بلوچ نیشنل موومنٹ نا ترجمان تینا شنگ کروک بیان ئٹی پارینے کہ ڈاکٹر منان بلوچ و سنگت آتا ہشتمی سال پوروی نا وختا غٹ زون، چیپٹر و سیل سسٹم آک یاتگاری ریفرنس و پروگرام اڈ ایتر و چاگڑدی حوالکاری میڈیا غا ہیش ٹیگ #MartyrsOfMastung ءِ کاریم ئٹ ہتسہ تینا راہشون و سنگت آتے دروت ندر کیر۔
او پارے کہ ڈاکٹر منان بلوچ، بابو نوروز بلوچ، اشرف بلوچ، حنیف بلوچ و ساجد بلوچ ءِ 30جنوری 2016 آ پاکستانی لشکر مستونگ ئٹی بی این ایم نا سینئر ممبر اشرف بلوچ نا بیٹک ئٹی سہب ئنا گوربام آ پترینگسہ تینا مون سم کاری کرسا شہید کریر۔ ڈاکٹرمنان بلوچ بی این ایم و بلوچ قومی تحریک ءِ منظم کننگ و تحریک نا جتا تنظیم و بشخ آتیٹ تین پہ تینی جیڑہ غا تے ایسر کننگ کن مستونگ و ایب کیب ئنا دورہ غا اس۔
ترجمان پارے کہ دا اولیکو وار الو کہ بی این ایم تینا اہم راہشون ئسے ندر کرے بلکن بی این ایم نا دیہاڑ قربانی تیان پُر ءِ۔ داٹی پارٹی نا راہشون واجہ غلام محمد بلوچ آن ہلیس لس باسک آک تینا ساہ تے ندر کرسا دیہاڑ نوشت کرینو۔ چیئرمین غلام محمد بلوچ نا شہیدی آن پد پارٹی نا کیہی بنجائی سروک آک تینا دتر ءِ ترسا جہد ءِ زندہ تخار۔ داکان بیدس ڈاکٹر دین محمد بلوچ، غفور بلوچ و رمضان بلوچ تون اوار کیہی سروک آک کیہی سال آن پاکستانی لشکر نا ڈھکوک ادارہ غا تا زندان تیٹ بندی ءُ۔
اونا پاننگ اس کہ واجہ غلام محمد نا شہیدی آن گڈ ریاست خوش فہمی نا گواچی اس کہ چیئرمین غلام محمد نا شہیدی آن پارٹی کُھٹو ولے ڈاکٹر منان بلوچ و سنگت آک ریاستی جبر تون مون ترسا بی این ایم ءِ برجاء تخار و منظم تخار۔ ڈاکٹر منان بلوچ بلوچستان نا کنڈ کنڈ ئنا دورہ کرسا بی این ایم نا پروگرام و بلوچ قومی تحریک نا بارو ئٹ چاہنداری تننگ کن دے و نن خواری کشا۔ ہرا نا زہم و بھرم ءِ اینو نن خننگ کینہ۔
ترجمان ایسر ئٹ پارے کہ شہدائے مستونگ ئٹی بابو نوروز اسہ ورنا نوشتکار و دانشور ئس اس۔ او بی این ایم نا تلہ تون اوار تینا قلم ئٹ ہم بلوچ قومی ویل ئنا پارو ئٹ چاہنداری تننگ و قوم ءِ پُہہ کننگ ئٹی اختہ اس۔ کم سنی ٹی شہیدی دوئی کرے و ساجد بلوچ، بی این ایم نا سینئر باسک اشرف بلوچ و حنیف بلوچ تینا سیاسی سفر ئٹی بلوچ قومی تحریک ئٹی تینا کڑد ءِ سر ترسا تینا ایسری ساہ و دتر نا ایسری پڑی اسکان ہم بلوچ قومی تحریک ءِ سوگو کننگ کن ندر کریر۔ اوفتا قربانیک نن کن کسر شان تروکا روشنائی ءُ۔