مستونگ نا ڈھکی آ تدینی
ٹی بی پی سرگپ
بیست و نُہہ ستمبر آ مستونگ ئٹی اسہ اُست ہسون ءُ تدینی ئس مس، عید میلاد النبی نا مُچی آ الفلاح مسجد نا خڑک آ اسہ خودکش جلہو ئس کننگا ہراٹی پنجاہ آن گیش بندغ کسکر و چِل آن زیات ٹپی مسر، کہوکا بندغ آتا کچ ئٹ ودکی مننگ نا خلیس ارے انتئے کہ جلہو ئٹ ٹپی مروکا تا حالیت باز بھیم بش کروک ءِ۔
بلوچ انٹلجنسیا نا دعویٰ ءِ کہ بلوچ تحریک آزادی ئے ایسر کننگ کن پاکستانی لشکر بلوچستان ئٹی مذہبی انتہا پسندی نا تخم ئے کھڈ کرینے و اوفتے سوگوْ کننگ و تالان کننگ نا کوشست کننگ ءِ۔ بلوچ دانشور و دہشتگری نا مون توروک آ چمشانک تروک آک اسہ وڑ دا خلیس نا درشانی کننگ ءُ کہ مذہبی انتہا پسند آتا ودشت آن بلوچ انسرجنسی نا کسر توننگ مفک ولے دا پالییسی تیان مُچا علاقہ زیمی مرو۔
پاکستان گمانی وڑ ئٹ مذہبی انتہاپسندی نا ہرا تخم ئے بلوچستان و پشتون سر زمین آ دَسنگ ءِ اونا زہم آک پاکستان آ ہم تمور۔ ریاست پاکستان نا محکوم قوم آتا بر خلاف مذہب ئے اسہ سلہہ ئسے نا وڑ کاریم ئٹ تنگ نا پالیسی دنو حالیت ودی کرینے ہراڑان بلوچستان ئٹی بے دادی آ مذہبی انتہا پسندی ولِنگ ئٹی ءِ۔
مستونگ بھلو وخت ئسے آن مذہبی انتہا پسند آتا تڈہ جوڑ مننگ ءِ۔ دا تدینی آن مُست اِرا ہزار ہژدہ ٹی اسہ خودکش جلہو ئسے ٹی اِرا سد بندغ کسکر۔ ہزارہ کمیونٹی آ چرجوئی ئٹ دا علاقہ آتیٹ جلہو مسنے۔ ریاست دا جلہو تے ایلو ڈیہہ تا کاٹم آ شاغسہ دننگا بھیم تروک تدینی تا زہم آتے ایسر کننگ نا کوشست کیک و منَہ وخت آن پد دروغ ئنا مونتس تیٹ زوراکی نا بیگواہی تا گواچی مروک بندغ آتے کھسفسہ جلہو تا دوبہ ئے اوفتیا شاغک۔
بلوچ انسرجنسی ئے ایسر کننگ کن ریاستی پالیسیک بلوچستان ئٹی سیاسی ادارہ آتے نزور کرینو، ہراڑان مذہبی انتہا پسندی ئے توننگ کن اسہ سوگوْ ءُ سیاسی طاغت ئس ہم اف، دا حالیت ئٹی قوم پرست و آزادی پسند ادارہ آتا ذمہ واریک ودیرہ کہ او سیاسی محاذ ئے گچینی ئٹ اڈ ترسا پالیسی جوڑ کیر ہراڑان بلوچ چاگڑد ئٹی انتہا پسندی ئے توننگ کن سیاسی تحریک منظم کننگ مرے۔