بلوچ اسٹوڈنٹس آرگنائزیشن آزات نا بنجاہی کماش درپشان بلوچ پارے کہ کوزہ گیر پاکستانی ریاست ہرا بلوچستان آ بے قانودی، بے اخلاقی و بے بندغی ڈول ئٹ زوراکی، بیدادی و طاغت نا زور آ کوزہ گیر نا دروشم ئٹ ساڑی ءِ و طاغت و بیدادی نا وسیلہ ئٹ بندغ آتے چپ و غلام کرینے داڑان جمہوریت، جمہوری و بندغی اقتدار و سول سپریمیسی نا بڑزی نا امیت تخنگ آمخ آتا جنت ئٹ مننگ نا ہیت ئسے۔ پاکستانی ریاست بنجاہی تلہ غا ہراڑے جمہوریت ءِ کسفینے و تدوکا ہفتاد سال آتیان فوج وختس سیدھا تو وختس پدی حکومت کریسہ بننگ ءِ ہموڑے بلوچستان نا منہ مفاد پرست بندغ جمہوریت و پارلیمنٹ نا رٹہ ءِ خلوک توسنو و الس ءِ دروغ تغ نشان تننگ ءُ۔ اوفک بایدے الس ءِ دا بیرہ پن ئنا جمہوریت و ریاستی بست و بند ئتون تفنگ کن خوار کننگ نا جاگہ غا راجی بقاء و جہد آجوئی نا عمل و فکر ئتون گنڈارہ تانکہ زوت آن زوت دا ناسور آن بلوچ نا جان خلاس مسکہ۔
او پارے کہ ہراڑے دا ڈیہہ ئٹ کوزہ گیر پنجابی حاکم آتے لاہور و اسلام آباد ئٹ فوج نت ئنا شیف آ تخانے ہموڑے بلوچستان ہرا ریاست نا کالونی ئسے و داڑے اسکول آن ہلیس واٹر سپلائی نا معاملہ تے اسکان فوج اُریک انداکان منہ بیرہ پن ئنا جمہوریت دوست وختی مفاد آتا خاطر بلوچ الس ءِ اسہ دروغ امیت اس تننگ نا بے سہب کوشست کننگ ءُ و داخس وفاداری کننگ آن پد ہم فوج ئنا پارہ غان اوفتے رد کننگا تو داسہ پوہاڑ بناء کرینو کہ گچین کاری تیٹ دروہ مسنے۔ ہرا ڈیہہ بلوچستان ئٹ دروہ نا بنداو آ ساڑی ءِ اوڑان صاف گچین کاری نا امیت تخننگ تینے آمخ جوڑ کننگ نا بریبر ءِ۔
درپشان بلوچ پین پارے کہ بلوچستان ئٹ السی ردعمل و گچین کاری تیان بائیکاٹ اوفتیکن سبخ ئسے کہ او دا بے سہب کوشست ءِ یلہ کیر ہرا پارلیمنٹ آن ننا باوہ و پیرہ غاک ہچس دوئی کننگ کتور داکان ڈاکٹر مالک و بی این پی کون آ بندغ آک ہرا اسہ پارہ غان بلوچ آتے پارلیمنٹ کن بچ ایترہ اندن ارٹمیکو پارہ غان اندا نا برخلاف نعرہ خلیسہ بلوچ راج ءِ دروہ تننگ نا کوشست کیرہ او ہچس دوئی کننگ کپسہ۔ بلوچ راج ہراڑے اینو کوزہ گیر پاکستان نا اصلیت و گواچنی آن واخب مسنے ہموڑے اینو او بلوچ راج ئٹ ساڑی دا مفاد پرست بندغ تے ہم چائسنے ہرا اسہ پارہ غان جمہوریت، پارلیمنٹ و ریاست نا ہیت ءِ کیرہ اندن گواچن ئٹ او ریاست نا مہرہ نا ڈول کاریم کیرہ ہرا بلوچ ڈغار آ کوزہ کرینے۔ داسہ تو پنجابیک ہم دا بے سہب آ جمہوریت آ ملنڈ کننگ ءُ ولے بد بختی آن منہ بندغ ریاست نا منہ مفاد نا خاطر بلوچ مفاد آتے چرجوئی ئٹ سودا کریسہ بندغ تے بچ تننگ ءُ و منہ مراعات آتا خاطر راج دژمنی نا کاریم سر تننگ ءُ ولے دا ریاست ہرا تینا بندغ آتیتون وفادار اف گڑا اسہ غلام ئسے نا دروشم ئٹ نم امر اوڑان امیت تخنگ کیرے۔
بی ایس او آزات نا کماش ایسر ئٹ پارے کہ بلوچ راج اوفتیان حساب ہلے ہرا چرجوئی ئٹ دروغ گوئی و راجی مفاد آتے نسخان تننگ کن کاریم کننگ ءُ۔ اسہ پارہ غان اوفک الس نا اُست خواہی تیان پد ہم علاقائی، قبائلی و سیالی و ایلو حکمت عملی تے کاریم ئٹ ہتریسہ منہ بندغ ءِ ووٹ تننگ کن بیوس کریر تانکہ تینا آقا تے خوش کننگ ئٹ سر سہب مریر اندن داسہ ہراتم ریاست تینا گواچن دروشم ءِ نشان تریسہ اوفتے رد کرے گڑا اوفتے بلوچیت و جمہوریت یات بس و داسہ بندغ تے جمہوری جہد ئنا پن آ رد شاغنگ نا کوشست کننگ ءُ۔ بلوچ الس اوفتا گواچنی آن واخب مرے بلوچستان ئٹ پارلیمنٹ دوست ءُ اسہ بندغ اس ہم بلوچ دوست مننگ کپک انتئے کہ دا بندغ آک پارلیمنٹ ئٹ مریسہ بلوچ دژمنی سر تریسہ بننگ ءُ و بلوچ راجی مڈی تا سودا بازی ٹی کل آن مون ئٹ ءُ۔