پنجاب ئٹی بلوچ خوانندہ آتا زوراکی نا بیگواہیک
ٹی بی پی سرگپ
بلوچستان ئٹی دنو دے ئس گدرینگپک کہ اسہ شار یا علاقہ ئسے آن زوراکی نا بیگواہی نا رپورٹ دو بف و زوراکی نا بیگواہی تا کُل آن زیات گواچی ورنا، سیاسی باسک و خوانندہ آتے کننگک۔ بلوچستان ئٹی انسرجنسی نا ترندی ٹی ودکی آن پد بلوچ لمّہ باوہ تینا چُنا تے بھلو کچ ئسیٹی اسلام آباد و پنجاب نا خواننگ جاہ تیٹ خواننگ کن رادہ کرینو تانکہ او زوراکی نا بیگواہی تیان رکھوک مریر ولے اِرا سال آن اسلام آباد و پنجاب ئٹی ہم بلوچ خوانندہ آتا زوراکی نا بیگواہی تیٹ ودکی مسنے۔
بلوچستان ئٹی بندغی حق آتا ادارہ و میڈیا اسکان دو رسینگپننگ نا سوب آن پاکستان نا کوالخواک زوراکی نا بیگواہی تیان نمن کیرہ و پاکستان نا نگران سروزیر نا پاننگ ءِ کہ بیرہ پنجاہ بندغ زوراکی ئٹ بیگواہ کننگانو ولے پنجاب ئٹی بلوچ خوانندہ آتے اوفتا یونیورسٹی تا مون تیان زوراکی ئٹ بیگواہ کننگک ہرا نا شاہدی ہم ارے، مگہ او داسا ہم زوراکی نا بیگواہی تا دا ویل ئنا راستکی آن نمن کرور؟
پنجاب ئٹی بلوچ خوانندہ آتا زوراکی نا بیگواہی و نسلی پروفائلنگ آ “ پاکستان ہیومن رائٹس کمیشن لاہور نا یونیورسٹی تیٹ پاکستان نا قانود نافذ کروکا ادارہ تا بلوچ و پشتون خوانندہ آتے بیم تننگ و اِرا خوانندہ نا زوراکی نا بیگواہی تیا خلیس نا درشانی کرسا پارنے کہ بلوچستان و پختونخوا نا خوانندہ آک خاص وڑ ئٹ پنجاب ئٹی بے رکھوک ءُ۔ خوانندہ آتے نسلی پروفائلنگ نا گواچی کننگ نا دا دود ایسر مرے۔ غٹ خوانندہ آتے اسہ وڑ بیم تننگ و زوراکی نا بیگواہی تا خلیس آن بیدس خواننگ نا موکل دوئی مرے۔ “
پنجاب یونیورسٹی لاہور نا خوانندہ فرید بلوچ ءِ یونیورسٹی نا مون آن زوراکی ئٹ بیگواہ کننگ آ شدید السی ردعمل آن پد اودے پولیس نا دوٹی ترسا منشیات نا دروغ نا کیس ئٹی اونا دزگیری پاش کننگانے ولے ایرڈ یونیورسٹی راولپنڈی نا خوانندہ فیروز بلوچ نا زوراکی نا بیگواہی ءِ اسہ سال گدرینگ آن بیدس و اسلام آباد ہائی کورٹ نا پاننگ آن بیدس پاش کننگ متنے۔
تربت آن چار خوانندہ زوراکی ئٹ بیگواہ ءُ و بلوچستان یونیورسٹی نا اِرا سال آن زوراکی ئٹ بیگواہ مروک خوانندہ سہیل و فصیح بلوچ نا وے آجو مننگ نا برخلاف کوئٹہ ٹی برانز مننگ ءِ۔ بلوچستان ئٹی خوانندہ آتا بے رکھوک ءُ و پاکستان نا کوالخواک زوراکی نا بیگواہی تے ایسر کننگ نا جاگہ غا دا بیم تروک ویل آن نمن اُن۔ دا حالیت آتیٹ جہانی بندغی حق آفا ادارہ آتا ذمہ واری ودیک کہ بلوچستان نا دا ویل ءِ ایسر کننگ کن تینا کڑد ءِ سر تیر۔