دی بلوچستان پوسٹ نا ڈیٹا ویژول اسٹوڈیو نا کچ و حساب نا ردئٹ 2023 مسٹمیکو مُسہ توہ ئٹ تیوہ بلوچستان ئٹی کسر شکست آتا سوب 826 خاہوت زیمی مسر اندن نوشت مروک شکست آتا کچ 250 ءِ۔
بلوچستان ئٹ کسر شکست آک چرجوئی تون مونا بننگ ءُ، ہڑدے جتا حالیت نا کسر شکست آتیٹ کیہی بندغ آک ٹپی مننگ ءُ ہموڑے اسہ بھلو کچ اسیٹی بندغ آتا ساہ ہم زوال مننگ ءِ۔
مسٹمیکو مُسہ توئی رپورٹ نا ردئٹ تدوکا مُسہ تُوہ تیٹ کسر شکست آتیٹ گیشتر ودکی مسنے۔
کچ و حساب نا ردئٹ پن کروک تدینی تیٹ 224 آن زیات بندغ کسکنو اندن 602 آن زیات ٹپی مسنو۔
تیوہ غاتیان زیات زیمی مروک علاقہ تیٹ خضدار ئٹ 36 تدینی، کوئٹہ ئٹ 31 تدینی، مستونگ ئٹ 29، بولان ئٹ 22 و حب ئٹ 16 تدینی رپورٹ مسر اندن گوادر ئٹ 15، ژوب ئٹ 10، لورالائی ئٹ 9 و واشک ئٹ 6 روڈ شکست رپورٹ مسر۔
بلوچستان ئٹ مروک کسر شکست آتا سوب آتیٹ گاڑی تا مُتکنی، بھاز پُر مننگ، اوننگ ئٹ نزوری، ڈرائیور آتا جُوان تربیت و ڈرائیونگ لائسنس آتا مفننگ، ترند رفتار و بے پامی، مرغن آ سفر نا سوب تُغ نا کمبوتی و نشہ ءِ کاریم ئٹ ہتنگ اوار ءُ۔
دا سوب آتیٹ گندہ حالیت نا کسرک، تنک و اسہ لائن کسرک، روڈ سیفٹی و نیویگیشن اشارہ نا مفننگ اوار ءُ اندن بلوچستان ئٹ اسہ ٹریفک انجنیئر اس ہم ساڑی اف۔
ٹی بی پی ڈیٹا ویژول اسٹوڈیو کسر شکست آتے انفوگرافکس نا دروشم ئٹ درشان کرینے:
