بلوچستان نا بنجاہی شار کوئٹہ، ضلع کیچ ئنا علاقہ زامران و دشت ئٹ ریلوے ٹریک، گیس لائن و پاکستانی لشکر آ جلہوک، جلہو تیٹ اِرا کارندہ مرگ ئنا گواچی و چار ٹپی مسنو۔
استو ننکان سریاب روڈ آ بلوچستان یونیورسٹی نا خڑک آ ریلوے ٹریک آ تراک اس مس، ریلوے ٹریک نا اسہ کپ ئس بھس مس۔
بلوچستان نا بنجاہی شار کوئٹہ ٹی سریاب روڈ آ منیر احمد روڈ بلوچستان یونیورسٹی نا خڑک آ ریلوے ٹریک آ ترند تراک مس ہرانا سوب آن ریلوے ٹریک نا اسہ پٹری ئسے نا اسہ کپ ئس تیوہ بھس مس۔
بناہی احوال آتا رد ئٹ تراک آئی ای ڈی نا وسیلہ ئٹ کننگانے۔ تراک ئٹ ہچو جانی نسخان متو ولے ریلوے ٹریک نا پٹری نا اسہ کپ ئس تیوہ بھس مس۔ پولیس و فورسز آک ہمو ہند آ سر مسر۔
داکان مالو ریلوے بست و بند سیکورٹی گمان آتے مون آ تخسہ اینو روانہ مروک آ جعفر ایکسپریس نا ہننگے بند کریسس۔
یاتی مرے کہ درو کوئٹہ قمبرانی روڈ آ پولیس نا اسہ گاڑی ئسے بم تراک ئٹ ٹِک کننگاسس۔
اینو بیگہ نا کوئٹہ مغربی بائی پاس آ گیس نا بھلا لین ءِ تراک ئٹ بُھس کننگا۔
ایلو پارہ غان ضلع کیچ ئنا علاقہ زامران ئٹ درو سہب ئنا پاکستانی لشکر ءِ اسہ بمب تراک اسیٹی ٹِک کننگا۔
زامران نا علاقہ پگنزان ئٹ فورسز نا پند آ ہنوک کارندہ غاتے ٹک کننگا۔ آزاد حوالی نا رد ئٹ تراک ئٹ اِرا کارندہ مرگ ئنا گواچی مسنو واہم کوالخواک دا باروٹ دائسکان ہچو احوال فراوان کتنو۔
اندا وڑ گوادر و تربت نا نیامی علاقہ دشت ئٹ پاکستانی لشکر نا قافلہ غا مروک جلہو ئٹ اِرا کارندہ مرگ ئنا گواچی و چار ٹپی مسنو۔
شابیتی حوال تا ردئٹ گوادر و تربت نا نیامی علاقہ دشت ئٹ تلور نا شکار کروک عرب شیوخ آتے رکھ تروک پاکستانی لشکر نا گاڑی ءِ بمب ئٹ ٹک کننگانے۔
جلہو ئٹ ایف سی نا نائیک زمان و لانس نائیک عمر ظہور مرگ ئنا گواچی اندن نائیک نعیم، سپاہی جاوید، سپاہی امین و سپاہی وحید بھاز ٹپی مسنو۔
ٹپی آتے دمدستی ہیلی کاپٹر نا وسیلہ ئٹ دننگانے واہم حوالکار آک ٹپی آتا حالیت ءِ نازرک پاننگ ءُ۔
خیال ئٹ مرے اینو بلوچ لبریشن آرمی نا سروک جنرل اسلم بلوچ و سنگت آتا سال دے آ مچا بلوچستان ئٹ سیکورٹی ہائی الرٹ کننگانے وختس کہ نوشکی تون اوار کہیی علاقہ غاتیٹ موبائل نیٹورک آتے بند کننگانے۔