بلوچ لبریشن آرمی نا ترجمان جیئند بلوچ میڈیا ٹی شینک کروک بیان اسیٹ پارے کہ ننا سرمچار آک کولواہ، قلات و نوشکی ٹی چار جتا جلہو تیٹ کوزہ گیر پاکستانی لشکر، لٹ و پل کمپنی نا کارندہ و احوالکاری ٹاور تے ٹک کریر۔ جلہو تیٹ دژمن لشکر و لٹ و پل کمپنی نا شش کارندہ ٹپی و اِرا احوالکاری ٹاور بھس کننگار۔
ترجمان پارے کہ بلوچ لبریشن آرمی نا سرمچار آک درو بیگہ نا وخت آواران نا علاقہ کولواہ ئٹ کڈ ءِ ہوٹل نا ہند آ کوزہ گیر پاکستانی لشکر نا اسہ پوسٹ ئسے آ بھلا سلہہ تیٹ جلہو کریر، جلہو نا سوب کم آن کم اِرا دژمن کارندہ ٹپی مسر۔
او پارے کہ استو اسہ پین جلہو اسیٹ بی ایل اے نا سرمچار آک قلات نا علاقہ منگچر ئٹ اسہ کوارٹر اسیٹ رہینگوک تیل و گیس کمپنی نا کارندہ تے ٹک کریر، سرمچار آک پن کروک کوارٹر آ چغلی بمب ئٹ جلہو کریر۔ سرمچار آک خبڑداری ڈول ئٹ پن کروک کارندہ تے سیدھا ٹک کتور۔
جیئند بلوچ پارے کہ پن کروک کارندہ غاک منگچر آن خڑک ئنا علاقہ ئٹ تیل و گیس پٹوک کمپنی کن کسر جوڑ کننگ نا کاریم تون تفوک ئسر۔ بلوچ لبریشن آرمی لٹ و پل کمپنی تیا مالو ہم پاش کرینے کہ او بلوچ مڈی تا لٹ و پل ءِ یلہ کیر، دا پراجیکٹ آتیتون تفوک بندغ آک تینا جانی و مالی نسخان تا ذمہ وار تینٹ مرور۔
او ودیک پارے کہ بلوچ لبریشن آرمی نا سرمچار آک استو نوشکی نا علاقہ کیشنگی ٹی پٹی نا ہند آ اسہ احوالکاری ٹاور ئسے نا مشینری ءِ بھس کریر اندن داڑان مالو درو نوشکی نا علاقہ ریکو ٹی سرمچار آک اسہ احوالکاری ٹاور ئسے ٹک کریسہ بھس کریسر۔
بیان نا ایسر ئٹ پارے کہ بلوچ لبریشن آرمی پن کروک جلہو تا ذمہ واری ءِ ارفک و دا ہیت ءِ دوارہ پائک کہ کوزہ گیر پاکستانی لشکر و اوڑتون ہمکوپئی کروک آتیا ننا جلہوک برجاء مرور۔