بلوچستان نیشنل پارٹی نا لانگ مارچ
ٹی بی پی سرگپ
خضدار نا تحصیل وڈھ ئٹ کیہی توہ تیان سردار مینگل، بلوچستان نیشنل پارٹی نا سروک اختر مینگل و شفیق مینگل نا ٹولیک اسٹ ایلو نا برخلاف سنگر ہلکنو، بی این پی چرجوئی ئٹ دعویٰ کننگ ءِ کہ شفیق مینگل ڈیتھ اسکواڈ تا سروکی کننگ ءِ و اوفتے ریاستی سروکی دوئی ءِ ہرا نا برخلاف بلوچستان نیشنل پارٹی لانگ مارچ نا پڑو کرینے۔
بیست و دو اکتوبر آ بلوچستان نیشنل پارٹی سردار اختر مینگل نا سروکی ٹی وڈھ آن لانگ مارچ بناء کرو ہرا خضدار، سوراب، قلات و مستونگ آن تدیسہ کوئٹہ ءِ سر مرو و ہاکی چوک ئٹ بی این پی جلسہ ہڈ تریسہ تینا بروک آ گامگیج نا پڑو کرو۔ یاتی مرے دسمبر اِرا ہزار شش ئٹ ہم سردار اختر مینگل گوادر آن کوئٹہ اسکان ”لشکر بلوچستان“ پنی آ لانگ مارچ نا پڑو کریسس۔ او مارچ آن مالو اودے دزگیر کریسہ اسہ سال ئسے آن زیات جیل کننگا و اودے بلوچستان نا سیاسی منظر نامہ آن پیشن دھکہ تننگا۔
بلوچستان نیشنل پارٹی نا لانگ مارچ نا پڑو آن پد حکومت بلوچستان کوئٹہ ئٹ دفعہ 144 نافذ کرینے، ہراڑا سردار اختر مینگل نا پاننگ ءِ کہ ریاست ایمنی مارچ ءِ لتاڑنگ خوائک، نگران حکومت نا وزیر داخلہ سرفراز بگٹی تینٹ ڈیرہ بگٹی ٹی گمانی شفیق مینگل نا ڈول ڈیتھ اسکواڈ چلفنگ ءِ، سرفراز بگٹی ریاستی ادارہ تا سروکی ٹی ”امن لشکر“ نا پِن ئٹ ڈیرہ بگٹی ٹی ٹولی چلفنگ ءِ۔
نگران حکومت نا بننگ آن پد بلوچستان ئٹ زوراکی نا بیگواہی تیٹ ودکی مسنے و مالو آن خراب حالیت آک پین خراب مسنو۔ ڈیتھ اسکواڈ آتا خلنگ و بِٹنگ آن تیوہ بلوچستان زیمی ءِ، بی این پی مینگل وڈھ ئنا تناظر آن پیشتمسہ تیوہ بلوچستان ئٹ ڈیتھ اسکواڈ تا ایسری کن سیاسی تحریک چلفے۔ نگران حکومت نا وڈھ تنازعہ ءِ ایسر و ڈیتھ اسکواڈ تا ایسری نا جاگہ غا ایمنی برانز ءِ توننگ نا کوشست و شفیق مینگل نا سروکی بلوچستان نا حالیت آتے گیشتر خراب کننگ نا سوب جوڑ مرور۔