ای و شال
نوشت: مش نود
دی بلوچستان پوسٹ
دا اینو نا سیلّی آ دیگر تون شال ءِ رخست کننگ اُٹ۔ شال تینا ہمو مُست ئنا دروشم تون تینا ہمو اُست ئنا بھلُنی تون ہر اسہ قوم او ٹَک ءِ تینے ٹی جاغن کریسہ واہم بشخندہ کریکہ۔ چلتنی ءُ مہرداری آ بھلا سینہ و سگ ئتون تینے ٹی ہزار آ رنگ آتون روبدار اسک۔ ہر اسہ چُک و گوگو آسمان نا مونا جمر آتون ہمگرچی ٸٹ بال کریسہ شال ءِ تواف کریکہ۔ ہر اسہ کودک پیر و ورنا بھلا بھلا آماچی آ جوزہ و غم تتون جمار نا تدینی کن تینا کاریم ٸٹ مشخول اسر۔ سہب ئتون مونجاٸ تیٹ جمار نا یاتاتا خرینی ٹی ای گل و بال مننگ کن شال ئنا پارہ غا بسُٹ وا شال یار ہمو بھلا جغر تون کنے خمب ٸٹ ہلیسہ حوال کرے۔۔۔۔۔۔۔۔۔۔۔۔۔۔۔۔؟
شال۔ مونجا ٸس۔۔۔۔۔۔؟
یار شال جمار نا دڑداک باز ءُ۔۔
شال۔ دڑداک باز ءُ امر نا دڑداک کنے آن ہم باز ءُ۔۔؟
ای گنوک شال ئنا دڑد ءِ ایچ پُہہ مرسا پاریٹ یار شال ئنا وا انت دڑد ٸس مرو۔۔
شال۔ ہزارا غمتتون دڑدی ءُ بشخدہ ٸس کرے پارے کنا غمک بازززز ءُ ہرافتے گر ای بیان کیوہ تو بنوکو مف داستان تے مرغنا۔گر ای دافتے نوشت کیوہ تو سیاہی پورو تمپ۔۔۔۔۔ واہم شال کنے حوال تون بلوچی آ شون ءِ تریسہ پارے پار تینا غمتے۔۔۔؟
یار شال ای بیرہ اِرا خن تا گنوک ٸٹ ہرافتے نا شال ئنا باتیک تینا مُست ہنا ہمو وڑ و ڈول تیٹ کنے آن مُر دریر مُر کریر۔ پاریر نن روایت نا خواجہ اُن، نن نوری نا ملّ اُن نن ارا مہر کروکا بندغ تے اوار خننگ خواپنہ، نن غیرتی او ملّ اُن نن ارا اُستے اسِٹ مننگ کن ہلپنہ۔ نن تینا دود آتا رد ٸٹ دا گڑا اچ تکیپنہ۔۔۔۔۔۔۔۔۔۔۔۔۔ہندن پین بھاز ایت پاریر یار شال۔۔۔۔۔
شال۔۔۔۔۔۔۔۔بھلو چپپی ئسے آن پد شال کنا دڑدے تینا دڑد ئتون تول کرے پارے۔۔۔۔ یار نی دا دڑدے دڑد ٸس پاپہ نا دڑد آن کنا دڑد باز گیشتر ءِ ولے واہم ای نے نا داستان نا بارو ٸٹ گڑاس ہیت پاوہ۔۔
شال پارے یار۔۔۔ یار کنا باتیک راستی نا ہمو نوری نا ملّ ءُ ہمو چاکر نا نرپاد آکو۔ اوفک داسکن مہر ءِ او ہمو مہر ہرا کہ ارا است ہنا مریک اودے تینکہ جوان تکیپسہ۔ اونا پین باز آ سوب آ کو۔
اسٹمیکو دا کہ اوفتے ہرا اینوبھلا ویل ہلکنے او غلامی ءِ ہراڑان اوفک ہندن تینا جون ئتون اختہ او کہ اوفک داڑان پیشن ہننگ و سوچنگ کپسہ۔اوفک داکان مُستی خنپسہ کہ جہان انت ٸسے۔؟ داڑے انت ٸکن بسونن؟ بیرہ نن غلام اُن یا ایلو کوڑی نا ہم؟ گر نن غلام اُن تو نن انت کین؟ گر ایلو جہان ٸٹ ہم غلام ارے تو اوفک امر کننگ ءُ۔؟ دا سوج آک اوفتا ملی تیان باز پیشن نا ہیت ءُ ہرافتے سوچنگ کن اوفتے زات آن پیشن مننگ اول الم ءِ۔
ارٹمیکو دا کہ کنا باتی تے نا چاہنداری خلکنے ہرا ملّ آک کنا خوانرہ اوفک پاتو کنے استان دیرہ یا کنا رژن ٸکن کنے آ پرک نا مثیل ٸٹ شنک مریرہ۔وا گڑاس ءِ کست و کاڑ خلکنے اوفک بیرہ تینا جمار ءِ تینا نت تا مون اسکان ہریرہ۔ اوفک کست کیرہ۔ اوفک ہر اسہ نظریہ چیدہ و فکر آتا کُڑمبی آن بیدس شدت ئٹ کارہ ہراڑان او تینا دژمن کن پین کسرتے سُبک کیرہ۔۔
مسٹمیکو و گڈیکو ہیت دا کہ مہر ءِ او داسکن جون ئنا خواہندٸی ٸس تکیرہ اوفک دادے بیرہ اسہ ہنینی ءُ است جمی۔۔۔۔۔ ٸس تکیرہ۔ ولے اوفک مہر آن نا پُہہ ءُ اوفتے دا سما اف کہ مہر کروکا بندغ ٸٹ ہزار آ راز آک ہزار آ ارمانک ہزار آ درمانک دفن ءُ۔ اوفتے دا سما اف کہ گر کس ٸس مہر ءِ پُہہ مس تو او جہان ءِ پُہہ مس۔ اوفک دا تپسہ کہ گر کس مہر کرے او مہراوان مریک۔ او با کڑد مریک او شاٸر مریک۔او داسکان فطرت نا دروشم ٸٹ کوکُڑو کننگ نا ہمت ءِ کتنو اوفتے دا ہم سما اف کہ مہر کروکا بندغ ہر وخت او پاس ٸٹ فطرت تون ہم گپی مریک۔۔ تو گُڑا نی دا باتی تیان گلہ کپہ و کوشست کر دافتے رژنا ءُ کسر نا پارہ غا رُغامیسہ کتاب تون سنگت کرک۔۔۔۔۔
کناامیت ہمت تون کنا بڑزا مس استے سیبو ٸس رسینگسہ ای شال ءِ مہر ئنا خن تیٹ ہریسہ پاریٹ۔۔۔ شال پار نا انت دڑد ءُ۔؟
شال۔۔۔۔ ٹاکو ٸس خلیسہ پارے کنا دڑد آتے بابا کون ءُ کڑد ٸس و اسلمی ءُ اُست و جغر ٸس سگینگ کیک چنکا اُست آتا وس اف۔
شال رخست اف اوارُن پارے۔۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔