پاکستان ئٹی گچین کاری تا دے موبائل و ڈیٹا سروس ءِ بند کننگ ءِ ایمنسٹی انٹرنیشنل جاندمی ایشیا الس ئنا آزاتی درشا و پرامن اشتماع نا حق آ جلہو ئس پارے۔
ایمنسٹی انٹرنیشنل چاگڑدی حوالکاری میڈیا پلیٹ فارم ایکس آ پارے کہ ڈیہہ ئٹ گچین کاری تا دے ٹیلی کمیونیکیشن و موبائل انٹرنیٹ سروس ءِ بند کننگ نا فیصلہ آزاتی درشانی و پرامن اشتماع نا حق آ اسہ پاش جلہو اسے۔
ایمنسٹی انٹرنیشنل پاکستانی کوالخواہ تیان خواست کرے کہ او الس کن انٹرنیٹ سروس ءِ دمدستی ملے۔
اندن ہیومن رائٹس کمیشن آف پاکستان ہم موبائل و ڈیٹا سروس نا بندی آ پارے کہ داڑان تینا رائے تروکا تا معلومداری نا حق و گمانی وڑ ئٹ بھرم تے رادہ کننگ زیمی مننگ کیک۔
چاگڑدی حوالکاری میڈیا پلیٹ فارم ایکس آ ایچ آر سی پی تینا اسہ بیان ئسیٹی پارے کہ سندھ ہائی کورٹ نا کنڈ آن نگراں حکومت ءِ پولنگ نا دے بیدس ہڑاند آن انٹرنیٹ سروس نا باور تننگ آن بیدس سروس ئٹ اسہ وڑ ہڑاند ودی کننگا۔
بیان ئٹی پی ٹی اے نا دعویٰ نا حوالہ ترسا پارے کہ اودے حکومت نا کنڈ آن انٹرنیٹ سروس ءِ بلاک کننگ نا ہچو پنت رسینگتنے، دا بارو ئٹ شفافیت نا نیستی ءِ کہ ہڑاند اراڑے و اخس وخت اسکان مرو۔
بیان ئٹ پاننگا کہ موبائل و ڈیٹا سروس نا بندی آن رائے تروکا تا معلومداری نا حق و گمانی وڑ ئٹ بھرم تا رادہ کننگ زیمی مرو۔
بیان ئٹ پاننگا کہ ہرا بندغ آک دنو پنت تسنو اوفتا چاہنداری کننگ مرے و ہموفتے ذمہ وار پاننگ مرے۔