بلوچستان گچین کاری تیان گُڈ
ٹی بی پی سرگپ
بلوچستان گچین کاری تیان گڈ برانزی تحریک آتا پلویڑ ئٹی ءِ۔ بلوچ، پشتون و ہزارہ قوم پرست تپہ غاک گچین کاری تیٹ بھلو کچ ئسیٹی دھاندلی نا برخلاف اوڑدئی تلہ غا برانز کننگ ءُ۔ دیہاڑ چاہوک آک دا ہیت آ امنائی کیرہ کہ بلوچستان ئٹی ایسری وار ساف گچین کاری نوزدہ سد و ہفتاد و یک ئٹی مسس، ہراٹی نیشنل عوامی پارٹی سرسہب مرسا حکومت جوڑ کریسس ولے بیرہ نُہہ تُو آن پد اوفتا حکومت ءِ ایسر کرسا بلوچستان ئٹی فوج کشی کننگا۔
بلوچستان ءِ مقتدر تاغت آک سیاسی تجربہ گاہ جوڑ کرینو و سیاسی تپہ غاک بیرہ پن کن مسونو۔ قوم پرست سیاسی تپہ آک تینا مُچی و برانز تیٹ دا ہیت ءِ منیرہ کہ بلوچستان نا فیصلہ غا تے عملی وڑ ئٹ فوج کننگ ءِ و مذہبی بنیاد پرست، ڈیتھ اسکواڈ، و ڈرگ مافیا ءِ بلوچ قوم ئنا زی آ چٹی کننگانے۔
بلوچستان ئٹی مالو ہم گچین کاری تیٹ بھاز دھاندلی مسنے ولے دا گچین کاری تیٹ اندنا بندغ آتے گچین کننگانے ہرا حلقہ نا الس اوفتے درست ہم کپک و اسہ حلقہ آن جتا امیت وار تے گچین کننگ نا پڑو کننگ مننگ ءِ۔ قوم پرست تپہ غاک برانز کننگ ءُ ولے اوفتا مصلحت پسندانہ پالیسی تا سوب آن الس اوفتا برانز تیان بے چکاری نا درشانی کننگ ءِ۔
بلوچ قوم پرست تپہ غاک قومی حق آتے دوئی مننگ نا جہد و ساحل وسائل نا دفاع نا دعویٰ کرینو ولے الس ئنا بنیادی و معاشی ویل آتے ایسر کننگ ئٹ بے سوب مسنو و زوراکی نا بیگواہی کون آ بھلا ویل آ ہم تران کننگ کن تیار افس، ہرا نا سوب آن بلوچستان ئٹی پاکستان نا پارلیمانی سیاست آن بےچکاری ودنگ ءِ و قوم پرست پارلیمانی تپہ غاک تینا شرف ءِ گوئنگ ءُ۔