سفر زند و شاعری
نوشت: نزار قبانی | مَٹ: عتیق آسکوہ بلوچ
چاڑدہمیکو بشخ
سبزو کنتون پارے
انکشاریہ شاعری نا دا ایب کیب ئٹ ای ستمبر 1944 ئٹ تینا اولیکو شاعری نا کتاب قالت لی سمراء )سبزو کنتون پارے( شینک کریٹ۔ دا کتاب ءِ ای تینا جیب خڑچ آن شینک کریسٹ۔ اولیکو شینک کاری بیرہ مُسہ سد کاپی غا تالان ئس انتیکہ اسہ خوانندہ ئسے نا دروشم ئٹ کنا بجٹ داکان زیات نا موْکل تتوکہ۔ دوارہ ہمو ساعت ہم بس ہراتم دیہاڑ و مورخین آن کنا برخلاف سُرپُر نشان تسر۔ اوفک کتاب ءِ بناء آن نمن کریر۔ اونا سرحال، نوشت، داڑاسکان کہ اونا پنہ غاتا رنگ و سرپنہ نا عکس ءِ ہم نمن مسر۔ دا مخلوق اسہ ٹپی جنگلی ساہدار ئسے ڈول کنے آ دِرک تس۔ او دے تیٹ کنا سُو خازہ مسکہ و اوفتا خنجر آک تیز۔ گڑا دوارہ انت ئس، سنگساری ٹولی تینا کارروائی ءِ بناء کرے۔
گڑا مصری مجّلہ الرسالۃ نا مارچ 1946 ئنا شینک کاری ئٹ شیخ علی طنطاوی کنا و کنا کتاب نا بابت دتر ئٹ ڈُب تروک دا نوشت ءِ لکھا:
چنکو کتاب ئسے، دمشق ئٹ شینک مسونے۔ پوش نرم و زیبدار ءِ۔ دا کتاب ءِ اندنو ساف کاغذ اسیٹی پیڑانگانے ہراٹی چاکلیٹ نا ہمو ڈبہ تے پیڑانگک ہرافتے سانگ برام آتا وختا تننگک۔ زی آ خیسن رنگ ئنا فیتہ نا گرنگ خلوک ءِ ہرا ڈول نا گرنگ فرانسیسیک تینا شام ئنا کوزہ نا بنائی دے تیٹ )بدکار( زالبول تا کُفت آتیا چاہنداری کن خلنگ الّمی کریسر۔ داٹی شاعری نا بابت کلام شینک کننگانے۔ داٹی اشطار ءُ ہرافتا مرغنی اگہ سینٹی میٹر آتیٹ کچ کننگہ گڑا اسہ ڈول سلو۔
کتاب فاسق و فارح )ٹپ تروک( آنا نیامٹ ہیت و آزموندہ ئٹ بروک بے دادی تا بابت بیان آ تالان ءِ۔ داٹی ہچو خیال اس اف دا سوب کہ دانا نوشتوک ادیب اس اف، نہ اونا تخیل شابیت ءِ، بلکن اسہ گمراہ امیرزادہ و لمہ باوہ نا لاڈُک ءِ۔ مدرسہ نا اسہ خوانندہ ئسے۔ اونا کتاب ءِ مدرسہ غاتا مار و مسڑ خوانندہ غاک خوانان ءُ۔
کتاب ئٹ علم عروض نا بحر آتیٹ پوسکنی اوار شاغنگانے ہراٹی بحرِ بسیط و بحرِ ابیض نیامئی گوجالنگانو۔ نَحو نا اصول آتیٹ ہم پوسکنی نشان تننگانے دا خاطر کہ مخلوق داسہ فاعل نا بڑزی و مفعول نا جاغہ تننگ آن بیزار مسونو، کہ مخلوق آ مُسہ ہزار سال گدرینگا و اوفک ءُ کہ دائسکان ہمو ڈول آ سلوک ءُ۔ گڑا دا پوسکنی آن بیدس پین کسر اف۔
دا ہمو خنجر آتیان اسہ خنجر ئسے نا چُنکو نمونہ ئسے ہرا کنا کسفنگ کن کاریم اٹ ہتنگار، دا کنا دامون ایمون کُڑدہ ٹہیفوک قبیلہ نا توار تیان اسہ توار ئسے، مرگ ئنا چھاپ ءِ خلوک، طبل ءِ خلوک، کنا خامہ غا سُو ءِ کنیسہ چس ہلوک آ۔ اگہ ای دا بے دادی نا جشن آن اسہ ڈول اسیٹ دو خلاس کننگ کریٹہ واہم ہشنگ، ٹپ، و ہشنگ نا نشانک کنے تینا پاٹی سلیب تو لچفوک مسرہ۔ دا تیوہ غا گڑا ہمو ہزبہ ئی سیالی ءِ پینگن کرے ہرا تخلیق کاری ءِ مرک و نوشتہ کننگ ءِ شہادت نا خواست تون تفینے۔
ہراتم نن نوشتہ کینہ گڑا نن گڑاس پرغنہ، و پنوک گڑا نا فطرت ءِ او تینا پننگ آ کُوک پاڑو کیک۔
1994 اٹ ہراتم ‘قالت لی سمراء’ مونا بس گڑا دا دمشق شار نا بدن ئٹ تُرند ءُ دڑد اس ودی کرے، ہمو شار ہرا تینا بدن و تینا تغ تا مننگ آن نمن ئس۔ دانا ھرام مغز ئٹ اسہ سیلہ اس غُت تروک ئس و دا پنچ سد سال آن اسٹریچر آ بے سما تموک ئس، تغ ئٹی کنگوکہ، عشق کریکہ و بدن نا چس ہلکوکہ۔
قالت لی سمراء دیہاڑ و مورخین تا برخلاف اسہ کتاب اس ئس۔ دا داسہ اونا بخت اس یا بدبختی کہ او نہار نا دنتان تا نیامٹ ئٹ ودی مسوسس۔ دیہاڑ کنکن ہمووخت شرفدار ءِ ہراتم او تریشونک اس مریسہ بروک وخت ءِ رژنا کے، ولے ای اودے ہمو وخت ترندی تون نمن مروٹ ہراتم اونا حیثیت بیرہ اسہ یاتگار ئسے نا مرے، یا کتاب آتا پوش آ ساڑی گروشک نا ہراٹی پوسکنی نا ہچو گمان اس سلپک۔
قالت لی سمراء اسہ چنکو چنائی کوشست اس ئس کہ تدوک وخت آ مُستی ہنیسہ بروک وخت نا گمان تا پارہ غا سفر کننگے، و شاعری نا یخ تفی ءِ دیہاڑی رِد آن کشیسہ سُرنگ و اونا ایلو رِد اسکان ہتنگ مرے۔ اگہ عمرو بن کلثوم نا معلّقہ دیہاڑ نا اسہ تڈہ اس ئس، گڑا دا ہیت رد ءِ کہ ہراتم اسکان اللہ خوائے نن اوٹی کیز مریسہ سلینہ، اگہ رباب زیباو دیہاڑی میرات ئسے گڑا دا جائز اف کہ دا ‘ہی طرب’ نا ایسری دروشم مریسہ سلے، و اگہ مقاماتِ حریری مِس ئنا بج آ لسانی تال ءِ گڑا دُننگا تال داسہ کاٹم خڷ اس جوڑ مسونے، داسہ معاصر عرب بننگ دا نا خواستگار مننگ کپسہ۔ چِل ئنا دہ یک ئٹ قالت لی سمراء بدی نا پُھل آتیان اسہ پُھل اس ئس۔ اگہ پیرس بودلیر آن خن تے تر کننگ کیک، ہرا پیرس ءِ موْن آ پھل آتے ٹیکی تسوس و بندغ ئٹ تہار آ غار و فرائیڈین پُر پیچ آتے رژنا کریسس، گڑا انت دمشق چالیس نا دہ یک ئٹ دا ہیت اکن ہم تیار اَلو کہ تینا تسبیح نا دانہ غاتیان اسہ دانہ اس کس پین اسیکن ہلوسس؟ اندا سوب ئس کہ ٹپی و تڑنگ والا ردعمل مونا بس۔
کنا شاعری نا بابت شیخ علی طنطاوی نا ہیت آک پوسکنا نغدکاری نا معنی ئٹ ہچو نغد کاری اس افس بلکن دا اندنو بندغ ئسے نا کوک پاڑو ئسر ہرانا پُچ آتیٹ خاخر لگانے۔ اگہ عبا، قبا و دستار والاک کنا رند ئٹ تمار گڑا دا اوفتا فطری و حق ئنا گڑاس ئس، دا خاطر اوفک عربی شاعری نا درگاہ تا تنیائی تیٹ ئسر۔ اوفتے سما ئس کہ پوسکنا شاعری نا اسہ ہم توار اوفتا باخو ءِ بند کرو و اوفتے رزق ئنا پٹنگ نا پارہ غا خسو۔ اندا خاطر اوفک تا زِرہ غاتا پد آن باہوٹی مسر، یعنی لغت، نحو، صَرف، امر بالمعروف و نہی عن المنکر۔
تلہ نا ایلو پارہ غا دمشق نا پوسکنا زنک تینا وجود نا معنہ نا پٹ و پول کننگ ئس، او تینا فکر و تینا ہڑدے ئی زند نا نیامٹ ساڑی تضاد آتا ایسری تے پٹنگ ئسر۔ او آزاتی نا بابت خوانارہ ولے اودے تینا کننگ کتورہ، وجودیت، سرئیلزم، ڈاڈا اِزم و مکعبیت )کیوبزم( نا بابت بنگرہ گڑا اسہ اندنو پاوال ئسے نا ڈول گوڑینگارہ و فریشان مسرہ ہرا شار اٹ اولیکو وار بریک۔ ارٹمیکو جہانی جنگ ئنا افکار، اونا فلسفہ، فکری تپہ و نظریہ غاک پوسکنا زَنک ئنا مِلی تے چنڈی تروک ہلاسر، گڑا اوفک تینے سبک گمان کننگ ئسر، او ماراس اُس کہ او ایلو بچوک جہان تون گپ تران نا قدرت تخک۔
داڑان قالت لی سمراء ہزار آ ورنا مار و مسڑ تا مونا خرّن آ بتی ءِ رژنا کرے کہ او سڑک آن ایمو مریسہ اونا ایلو پارہ غا کار سر مریر ہراڑے آزاتی اوفتا کسر اُروک ءِ۔ قالت لی سمراء نا نظم آتیٹ ہرا بولی ءِ او اندافتا بولی ءِ، ہرا امیت آک ءُ، اوفتا امیت آک ءُ، و ہرا شئر آک ءُ او اوفتا احساس آتیتون تفوک ءُ۔ داٹی مابت، شہوت، بغاوت، بھیم ءِ و ہمو تیوہ غا ازباب آک ءُ ہرافتے کاریم اٹ ہتیسہ کیزیک تینا زندان تا قلف آتے پرغیرہ۔
مننگ کیک تینا شینک کاری نا سی سال آن گڈ قالت لی سمراء نا قدر و نہاد اینو آزاتی نا دے موْن آ تولوک آتے افسانوی و ڈرامائی لگے ولے ہمو مخلوق ہرا فن ءِ اونا چاگڑدی روتہ غاتے اسکان دیرہ، چارہ کہ دا کتاب تینا شینکاری نا وختا، لغت، بلاغت، تران، مٹو والا نقل کروک و اخلاق ءِ میرات کروک آتے پرغا و شیطان نا شاگڑد آنبار تینا بولی ءِ درویش آتا چاگڑد اسکان تالان کریسس۔
قالت لی سمراء آزاتی کن دا ہد اسکان کڑد ایسر تس ہرا ہد اسکان درسی نشست آ تولوک اسہ خوانندہ اس تینا کڑدار ءِ ایسر کننگ کیک۔ اگہ دا کتاب ئٹ ساڑی مابت و شہوت ءِ ناجوڑی و عصبیت نا پن تسر گڑا او دے تیٹ مابت غضب و نمن ءُ گڑاس ئس و اودے درغ تا شیف آن دزی کروئی تماکہ۔ سلیس بدن نا اواری نا معاملہ گڑا او حرام ئس، اونا بہا موْنا بازار تیٹ و پیشہ کروک اُرا تیٹ مسکہ۔ دن ننا عشق بھیم ئنا سیخا نا شیف آ مسکہ، بھیم ئنا سیخا نا شیف آ نن اوڑدئی کرینہ، بھیم ئنا سیخا نا شیف وصل ئتون اویڑدہ مسونہ و اندا بھیم نا سیخا ئٹ نوشتہ کرینہ۔
ہراتم بندغ آن مابت ریفنگ ڈول ئٹ پُلنگہ، زالبول ءِ سُو ئنا اسہ بشخ اسیٹ بدل کریسہ نن اودے ہور ہڈ آتیٹ شُورین کشکنگ آ مرین، گڑا شرفدار دروشم مابت آن اعراض کننگ آ مریک، اسہ ہم بندغ گپ تران آن مُری تیٹ مریک، و غزل مڑدار تڑنگ نا دامون ایمون وحشی ناچ اس جوڑ مریک۔ زیات عربی شاعری ئٹ زالبول مڑدہ حیثیت ئٹی ءِ۔ اونا زیبا غا اُزبہ غاک شاعر آتا پڑزونک آ اُست ءِ بش تروک رکابی تا دروشم تموک ءُ، اونا سرمئی خنک، پزور گِلک آک و ہشکُن آ مُخ پڑزونک نا زیب ءُ۔ )ہشکُن آ مُخ سوار آتا باریم آن پننگ ہم کیک۔(
ای دا منیوہ کہ تینا بنائی شاعری ئٹ نازرک آ صنف نا پارہ غا اندن چمشانکی خن ای میرات اٹ دوئی کریسٹ۔ زالبول نا پارہ غا چمشانکی خن نا روتہ غاک قبائلی، دیہاڑی، چاگڑدی و دینی ءُ۔ عرب تینا لڈ و ہنپ، جنگ و سرسہبی تا سوب آن دا لائخ مننگ کتوسر کہ او زالبول تون بِسٹ ہندی مننگ کیر و اوفتے زالبول نا روح ئٹ کوکڑو کننگ و پٹنگ نا ساہت رسینگہ۔ قبائلی سوچ، بدوی رواج و اوفتا ادارہ غاک موْکل تتورہ کہ برام، لٹ و پُل و چوکری تا دوئی کننگ نا لیک آن پیشن نرینہ و زالبول ئٹ خڑکی مننگ کے، داڑاسکان کہ دا معاملہ غاتیٹی ہرافتا ای ذکر کریٹ، بدن نا ملکیت نا گڑا، دنکہ مثیال چوکری تا معاملہ ئٹ ئس، اسہ ہم پین گڑا ئسے پلویڑ کریکہ، چاہے او ذہنی مرے، نفسیاتی یا پوسکنی۔
ذہنی پوسکنی نا دوئی کننگ شرفدار چاگڑد آتیٹ مننگ کیک۔ بندغ است جارات حالیت آتیٹ داڑاسکان سر مننگ کیک۔ ارٹمیکو جنس تون عرب آتا تعلقداریک اندن انگا بندغ ئسے نا مِلی آ تالان کیفیت آتیا تالان ئسر ہرا تَسنگ آ مرے و او بھاز اشتاف ئٹ مرے۔ دا کنا پوسکنی ءِ و اندا بنماس آ ای زالبول نا بدن نا چُنک جغرافیہ کریٹ و اونا پیشن کیب ئنا دامون ایمون تینا چرجوئی تون پیری تا “قالت لی سراء”، “فطولۃ نھد” و “انتِ لی” ئٹ درشانی کرینٹ۔ تینا بنائی شاعری ئٹ ای قبائلی میرات تون مخلص ئسوٹ۔ ای دا میرات آن ہمو وخت آجو مسوٹ ہراتم کنے 1952 ئٹ لندن نا ہائیڈ پارک نا اسہ مجلس اسیٹ تولنگ رسینگا و ای جنسِ ثانی تون گپ تران کریٹ۔ دا مجلس ءِ جنسی کاٹم خڷ و قبائلی جوزہ غاتیتون مُر ئنا سیالی اس ہم الو۔
قالت لی سمراء نا سئے سد چھاپ نسخہ غاک اسہ توہ ئٹ تالان مسر۔ دانا نظم آک چنکا چنکا تریشونک آتیانبار اسہ دو آن ایلو دو و اسہ کوٹی آن ایلو کوٹی اسکان سر مسر۔ دا کتاب ئٹ ساڑی نظم “نھد اکوہ” اولیکو تریشک و کلیت ئس ہراڑان کنا پنی مننگ نا بناء مس۔ دجلہ نا کرک آ عراقی خوانندہ دانا نشہ ئٹ ڈب ہلوک مسرہ، لبنانیک تینا چنک سفر نا وختا عرَق نا میز تیا دانا گلم ہلکرہ، مدرسہ غاتیٹ خوانندہ غاک دادے حساب و جغرافتیہ نا کتاب آتیٹ تخارہ، و اونا کیہی شئر تے بلیک بورڈ آ نوشتہ کریرہ۔ کنا شاعری نا تیوہ غا دیہاڑ ئٹ اندا خوانندہ غاک کنا لشکر ئسر، کنا کُڑدہ و کنا بیرک ارفوک آک۔ اندافتا ذریعت ئٹ ای تینا مُخ و تینا ہُلی تا ذہن تے چکاٹ، و اندافتا سوب کنا سرسہبی مس۔ دا کنا توار ئسر، کنا دلوت نا شابیتی ئسر، تیوہ غا جہان ئٹ کنا سفر نا پروانہ ئسر۔
ہرا وخت اسکان دا کتابِ امنائی ساڑی ءِ، ای بیدس دانگ اینگ آن دا ہیت ءِ ریکارڈ نا بشخ اس کننگ خواوہ، و ہمو پارہ غا تیوہ غا دلیل آک اشارہ کننگ ءُ کہ اندا خوانندہ غاک بروک جہان نا حکمران آک ءُ۔ اوفک کنے جہان ئٹ تالان کرینو و اندافک کنا خشت و تمبہ غاک ءُ۔ اندا سوب ای پاننگ کیوہ کہ طنطاوی کنے کسفتو، انتیکہ چِل ئنا دہ یک نا زنک دا ہیت آن نمن مس کہ ای انکشارئین تا نت تیا بریو تمیو، انتیکہ کنا تمنگ نا مطلب دا ورنا تا تغ تا ایسر مننگ و اوفتا آزاتی نا گلدستہ نا پھل آتیان اسیکہ پھل آتا خوْن مروئی ئس۔ قالت لی سمراء طوفان نا مونا سلیس، صاحب اولیاد مس، اونا زنک مُستی ہنا، داڑاسکان کہ 1944 ئٹ شینک مروک اونا مسہ سد نسخہ 1972 ئٹ اندنو جنگل اس جوڑ مسر ہرانا پَن آتا ہچو ایسری اس اَلو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔