اسرائیل نا طیارہ تا بمباری ٹی فلسطین نا علاقہ غزہ نا پنی آ نوشتکار، شاعرہ و ناول نگار حبا ابو ندا مرگ ئنا گواچی مس۔
غزہ ئٹ اسرائیل نا جلہوک برجاء ءُ و تدوکا 24 گھنٹہ ئٹ اسرائیلی طیارہ تا بمباری ٹی 266 فلسطینی خلنگانو ہراڑان پد کہوک فلسطینی تا کچ 4 ہزار 651 مس۔
غزہ ئٹ تدوکا 24 گھنٹہ ٹی مرگ ئنا گواچی مروک فلسطینی تیٹ 117 چنا اوار ءُ اندن غزہ ئٹ اسرائیلی جلہو تیان 14 ہزار 245 آن زیات فلسطینی ٹپی ءُ۔
20 اکتوبر آ اسرائیلی بمباری ٹی غزہ نا پنی آ نوشتکار، شاعرہ و ناول نگار حبا ابو ندا ہم مرگ ئنا گواچی مس۔ 32 سالی حبا ابو ندا ’آکسیجن از ناٹ فار دا ڈیڈ‘ پنی آ ناول ءِ نوشتہ کریسس۔
او کہنگ آن اسہ دے اس مالو تینا سوشل میڈیا اکاؤنٹ آ نوشتہ کریسس کہ ’اگہ نن کسکن گڑا سرپد مریرے کہ نن راست اُن و نن سوگوْی ئٹ سلوک اُن۔‘