بلوچستان نا علاقے بولان ئٹ اینو ہفتمیکو دے پاکستانی لشکر نا لشکر کشی برجاء ءِ، فوج ئنا کنڈ آن ہن و بر نا کسرک بند کننگانو، اندن آپریشن ئٹ اختہ لشکری کارندہ غا تیا جلہو مس، خیمہ غا تیات خاخر لگا۔
پاکستانی لشکر نا کنڈ آن بناء کروک لشکر کشی اینو ہفتمیکو دے ہم بلوچستان نا علاقہ بولان و اوڑتون تفوک سبی و ہرنائی نا علاقہ غا تیٹ برجاء ءِ۔ فوج جتا ہند آتیا عارضی کیمپ خلِسہ غٹ کسر تے بند کرینے ہرا نا سوب آن کیہی بندغ آک علاقہ آن پیشن ہِننگ کپسہ۔
ہفت دے آن برجاء آپریشن نا سوب آن ہندی مخلوق ءِ کُننگ نا گِڑا رسینگ اف۔
ہندی حوال تروکا ٹی بی پی ءِ پاریر کہ سبی و ہرنائی نا کیہی ہند آتتون اوار بولان نا علاقہ غا تیٹ فوج ساڑی ءِ ہراڑے توپ خانہ غا تیٹ گولہ خسنگ برجای ءِ۔
ہندی بندغ آتا رد ئٹ پِر و برف آن گڈ ہندی مخلوق دارو درمان تون اوار ایلو المی گڑا تیکن شار تیا ہِننگ کپسہ۔
درو آپریشن نا وختا پاکستانی لشکر بولان تون تفوک علاقہ شابان ئٹ کیہی چُنا نیاڑی تے دزگیر کریسس ہرا داسکان آجو متنو و بھاگیا ئسے نا اُرا تے ہم ہُشاسر۔ اندن سبی و بولان نا نیامی علاقہ ٹی فوج جنگل آتے ہم ہشانے۔
اندن حوال رسینگانے کہ بولان ئٹ لشکر کشی ٹی اختہ پاکستانی لشکر نا کارندہ غا تیا جلہو کننگانے، جلہو نا سوب آن اوفتا خلوک خیمہ غا تیٹ خاخر لگانے۔
ٹی بی پی نیوز ڈیسک ءِ رسینگوکا حوال تا رد ئٹ سنجاول نا علاقہ ٹی سلہہ بند بندغ آک بولان آپریشن نا وختا خیمہ خلوک پاکستانی لشکر نا کارندہ تے جلہو ئٹ ٹک کرینو۔
ہندی حوال تا رد ئٹ جلہو نا وختا سم کاری و تراک آتا توار بِننگ مسنے و دا وختا لشکری خیمہ غا تیٹ خاخر ہم لگانے۔
آپرشن و فوجی کارندہ غا تا جانی و مالی نسخان نا بارو ئٹ داسکان کوالخواک ہچو تران کتنو۔