کوئٹہ نا علاقہ دے کہی بائی پاس ئٹ سوئی گیس پائپ لائن ءِ تراک ئٹ بھس کننگ نا مقدمہ سی ٹی ڈی تھانہ ٹی درج کننگانے۔
سی ٹی ڈی کالخواہ تا رد ئٹ مقدمہ نا درست آ ڈوہ دار آتا برخلاف درج کننگانے، ہراٹی انسداد دہشت گردی ایکٹ و ایلو دفعہ غاک اوار کننگانو، ڈوہ دار تا پٹ سٹ و تدینی نا پٹ و پول سی ٹی ڈی نا پارہ غان برجا ءِ۔
یاتی مرے کہ تدوکا دے تیٹ، کوئٹہ نا دے کہی بائی پاس آ نا درست آ سلہہ بند بندغ آک گیس پائپ لائن ءِ بمب ئٹ ترخفیسر، ہرانا سوب آن سوئی گیس نا فراوانی کوئٹہ شار، زیارت و پیشن نا جتا علاقہ غاتیٹ بند مس۔
کالخواہ تا رد ئٹ گیس ئنا فراوانی ٹی ہڑاند مننگ آن گڈ زیمی آ لائن آتا جوڑ کننگ نا کاریم برجا ءِ۔
یاتی مرے کہ پن کروک جلہو نا ذمہ واری ءِ بلوچ لبریشن آرمی ارفینے۔
گًل ئنا ترجمان جیئند بلوچ تدوکا دے میڈیا ءِ گداروک تینا بیان ئٹ پارینے کہ سرمچارک اسہ آپریشن ئسے نا وخت آ دے کہی بائی پاس ئٹ گیس پائپ لائن ءِ تراک ئٹ بھس کریر، پن کروک کاروائی نا وخت آ بی ایل اے کوئٹہ تون اوار بلوچستان نا جتا ضلع غاتیٹ پین 8 جلہو آتا ذمہ واری ءِ ارففیسس۔