ ہفتہ اسیٹ 12 آن زیات زوراکی ئٹ بیگواہ بندغ آتے دروغ نا مونتس ئٹ کسفنگانے۔ دافتیٹ زیات بندغ آتا پنک ننا بیگواہ بندغ آتا لڑ ئٹ اریر۔
اونا پاننگ ئس کہ پاکستان تینا شابیت پسند و لٹ و پل مسخت آتا پورو کننگ کن بندغی حق آتا غٹ قانود آتے لتاڑنگ آن اسل چپ مفرو و بلوچ زوراکی ئٹ بیگواہ بندغ آتا بابت جہانی رائے عامہ ءِ نت تیٹ لتاڑیسہ تینا بلوچ نسل کش پالیسی تیا سلوک مرو۔
اونا پاننگ ئس کہ پاکستان نا وجود بلوچ نا بقاء و سلامتی کن مالو آن ہی اسہ بھیم اس مسنے ولے ہرا وڑ لس ڈول ئٹ اولیکو دے و خاص وڑ ئٹ تدوکا اسہ دہائی ئسے آن پاکستان جہانی امن کن بھیم اس جوڑ مسونے دا داسا نہ بیرہ بلوچ و دا خطہ بلکن تیوہ جہان کن اسہ بھلو سوبر ءُ ویل اس جوڑ مسونے۔
ماما قدیر بلوچ نا پاننگ ئس کہ پاکستان بندغی حق آتا برخلافی ئٹ غٹ آن مونا ءِ اسہ کنڈان پاکستانی لشکر مقبوضہ بلوچستان تون اوار سندھ ٹی ہم بندغی حق آتے لتاڑنگ ءِ گڑا ایلو پارہ غان تینا پڈ ئٹ مذہبی گنوکی تے سامبیسہ بھلن کرے و تیوہ جہان ٹی دہشت گردی نا نرسری جوڑ کریسہ مذہبی گنوکی تا پرورش کننگ ءِ۔