سینئرصحافی ندیم گرگناڑی آ ایف آئی آر کننگ نا برخلاف خضدار پریس کلب دمدستی مجلس اڈ تننگا و ایف آئی آر نا مذمت کننگا۔ ایف آئی آر صحافتی کاریم تیٹ ہڑاند نا چم ئس پاننگا۔
شابیتی حوال تا رد ئٹ 15 جنوری آ بلوچ یکجہتی کمیٹی نا کنڈ آن اڈ ہلوک ریلی ءِ خضدار پریس کلب نا ٹیم کوریج تس، ہرا نا سوب آن خضدار پریس کلب نا سینئر صحافی، و مسکوہی صدر خضدار پریس کلب ندیم گرگناڑی آ سٹی تھانہ خضدار ئٹی ایف آئی آر کننگا۔
دا بارو ئٹ درو خضدار پریس کلب نا جنرل باڈی نا مجلس اڈ ہلک، ہرا ٹی ایف آئی آر نا مذمت کننگا و دا ایف آئی آر ءِ صحافتی کاریم تیٹ ہڑاند شاغنگ نا چم بازی پاننگا۔
مجلس ئٹ دا فیصلہ مس کہ پن کروک ایف آئی آر نا ہر تلہ غا مذمت کننگ مرے، ڈیہی و جہانی صحافتی گل آتون حوال کننگ نا ہم فیصلہ مس۔
مجلس ئٹ پاننگا کہ ضلعی بست و بند ذمہ وار افسر آتون اوڑدئی کننگ آن بیدس آئی جی پولیس بلوچستان، ڈی آئی جی خضدار رینج تون اوار بڑزکو کوالخواہ تے چھٹی لکھیسہ پاش کننگ مرے کہ ایف آئی آر واپس کننگو، اگہ نہ تو نن صحافتی کاریم تے بند کننگ تون اوار پین سخت ءُ گام ہرفنگ آ بیوس مرون۔