بلوچ یکجہتی کمیٹی نا کنڈ آن بلوچ زنک ایسری نا برخلاف تولوک برانز نا کاروان، تحریک نا شست و دومیکو دے اسلام آباد آن کوئٹہ کن رادہ مس۔
پاکستان نا بنجائی شار اسلام آباد ئٹ اسلام آباد نیشنل پریس کلب نا مونا شست و دو دے آن برجاء کیمپ ءِ ایسر کننگ و کوئٹہ غا رادہ کننگ نا پڑو ءِ درو پریس کانفرنس ئس کرسا ڈاکٹر ماہ رنگ کرے۔
چاگڑدی حوالکاری میڈیا غا تولوک برانز ئٹ اوار خاہوٹ آتا رُسختی نا ندارہ غاک، تالان مروک عکس و وڈیو تیٹ خننگ مریرہ۔ وڈیو تیٹ خننگ مریک کہ خاہوت آک ڈاکٹر ماہ رنگ تون اوار عکس آتے کشیسہ و اسٹ ایلو تون دو لخی مرسا رُخصت مننگ ءُ و اُلاخ آتیٹ سوار بندغ آک “ مزاحمت زندہ ءِ” نا نعرہ خلنگ ءُ۔
ڈاکٹر ماہ رنگ بلوچ چاگڑدی حوالکاری ویب سائیٹ ایکس آ اسہ پوسٹ ئس کرسا پارے کہ “ دا قیامت خیز ندارہ غا تے نن و ننا پدریچ ساندہ یات تخو۔ ننا پیر انگا لمّہ، معصوم آ چُنا تا خڑینک آک اُست ءِ تل کیرہ، دا پاس عکس آتیٹ ہم بندغی وجود ءِ لڑزفنگ ءِ ولے نن استو آن دا دڑد آن پُر و قیامت کون آ ندارہ غا تون مون تننگ اُن، دا پاس نئے بیان کننگ مریک نئے معاف کننگ مریک۔”
ڈاکٹر ماہ رنگ اسہ پین پوسٹ ئسیٹی اسلام آباد ئٹ اوفتتون اواری نا درشانی کن بروک مخلوق نا منت وار پارِسہ پارے کہ “ نن ہمو کُل بندغ آتا منت وار اُن ہرا اسلام آباد تولوک برانز ئٹ دا سخت انگا وخت آ ننتو سلوک اسر۔ ریاست نا کُل زوراکی تیان بیدس او ننے الیتوس۔“
او پارے کہ “ ننا اُست ئٹ دا بندغ آتیکن شرف و مہر ارے، او ننے ہرا وڑ مہر تسر نن دا مہر ءِ تینا اُست ئٹ تخون۔”
بلوچ یکجہتی کمیٹی نا کنڈ آن کروک پوسٹ ئسیٹی پاننگا کہ “ نن اسلام آباد پریس کلب نا مونا برجاء تینا تولوک برانز ءِ اینو ایسر کرسا کوئٹہ غا رادہ کینہ، ہراڑے نن الس ءِ ریاست نا زنک کش پالیسی تا بارو ئٹ موبلائز کرون و چاہنداری ایتون۔ دا تحریک اسہ قوم ئسے نا جہد ءِ تینا بقاء کن و ریاست نا بے بندغی پالیسی تا ایسری اسکان دا جہد بلوچستان ئٹ سوگوی ئٹ برجاء مرو۔ “
اسہ پین پوسٹ ئسے ٹی پاننگا کہ “ننا تحریک اسہ وڑ آ سرسہب مس کہ نن بلوچ آتے ہمو علاقہ غا تیٹ ہم موبلائز کرین ہراڑے کس سر مننگ کتوکہ۔ ہرا اسہ بھلو وخت ئسے آن پد بٹگ مسوسر۔”
پوسٹ ئٹ مُستی پاننگا کہ “ دا تحریک ایسر متنے بلکن اسہ اندنو جاگہ سے آ سر مسنے ہراڑے دا ننا کُل ئنا ذمہ وار جوڑ مسنے کہ نن بلوچستان ئٹ ریاست نا زنک کش و بے بندغی آ پالیسی تا برخلاف بش مرین۔”
ایلو کنڈ آن بلوچ یکجہتی کمیٹی نا کنڈ آن شال ئنا مخلوق آن خواست کننگا کہ پگہ تولوک برانز ئٹ اوار مروکا تا واپس بننگ آ اوفتا بخیرٹ کن اوفتا مونا پیشتمر۔
