بلوچستان نا ضلع پنجگور و گوادر آن پاکستانی لشکر چنک سن مار اسیتون اوار اِرا بندغ دزگیر کریسہ بیگواہ کرینے۔
بلوچستان نا ضلع پنجگور آن پاکستانی لشکر چھاپہ خلیسہ سینزدہ سال نا چنک سن مار ئسے دزگیر کریسہ بیگواہ کرینے۔
بیگواہ مروک نا چاہنداری صبراللہ نا مار بالاچ نا پن ئٹ مسنے ہرادے 10 دے مُست اونا اُرا غان زوراکی ئٹ بیگواہ کننگاسس۔
علاقائی حوالکار تا ردئٹ دزگیری نا وخت آ پاکستانی فورسز آک اوڑا بیدادی ہم کریر و ٹپی حالیت ئٹ اودے تینتون اوار دریر۔
اندن پاننگک کہ داڑان مُست ہم فورسز آک اونا اُرا غا چھاپہ خلکنو اُرا ٹی گڑا تے ہم پرغانو، تدوکا توہ ئٹ اندا اُرا نا مونا اِرا چغلی بمب ہم خسنگاسس واہم ہچو نسخان متوسس۔
حوالکار تا پاننگ ءِ کہ پاکستانی فورسز آک ہر وخت دا اُرا غا چھاپہ خلیرہ و خاہوت ءِ بھیم ئنا گواچی کریسہ کیرہ۔
ایلو پارہ غان بلوچستان نا دریابی شار گوادر آن پاکستانی لشکر اسہ بندغ ئسے دزگیر کریسہ بیگواہ کرینے۔
بیگواہ مروک بندغ نا چاہنداری فضل بشیر نا پن ئٹ مسنے ہرا کیچ ئنا علاقہ حیرآباد نا ہندی ئسے۔
پن کروک بندغ ءِ پاکستانی لشکر 23 دسمبر آ دزگیر کرے ہراڑان پد او بیگواہ ءِ۔
خاہوت فضل نا آجوئی نا خواست کریسہ پارے کہ بندغی حق آتا ادارہ غاک اونا آجوئی کن تینا کڑد ءِ سر ایتر۔