بلوچ زنک ایسری و زوراکی نا بیگواہی تا برخلاف بلوچ یکجہتی کمیٹی نا قافلہ کوئٹہ ءِ سر مسنے۔
لانگ مارچ نا قافلہ ءِ ژوب و کچلاک آن پد جبل نور نا ہند آ بخیر کننگا، اندن لانگ مارچ ئٹ اوار مروک آتے بخیر کننگ کن ہزار گنجی نا ہند آ بندغ تا بھلو کچ اس مُچ مسنے۔ لانگ مارچ ہزار گنجی ءِ سر مننگ آن پد قافلہ نا دروشم ئٹ بلوچستان یونیورسٹی نا مونا ہنو۔
بلوچ یکجہتی کمیٹی چاگڑدی حوالکاری تلہ تیا اسہ پوسٹ اسیٹ پارے کہ بلوچ زنک ایسری و بلوچ ورنا تا زوراکی نا بیگواہی تا برخلاف بلوچ یکجہتی کمیٹی نا قافلہ کوئٹہ ءِ سر مسنے ہراڑے منہ ساہت اسکان ہزار گنجی ءِ سر مرو و اوکان قافلہ نا دروشم ئٹ بلوچستان یونیورسٹی نا مونا تولو۔
بی وائے سی کوئٹہ نا مخلوق آن خواست کریسہ پارے کہ نن کوئٹہ نا مخلوق آن خواست کینہ کہ او بریر و تینا لمہ و ایڑ تے بخیر کریسہ ریاست ءِ کلہو ایتر کہ دا ظلم و تادی تیتون مون تننگ کن بلوچ اسہ جاہ مریسہ دا کاروان تون سلوک ءِ۔
بلوچ یکجہتی کمیٹی و لانگ مارچ نا سروکی کروک ڈاکٹر ماہ رنگ بلوچ چاگڑدی حوالکاری تلہ تیا تینا اسہ پوسٹ اسیٹ پارے کہ نن شکست کُنتنن بلکن بلوچ الس نا مقدمہ ءِ کَٹیسہ بننگ اُن، نن گیشتر حوصلہ، جیرت و طاغت تون تینا ڈغار بلوچستان آ پدا بننگ اُن۔ نن بلوچ زنک ایسری نا برخلاف دا جنز ءِ پین حوصلہ، جیرت و طاغت تون اُرا اُرا اسکان سر کرون، تینا بندغ تا توار جوڑ مرون، تینا مخلوق تون سلوک مرون، تینا لمہ، ایڑ، کماش و ورنا تے تینتون ہمکوپہ کرون و تینا مخلوق نا طاغت ئٹ دا تادی تیتون مون ایتون۔
او پارے کہ ننا جنز ئنا پنچمیکو لڑ ئنا بناء کوئٹہ ئٹ 27 جنوری آ اسہ السی جلسہ ئسے آن مرو۔ ای تیوہ بلوچستان نا مخلوق آن خواست کیوہ کہ او 27 جنوری آ کوئٹہ سر مریر و دا جنز ئنا بشخ جوڑ مریر۔ دا کنا ایمان ءِ کہ بلوچ الس کٹو۔