بلوچ یکجہتی کمیٹی نا سروکی ٹی اینو نوشکے ٹی جلسہ اس اڈ تننگا ہراٹی زالبول و نرینہ غاک ہزار آتا کچ ئٹ اوار مسر و ہمکوپئی نا درشانی کریر۔
جلسہ ئٹ اوار مروک آک ظلم و تادی تا برخلاف سیوتی ئٹ جہد کننگ نا سوغند ارفیر۔ جلسہ ئٹ شہید حمدان بادینی تون اوار غٹ شہید آتے دروت ندر کننگا اندن جلسہ ئٹ نوشکے و رخشان تون اوار ایلو علاقہ تیان بندغ آک اوار مسر۔
بی وائی سی نا آرگنائزر ڈاکٹر ماہ رنگ جلسہ ئٹ تران کریسہ پارے کہ ننے دا راجی سیوتی و ہمکوپئی ءِ تینا زند ئنا ہر گام آ برجاء تخوئی ءِ۔ ننا راجی طاغت ءِ کل آتیان زیات ذاتی، خاہوتی و قبائلی جنگ آک نسخان تسنو۔ دا قبائلی جنگ آتیٹ ننا ہزار آ بندغ خلنگانو۔ ننا ہزار آ اُراک بھس مسنو۔ داسہ وخت بسنے کہ نن دا تین پہ تین نا جنگ آتیان پیشتمن۔ دا قبائلی جنگ آک قدرتی مفسہ و نئے کہ ننا بندغ آتے تین پہ تین جنگ کننگ و کہنگ نا شوق ءِ بلکن ننا اُرا نا ویل آتیٹ بدر تا زیم مریک او ننا چنکا چنکا ویل و اختلاف آتیان فائدہ ارفسہ ننے تین پہ تین جنگ کرفرہ۔
او پارے کہ دا انگریز آتا وخت ئنا پالیسی ئسے تاکہ ننے تین پہ تین تون جنگ کرفسہ، ننے بشخ کریسہ ننا زی آ اڑزانی ئٹ حکومت کننگ کیر و اینو او جارات ئٹ دا کاریم ءِ کننگ ءُ و نن دا پالیسی ءِ پہہ مننگ افن بس تین پہ تین تینا دو تیٹ تینا ایلم ءِ کسفنگ اُن۔ ولے داسہ بس کروئی ءِ، داسہ تین پہ تین جنگ کروئی اف۔ داسہ تین پہ تین نا جنگ آتے ایسر کننگ نا وخت بسنے۔