ضلع کیچ نا جتا علاقہ تیان تعلقداری تخوک بیگواہ بندغ تا خاہوت آتا کیمپ اینو مسٹمیکو دے ہم ضلعی بست و بند نا دفتر نا مونا برجاء مس خاہوت آتا پاننگ ءِ کہ ننتون پرامن برانز آن بیدس پین ہچو کسر اف اندا خاطر او تولوک برانز کننگ ءُ۔
دا وخت بلیدہ غان تعلقداری تخوک بیگواہ مسلم عارف، فتح میار، جان محمد بلوچ، اندن آپسر تربت آن بیگواہ جہانزیب فضل بلوچ، شے کہن تربت نا ہندی ڈاکٹر رفیق بلوچ، کلاہو تمپ نا ہندی نثار کریم، میری بگ آن تعلقداری تخوک محمد حیات ولد سبزل، پیدارک کیچ آن تعلقداری تخوک میران حسین و سمیر نعمت نا خاہوت آک اوار ءُ۔
خاہوت آک درو شہید فدا چوک آن ڈی سی آفس اسکان ریلی اس کشاسر و پدان ضلعی بست و بند نا دفتر نا مونا برانزی کیمپ خلیسہ تولوک برانز کریر۔
یاتی مرے خاہوت آک داکان مالو ہم اِرا وار تولوک برانز کرینو و بست و بند تون گپ و تران آن پد او برانز ءِ ایسر کرینو ولے خاہوت آتا پاننگ ءِ کہ بست و بند ننا بندغ آتے یلہ کننگ ئٹ کڑد سر تننگ اف و گپ و تران آن پد سوبر ءُ گام ارفنگتنے و ہرا بنماسی ٹِک آتیا نن تولوک برانز ایسر کریسن او ننا بندغ آتا یلہ کننگ ءِ ولے بست و بند ہر وار ننتون وعدہ کیک ولے گپ و تران آن پد عمل کپک ایہا تا اندا خاطر او دا وار بین برانز تون اوار برانز نا ایلو ڈول تے ہم کاریم ئٹ ہتنگ کیرہ۔
تولوک برانز ئٹ بیگواہ بندغ تا خاہوت آتیان بیدس حق دو تحریک کیچ، بلوچ یکجہتی کمیٹی و بی ایس او پجار نا باسک آک ہم خاہوت آتیتون ہمکوپئی نا درشانی کننگ کن تولوک ءُ۔