شفیق جتک ءِ یلہ کننگ مرے – خاہوت نا خواست

زہری مشک سراپ نا ہندی ورنا شفیق جتک نا خاہوت چیف جسٹس آف سپریم کورٹ، بنجاہی و صوبائی حکومت و بندغی حق آتا گل آتیان خواست کرینے کہ محمد حیات جتک نا مار شفیق جتک نا یلہ مننگ کن ننا کمک ءِ کبو تانکہ اودے رکھوک زندہ سلامت یلہ کننگے۔

اوفک پاریر کہ شفیق جتک ءِ 31 اگست 2022 آ خضدار گدان ہوٹل آن، ہراڑے او مزوری کریکہ، سی ٹی ڈی و ڈھکوک ادارہ غاک دزگیر کریسہ تینتون اوار دریر، اوکان گڈ ننے اونا بابت ہچو معلومداری اس تننگتنے کہ او اراڑے کے، انت حالیت ئٹی ءِ و اودے ہرا ڈوہ ئٹ دزگیر کریسہ بیگواہ کننگانے۔

اوفک پاریر کہ شفیق بے ڈوہ ءِ او دنو ہچو ڈوہ اس کتنے کہ اودے تدوکا اسہ سال آن بیگواہ کننگانے، اگہ او اسہ ڈوہ اس کرینے گڑا ننے پاننگ مرے کہ او انت کرینے۔

اوفک ودیک پاریر کہ شفیق خواری و مزوری کریسہ تینا خاہوت نا پِڈ ءِ پُر کریکہ اونا زوراکی نا بیگواہی آن پد خاہوت ڈکھ و تکلیف تون اوار معاشی بد حالی و بزگی نا گواچی مسنے۔ بندغی ہمدردی نا بنداو آ اودے یلہ کریسہ ننے دا اشتماعی سزا آن آجو کبو۔