بلوچستان نا علاقہ خاران ئٹ ڈگری کالج نا خوانندہ تا پارہ غان و پنجگور ئٹ بلوچ اسٹوڈنٹس ایکشن کمیٹی نا پارہ غان پنجگور ڈگری کالج ئٹی شاعر گلزمین مبارک قاضی نا یات ئٹ مجلس ہڈ تننگا۔
بلوچستان نا علاقہ خاران ئٹ ڈگری کالج نا خوانندہ تا پارہ غان اسہ دے ئی کتاب مُچی اس و خواجہ مبارک قاضی نا یات ئٹ مجلس و مشاعرہ اس ہڈ تننگا۔ مجلس و مشاعرہ نا مہمان خاص خاران نا ایڈیشنل ڈپٹی کمشنر فاروق شاہ ئس۔
مشاعرہ ئٹ شاعر و نوشتکار، چاہندار، اسکالر و کالج تون اوار اسکول آتا چناک و ایلو جتا تپہ نا بندغ آک بھلو کچ اسیٹ اوار مسر۔
مجلس و مشاعرہ ئٹ کتاب نا اہمیت و برجاء وخت ئٹ اونا گرج و بلوچی بولی نا پِنی آ شاعر خواجہ مبارک قاضی نا زند و اونا شاعری آ شابیتی ہیت کننگا۔
مشاعرہ ئٹ بلوچی بولی نا پنی آ شاعر حسرت خارانی، احمد مہر، شکور زاہد، مسلم شفیع، پروفیسر شکور گورام زئی، جلال فِراق، ایف جی فیضی، فقیر شاہ، ممتاز ارمان، زبیر شاد، عطا نصیر، حافظ رازق و ایلوفک مبارک قاضی نا یات ئٹ شئیر پاریر۔
ایلو پارہ غا بلوچ اسٹوڈنٹس ایکشن کمیٹی پنجگور ڈگری کالج یونٹ نا پارہ غان مبارک قاضی نا یات ئٹ مجلس اس ہڈ تننگا ہرا ٹی مبارک قاضی نا زند و اونا شاعری تون اوار ایلو سرحال آتیا ہیت کننگا۔ مجلس چار بشخ آتیا تالان ئس ہرا ٹی تران، مشاعرہ، شئیر و باگل و کتاب مُچی اوار ئسر۔
مجلس مبارک قاضی نا یات ئٹ اِرا ساہت نا چُپی تون بنا مس ہراڑان گڈ مبارک قاضی نا زند، شاعری، غزل و جتا پالو تیا مصدق بلوچ، پیر جان بلوچ، خواجہ گمشاد بلوچ و ملا مراد شابیتی ئٹ ہیت کریر۔
مجلس نا ارٹمیکو بشخ مشاعرہ غا تالان ئس ہرا ٹی خوانندہ غاک مبارک قاضی نا شئیر تے خوانار و مبارک قاضی نا بلوچ ڈغار و راج دوستی نا فکر و فلسفہ ءِ روشن کریر۔
مجلس ئٹ ”بلوچستان کتاب کاروان“ نا پن ئٹ کتاب مُچی اس ہم ہڈ تننگا ہراڑے اسٹال آ بلوچستان، دیہاڑ، سیاست، ادب و سائنس نا جتا سرحال آتیا کتاب آک تخنگاسر، کتاب مُچی ئٹ گل ئنا لٹریچر نوشت، گام و بلوچ لٹریسی کیمپئن نا کتابچہ غاک ہم تخنگاسر۔
کتاب مُچی ئٹ استاد و خوانندہ تا بھلو کچ اس اوار مریسہ کتاب ہلکر۔
مجلس نا ایسری بشخ شئیر و باگل آ تالان ئس ہرا ٹی نادر بلوچ، مسرور بلوچ و کلیم اللہ بلوچ مبارک قاضی نا شئیر تے تینا گچین آ توار تیٹ پاریر و تینا فن ئنا درشانی کریسہ مجلس ءِ ایسر کریر۔