بلوچ نیشنل موومنٹ نا چاگڑدی جوان کاری ادارہ ضلع آواران نا چھار تحصیل جاھو، آواران و مشکے ٹی جانجوڑی نا حالیت آ رپورٹ شنگ کرسا تینا فریشانی نا درشانی کرے۔
رپورٹ نا رد ئٹ ضلع آواران نا دا چھار تحصیل آتیٹ 29 جانجوڑی بنجاہ نیم فعال، غیر فعال و آسراتی تیان پد تموک ءُ۔
رپورٹ ئٹ پاننگا کہ “جانجوڑی نا آسراتی تا وے مننگ نا سوب آن چنکا چنکا ناجوڑیک ہم مرگ ئنا کلہو تون بریرہ و ہرا وخت ناجوڑ آتے کراچی یا ایلو شار تیا دمدستی رادہ کننگک تو کسر تا بد حالی نا سوب آن ناجوڑ آک سفر ئٹ ساہ ایترہ۔‘‘
رپورٹ ئٹ ودیک پاننگا کہ بلوچستان دا وختا دیمروی کروک دور ئٹ ہم پاکستان کون آ پد تموک ڈیہہ ئنا نوآبادی ءِ ہرا نا الس ءِ تاغت نا زور آ مرگ ئنا کنڈ آ دکہ تننگک۔
رپورٹ ئٹ پاننگا کہ اسہ کنڈ آن ریاست تینا تیبہ مشینری تون بلوچ چاگڑد ئٹ تاغت نا کارمرز ئٹ بندغ آتے کھسفنگ ءِ و ایلو کنڈ آن بلوچ چاگڑد ئٹ زند ئنا بنداوی خواست آتا آسراتی مفننگ نا سوب آن بندغ آتا کہنگ نا شرح ٹی ودکی منگ ءِ ہرا نا تیبہ ذمہ واری ریاست پاکستان نا ءِ۔
بی این ایم اقوام متحدہ و ایلو ڈیہہ تیان خواست کرے کہ پاکستان بلوچستان ئٹ ہر وڑ ئٹ بندغی حق آتا لتاڑ کننگ ءِ اگہ دا لڑ برجاء سلیس تو بلوچستان خونی جاہ ئس جوڑ مرو، ہرادے توننگ کن جہانی مداخلت نا خواست ءِ۔