نظم
ولدا نی خنوسک عید کرون
شاعر: عمیر مہرُل
پھلاک اگہ خوشبو تسُور
شکراک ننے آھو تسُور
سیخاک اگہ جادو تسُور
ورناک ننے گر دو تسُور
او ساہ ؤ بدن تو روح تسُور
ولدا نی خنوسک عید کرون
نن عیدکرونک عید کرون
صف تیٹی اگہ نن ودّانک
ساحل تے تینا نن ڈکھانک
دریاتے تینا نن رکھانک
رازاتے اگہ نن کیدانک
نسلاتے بروکا گنڈانک
ولدا نی خنوسک عید کرون
نن عیدکرونک عید کرون
استارتے اگہ ماگم اِلّا
مُلّا تہ کروکا چّم اِلّا
کُل شارتے ہموتا غم اِلّا
دا ڈیہہ ٹی ننے بے غم اِلا
قومی آ ننے ماتم الّا
ولدا نی خنوسک عید کرون
نن عیدکرونک عید کرون
راجی آ تینا زموارا تے
سرپند مرین غمواراتے
سرداتے اُشان مکاراتے
سیاہ او تے ہمو بد کاراتے
وڑ وڑ نہ بِنان کفتاراتے
ولدا نی خنوسک عید کرون
نن عیدکرونک عید کرون
ورناک بریرک زندان آن
نن شئیر خلینک اومان آن
ایلمک بریرک بولان آن
بیرک تے اتیرک گوران آن
نن دروت ہلینک نادان آن
ولدا نی خنوسک عید کرون
نن عید کرونک عید کرون
مہرُلؔک اگہ ہمراہ مسوُر
اُستاک ننا یکجا مسور
چہراک ننا زیبا مسور
اَبّاک ننا ورنا مسُور
درداک ننا نیمہ مسور
ولدا نی خنوسک عید کرون
نن عید کرونک عید کرون