بلوچ یکجہتی کمیٹی نا پارہ غان پگہ بیست و ہفت جنوری آ کوئٹہ ئٹ مروک جلسہ کن تیوہ بلوچستان آن بندغ آک اوار مننگ کن قافلہ تا دروشم ئٹ پیشتمنگ بناء کرینو۔
دائسکان کیچ و پنجگور آن کیہی بندغ آک تینا علاقہ تیان پیشتمسہ قافلہ تا دروشم ئٹ کوئٹہ کن رادہ مسنو۔
خیال ئٹ مرے کہ بلوچ یکجہتی کمیٹی نا اسلام آباد ئٹ اِرا توہ اسکان برجاء تولوک برانز تدوکا دے تیٹ ایسر مس، درو ہراتم مارچ ئنا بندغ آک کوئٹہ ءِ سر مسر گڑا السی مُچی اوفتے گچین ڈول ئٹ بخیر کرے۔ بخیر کروک مُچی ٹی زالبول، چنا و کماش آک بھلو کچ اسیٹ اوار ئسر۔
لانگ مارچ ئٹ اوار مروک آک 27 جنوری آ کوئٹہ ئٹ جلسہ اس ہڈ ایتور دا بابت بی وائی سی تیوہ بلوچستان آن جلسہ ئٹ اوار مننگ نا خواست کرینے۔
یاتی مرے بلوچستان ئٹ نومبر 2023 آ بالاچ مولا بخش نا کاؤنٹر ٹیررزم ڈپارٹمنٹ ”سی ٹی ڈی“ نا دو آن دروغ نا مونتس ئٹ شہید مننگ آن پد بلوچ یکجہتی کمیٹی نا برانز آتا لڑ بناء مس ہراڑے برانزیک اسہ مرغنو لانگ مارچ اس اسلام آباد اسکان کشار اندن دا وخت ئٹ بلوچستان تون اوار پاکستان نا ایلو شار و پیشن ڈیہہ تیٹ ہم برانز کننگا۔
اِرا توہ اسلام آباد ئٹ تولوک برانز آن پد بیگواہ بندغ تا خاہوت آک برانز ءِ ایسر کریسہ پدا بلوچستان آ بسر اندن بلوچ یکجہتی کمیٹی نا پاننگ ءِ کہ زوراکی نا بیگواہی تا برخلاف اوفتا جہد ئنا دا بناء ءِ بروکا دے تیٹ داٹی گیشتر ترندی ہتنگو۔