دا لانگ مارچ ئٹ گدریفوک آ دیک کنا تیوہ غا سیاسی سفر نا گچین آ دیک ئسر ہرافتے ای تیوہ غا بلوچستان نا کل آن زیات دلیر زالبول و بلوچ ورنا تیتون گدریفیٹ۔
دا خیال آتا درشانی ءِ بلوچ زنک ایسری نا برخلاف لانگ مارچ نا سروکی کروک ڈاکٹر ماہ رنگ بلوچ چاگڑدی حوالکاری تا سائٹ آ اسہ پوسٹ اسیٹ کرے۔
ڈاکٹر ماہ رنگ نا پین پاننگ ءِ کہ ننا ایمان ءِ کہ نن الّم اسہ دے اس تینا ڈغار ئٹ ایمنی ہتون، کہ ہراڑے پنوک آ خاہوت آک مفس، ہراڑے لُمہ غاتا مڷ آک اودیم کننگپس، ہراڑے چناک زوراکی ئٹ چوری کننگپس، ہراڑے ایڑ تا ایلمک زاندان تیٹ بند کننگپس، ہراڑے ورناک جارات ئٹ تینا خاہوت آتون زند گدریفر، ہراڑے بندغ آک وطن آن پیشن مفس، ہراڑے ایمنی مرے، خوشحالی مرے، جارات مرے۔
خیال ئٹ مرے اِرا توہ اسکان اسلام آباد ئٹ تولوک برانز کننگ آن پد بلوچ لانگ مارچ ئٹ اوار مروک آک درو بلوچستان کن رادہ مسر۔ استو ژوب ئٹ پشتون تحفظ موومنٹ نا باسک آک مارچ ءِ بخیر کریر اندن اینو سہب ئنا کچلاک ئٹ ہم پشتون تحفظ موومنٹ نا باسک آک مارچ ئنا بندغ تے بخیر کریر۔
اینو لانگ مارچ کوئٹہ ءِ سر مرو ہراڑے اوفتے گچین ڈول ئٹ بخیر کننگ نا گمان ءِ۔ مارچ ئٹ اوار مروک آتے بخیر کننگ کن درو بلوچ یکجہتی کمیٹی نا پارہ غان تیوہ غا شار ئٹ پمفلٹ بشخنگا اندن ویڈیو کلہو تا کمک ئٹ بندغ آتے اوار مننگ کن بٹنگار۔