سفر زند و شاعری
نوشت: نزار قبانی | مَٹ: عتیق آسکوہ بلوچ
شانزدہمیکو بشخ
مسٹمیکو بولی
ہراتم ای نوشت ءِ بناء کریٹ گڑا اولیکو گِڑا ہرا کنا مِلی آ تالان مسوسس او بولی ئس ہراٹی ای نوشتہ کریٹہ۔ بیدس شک او اسہ بولی اس ئس، بلکن اندنو بولی اس ہرا بھلا گمان و پھبی لائخی تخوک ئس ولے لسانی چاہندار آک اوڑا بھیم بش کروک ءُ خواجہی تخاسر؛ اوفک دا بولی آ آزاتی نا درغ آتے بند کریسر و اودے پیشن مننگ و خلق کوچہ غاتا بولی تون اوڑدئی آن توریسر۔ دا بولی ذاتی ماڑی اس مروک سلیسوسس۔ ایلو پارہ غا لسانی چاہندار تا انجمن ئس ہرا داڑان جُوان سواد ارفوک ئس۔ اسہ لوز ئسے قانودی ہند تننگ یا اسہ سائنسی یا تکنیکی اصطلاح ئسے نا تعرب )عربی کننگ( کن فتویٰ الّمی ئس، ہراڑکن لسانی جامعات مُسہ مُسہ سال اسکان استار تا ڈول و استخارہ غاتے اریسہ کریرہ و چاہ و بابونج نا ہزار آ پیالہ غاتے نوش کریرہ۔
اسہ پارہ غا دا تکبری آ بولی ئس ہرا اسہ بندغ ءِ ہم موْکل تتوکہ کہ او اونا بڈ ءِ ارفنگ کے، گڑا ایلو پارہ غا اُلسی بولی ئس، بِسٹ زند آن پُر، بیدار، و مخلوق نا پام و ہڑدے ئی معاملہ غاتے تینا پلویڑ ئٹ ہلوک۔ دا اِرا بولی نا نیامٹ تیوہ غا پول آک پورو پنوک ئسر۔ داسہ نہ تو دا بولی ایلو ارٹمیکو بولی کن تینا بھلا ہند آن شیف بسکہ و نہ ہمو ارٹمیکو بولی ئٹ داخہ در جیرت مسکہ کہ او اولیکو بولی اسکان ہنوک کسر آ کائے، اونا بنائی درغ اسکان سر مرے، و اوڑتون مجلسی مننگ کے۔ گڑا ننے اِرا بولی نا نیامٹ گوڑیفوک ناوَلدی نا گمان مننگ آ مس۔ اسہ بولی ہمو ئس ہراٹی نن اُرا، کوچہ و قہوہ خانہ ئٹ ہیت کرینہ، و ارٹمیکو ہمو بولی ہراٹی نن اسکول آن رسینگوک کاریم تے کرینہ، تینا استاد آتا تران آتے بنگنہ و تینا امتحان تے تسونہ۔ گڑا عرب مخلوق اسہ بولی ئٹ خواناکہ، نوشت کریکہ، تصنیف و تالیف کریکہ و تران کریکہ، و ارٹمیکو بولی ئٹ شئر پاریکہ، گل و بالی کریکہ، شرہ جنگ کریکہ، چنا تیتون شغل شغال کریکہ، و تینا مابت تون عشق کریکہ۔
لسانی اِرا رنگی نا دا ویل آتیتون ایلو بولیک متور۔ دا اِرا رنگی آن ننا افکار، مارنگ و زند اِرا بشخ ئٹ ونڈ مریسہ سلیس۔ اندا خاطر الّمی مس کہ ناوَلدی نا دا حالیت ءِ، ہرادے نن سگیسہ بننگ ئسون، ایسر کننگ کن گڑاس کننگ مرے۔ دا ایسری مسٹمیکو بولی اس تینا کننگ ئٹ ئس، ہرا لسانی اکادمی تیان اونا منطق، حکمت و سوگوْی ءِ ہلے، و خلقت نا بولی آن اونا باسنی، دلیری، و جیرتی آ سر سہبی تے۔
اینو نن ہمو مسٹمیکو بولی اٹ نوشتہ کینہ، و اندا مسٹمیکو بولی آ پوسکنا عربی شاعری، دیہاڑ آن کشکوک و زندانِ دیہاڑ نا قیذی مفننگ تون، تینا درشان کن باوری تخیک۔ دا مسٹمیکو بولی نا کوشست ءِ کہ او قاموس ءِ زند و بندغ نا خذمت ئٹ خلے؛ او تینا پھبی کوشست ءِ کننگے کہ مدارس ئٹ تننگوک عربی درس اسہ بے دادی ہند ئسے نا جاگہ غا سیل سوات نا دروشم دوئی کے، دانا کوشست ءِ کہ ننا ہیت گپ و نوشت نا نیامٹ بے ڈس مروک باور اسیکہ وا ودی مرے، و او دا تضاد ءِ ایسر کے ہرا ننا توار و ننا گٹ ئنا نیامٹ ءِ۔ کنا شئری بولی نا تعلقداری اندا مسٹمیکو بولی تون ءِ ہرانا بابت ای داسہ پاریٹ۔ بلکن تیوہ غاتیان زیات بھیم بش کروک شاہدی ہرا کنا بولی نا بابت تننگانے او دُن ءِ:
اگہ بس ئٹ نِزار قبّانی نا نوشت کروک اسہ کاغد اس تمے، ہراڑا اونا دستخط ہم مرے، گڑا اونا اولیکو سوار اودے ارفیسہ اونا اُراغا سر کرو۔
دا زیات نہاد شاہدی ئسے انتیکہ دا اسہ اندنو بندغ ئسے نا پارہ غا بس ہرا جامعہ دمشق ئٹ لسانیات نا پروفیسر ءِ، تینا کلاسیکی انتہاپسندی، متکنا بد دننگ، و پوسکنی و پوسکنی دوست آتے بِسٹ نمن کننگ نا رِدئٹ پنی ءِ۔ دا دا سوب آن ہم بڑز نہاد شاہدی ئسے کہ دا بندغ نِزار نا شاعری ءِ دوست کپک، نِزار نا شاعری اودے اسُل وڑپک، و او نِزار نا بابت تینا خیال آتیٹ تکبری کیک۔ ای دا بڑز نہاد امنائی ءِ تیوہ غاتیان بھلا شاہدی پاوہ۔
اخر دا مسٹمیکو بولی ارے انتس ہرا کنا بڑزی، چوٹ بامس و خن تا رنگ نا ڈول کنا گچین نشانی تیان اسٹ مسونے، و داسہ ای داڑان و دا کنے آن چاہنداری تخک؟ اخر دا بولی ارے انتس ہرا کنا و تینا نیامٹ بھاز ہم رنگی تا سوب کنا اندنو پروانہ سفر اس جوڑ مسونے کہ ہراتم وختس ای دادے رش آ کسر آ بے ڈس کیوہ گڑا مخلوق اودے کنے آ واپس سر کیک؟
غرور کنے ہچبر دا ہد اسکا دننگ کپک کہ ای تینا پوسکنا بولی نا ایجاد کننگ نا دعویٰ کیو، دوارہ دُن ہم بولی جادوگر نا ٹوپ آن پیشن مروک اسہ مُرو اس اف ولے ای تینے دا ہیت ءِ پاننگ نا موْکل ایتوٹ کہ ای ساڑی بولی ءِ مخلوق نا جوڑ تیا تالان کرینٹ، حالانکہ اوفک دا بولی تون اوڑدئی آن خُلیسرہ۔
داکان مالو، شاعری نا بولی اشرافی، بیوروکریٹک، پروٹوکول والا مسکہ، دو تیا پیہن آ دستانہ بیننگ آن بیدس مخلوق تون دُو ہلتوکہ و گنبدی ماڑی تیٹ پینگن رنگ نا نکٹائی بینوک بیدس اوفتے بخیر کتوکہ۔
ای بیرہ دا کریٹ کہ شاعری ءِ دا ہیت آ امنا کریٹ کہ او تینا اشرافی سوچ آن پیشن مرے، تِیرمہ نا پُچ بینے، گلی تیٹ پیشن مرے کہ خلق ئنا چنا تیتون گوزی کے دِرکے، اوفتیتون مخے، اوفتیتون ہوغے۔ اسہ لوز اٹ پاننگے گڑا ای و لسان العرب و پلویڑ تا پلویڑ والا بولی نا نیامٹ ساڑی کُلف آتے مُر کرینٹ و اودے دا ہیت آ امنا کرینٹ کہ قہوہ خانہ و اُلسی سواتی ہند آتیا اُلس تون تولے، چنا، خوانندہ، خواری کش، و بزغر آتیتون سنگتی کے، اخبار خوانے، کہ گپ کننگ ہچ بے خیال کپ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔