بلوچستان نا جتا علاقہ آتیٹ کسر شکست و ایلو تدینی تیٹ شش بندغ مرگ ئنا گواچی و ہشت بندغ ٹپی مسونو۔ تدینیک نوشکے، خضدار، مستونگ و کوئٹہ ئٹ مسر۔
شابینی احوال تا رِدئٹ درو نوشکی-کوئٹہ-تفتان کسر آ گلنگور آن خڑک آ ٹوڈی و تیل دروک ویگن اس ڈک لگار، ڈک لگنگ نا سوب آن ویگن و ٹوڈی ٹی خاخر لگا۔ ہراڑان اِرا بندغ ہشنگسہ مرگ ئنا گواچی مسر۔
پُتک ہلوک جوْن تے چاہنداری کن ٹیچنگ ہسپتال نوشکی آ سر کننگا۔
داکان بیدس خضدار نا علاقہ وڈھ ٹک علاقہ نا ہند آ ارا موٹر سائیکل ڈک لگار ہرانا سوب ماسٹر شبیر احمد لانگو نا مار شبیر احمد مرگ ئنا گواچی مس وختس کہ زہری خان ڈھلو نا مار محمد اسحاق بھاز ٹپی مس۔
اندن استو مستونگ شار آن خڑک مسہ کسر شکست آتیٹ اسہ بندغ اس مرگ ئنا گواچی و زالبول و چُنا تیتون اوار ہفت ٹپی مسر۔
کہوک و ٹپی تے موٹر ولے پولیس نواب غوث بخش رئیسانی ہسپتال آ درے ہراڑے ٹپی تے بنائی جانجوڑی کمک تننگا و اسہ بھاز ٹپی ئسے کوئٹہ غا دننگا۔
احوال تا ردئٹ بنجائی کسر آ غلام پڑینز نا رہی آ ویگن و کار گاڑی ڈک لگار، تدینی ئٹ اِرا زالبول و چُنا تون اوار پنچ بندغ ٹپی مسر۔ اندن سردار مہراب مہیم خان علیزئی روڈ آ موٹر سائیکل گاڑی تون ڈک لگنگ آن اِرا بندغ ٹپی مسر و مسٹمیکو تدینی سائیکل آ سوار بندغ ٹرالر نا خلنگ آن مرگ ئنا گواچی مس۔
ایلو پارہ غا کوئٹہ نا علاقہ ‘مشرقی بائی پاس’ نا ہند آ کلی شاہنواز نا رہی آ نادرست بندغ آتا سُم کاری آن عبیداللہ نا مار جانان ہند مشرقی بائی پاس کسک۔ خوْن نا سوب ذاتی دشمن داری پاننگسہ ءِ۔
اندن خضدار نا علاہق کھنڈ ئٹ برام نا مجلس ئٹ سم کاری آن اسہ چُنا اس مرگ ئنا گواچی و اسہ زالبول اس ٹپی مس۔
علاقائی مخلوق نا رِدئٹ مجلس ئٹ ہوائی سم کاری مننگ اس کہ دا تدینی مس۔