فتح اسکواڈ نا سنگت وشین
نوشت: ملا امین بلوچ
براہوئی مٹ: دیار زیب بلوچ
دی بلوچستان پوسٹ
آجوئی نا جہد ئٹ بھاز آ سنگت آک دا کسر ئٹ اوار مریرہ، تینا لمہ ءِ وطن تون وفاداری و مخلصی نا جوزہ دافتے دا سخت انگا کسر ٹی ہتننگ آ تیار کیک، ہرا تینا زند ئنا کل آسراتی و غٹ خوئشی تے گیرام کیرہ و دا کسر ءِ گچین کیرہ۔ اندا فیصلہ داتے سرسہب کیک، گڑا او تینا مسخت ءِ ہلنگ آ سرسہب مریرہ، یا کہ مدام ندر مریرہ، دا نزور انگا بندغ تا وس ئنا ہیت ئس اف، ہر اسٹ دا کسر ئٹ سلنگ کپک و بھاز آم زوت دا کسر آن دمدرینگرہ، دا سخت انگا کسر ءِ گچین کروک آتیٹی ننا ہم کسر انگا سنگت شہید وشین ہم ئس۔
ای تینٹ شہید وشین ءِ داخس خُڑک آن درست کتویٹہ انتئے کہ او مالو خواننگ ئس سنگت آتا پاننگ نا ردئٹ شہید وشین 2019 آ منہ دے بولان آ ملنگ کن بسس و تربیت ہلکسس و اوکان گڈ واہل خواننگ ءِ تینا ایسر کننگ کن اناسُس، شہید وشین نا سیال و تینا بھاز آ بندغ آک پاکستانی ریاست نا بشخ ئسر، اندا بابت ئٹ دادے ہم تنظیم نا پارہ غان موکل رسینگا کہ او ہم پاش وڑئٹ ریاست نا ادارہ تا بشخ مرے، اندا وخت او اِرا وار پاکستانی فوج ئٹ اوار مننگ کن درخواست جمع کرے ولے ریاست شہید وشین نا سوچ و فکر آن سرپند ئس دا نا درخواست ءِ قبول کتویر۔
مارچ 2021 ئٹ او دوارہ بولان آ بس سنگت آتا پاننگ نا ردئٹ دا وار او باز بدل مسس۔ شہید وشین قوضہ گیر ریاست نا ظلم و زوراکی تیان سخت غصہ ٹی ئس، او شہید حیات و شہید بانک کریمہ و ایلو شہید آ تا ہیت ءِ کریکہ، ہرا کہ ظالم آ ریاست نا ظلم آتا گوچی مسوسر، بے سلہہ و پرامن بندغ تا شہادت آک دادے مچ بدل کریسر او پاریکہ کہ توفک آن بیدس نن تون پین ہچ ئس سلتنے ننا غٹ کسر تے بند کننگانے۔ او بھاز جزباتی ئس داکان مُست وشین ءِ اوار راشن کن دروئی ئس ولے داسہ دادے اڑسار انتئے کہ وشین خلق آن پوسکن بسس او پند کننگ آ دمدرنگاکہ، گڑاس سنگت پاریر کہ وشین مش آ سلنگ خواہپک، اندا بابت ئٹ او دے تورنگا کہ اوار راشن کن امپ۔
16 اپریل آ ننا اوڑدہی اسہ ڈھکوک ءُ جاگہ اسیٹی مس و عام دیوان ئس مس و بیرہ وشین آن دا سوج کننگا کہ سنگت نی زو شہر آ تو امپیسہ؟ گڑا وشین ورندی تس کہ نہ ماما ای ہنداڑے کُٹ زو شہر آ ہمپرہ ننا شہر بولان ءِ او راجی جہد ئنا بابت ئٹ و ورنا انگا زنک نا سوچ و تاثرات آتا ردئٹ ننے پنت تسکہ کم و ود نن نا دے بجہ غا نن خاچنگ کن انان انتئے کہ نن اسہ وڑ مُسہ ہفتہ آن پند کریسن بیرہ وشین تون ملنگ کن بسوسن۔ ایلو سہب نن اڑتماک رینج کن پیشتمان او کنے آن تحریک نا بارو ئٹی وار وار آ سوج کریکہ و ای ہم او نا ہر سوج نا ورندی نا تننگ نا کوشست ءِ کریٹہ تانکہ وشین ءِ سرپند کیو کہ او نادرست ءُ کسر ئسے آ امپ ۔ شام نا پدا اوتاک آ سر مسن و ای تینا جیب آن موبائل ءِ کشاٹ و شہید وشین ءِ تنظیم نا ہدایتی کتاب (چیدہ) ءِ خواننگ کہ تسٹ، کم و ود اسہ گھنٹہ ئسے آن گُڈ شہید وشین نن تون حوالی مس و پارے کہ ماما فون نے فارغ ءِ ای پرپند ءِ تسلی ٹی خوانیوہ؟ ای پاریٹ جی ماما فارغ ءِ، گڑا شام نا وشین پدا موبائل ءِ ننے تس و ننا کیب آ توس گڑا ای سوچ کریٹ اوڑان خواناس تہ؟ او ورندی تس جی ہئو، ای واہ سوج کریٹ انت پو مسوس، وشین مخسہ پارے ماما نم بھلو سفر ئس طے کرینرے دا گڑا ننا بروک آ زنک آتیکن گواچنی چیدہ ئسے و ای ام مخسہ ”منتوار نما کہ راج ننے پو مننگے“ اندا دے آن پد وشین ننتون اوار مس، او نن تون گپ کریکہ، مخاکہ مسخرہ کریکہ۔
مئی نا دو تاریخ آ نن غٹ سنگت آک اسہ جاگہ غا یکجاہ مریسہ کرین، کمانڈر فرید، کمانڈر ازل، کمانڈر چئیرمین، کمانڈر تاجو، کمانڈر اسلم، کمانڈر میرو، کمانڈر رئیس غُٹ تینا سنگت آتیتون یکجاہ مسُون ہراڑے ننے انڈیس ایریا آ پاکستانی فوج نا اسہ کیمپ ئسے آ جلہو کروئی ئس، اندا وخت آ حوالی حوال تس کہ زرین ڈوک نا پارہ غان پاکستانی فوج گام خلنگ ءِ مرکزی کمانڈر نظر تخنگ نا پنت کرے و خیالداری ءِ زیات کرے۔
ایلو پشیم آ دوارہ حوالی حوال تس کہ قوضہ گیر فورس ریڈ زون ئٹ پترنگنگ نا کوشست کننگ ءِ، اندا وخت غُٹ سنگت آک اسہ جاہ مریسہ کریر تانکہ فوج ءِ پلویڑ کین، ہر اسہ سنگت کمانڈر آن خواست کریکہ کہ کنے جنگ کن موکل ایت، اندا وخت آ شہید وشین کمانڈر تاجو ءِ پارے کہ ای ہم جنگ کن کاوہ کنے موکل ایت ولے وشین ءِ موکل رسینگتو انتئے کہ باسُنی زیات ئس ایلو داکان بیدس اسپیشل اسکواڈ نا سرمچار آک جنگ کن راہی مسوسر، کم و ود سئے بجہ نا وخت پاکستانی لشکر بیک اپ کرے و ایلو ننکان اندا چیک پوسٹ آتیا قوضہ کننگا و فوجی مڈی تیا قوضہ کننگا پدا خیر ئٹ واپسی مس۔
ایلو سُہب ئنا پاکستانی لشکر نا ہیلی کاپٹر آک لشکر کشی کن علاقہ آ کمانڈو تے شیف کریر و غٹ سنگت آک دانگ ہینگ مسر و قوضہ والا معاملہ پدا سلیس، او مُسہ دے لشکر کشی آن پد نن وا اسہ جاگہ یکجا مسون و جنگ کن روان مسون و مسہ دے اسہ وڑ پند آن پد ہمو جاگہ آ سر مسون۔
جنگ ئنا کمانڈ کمانڈر رئیس نا زمہ واری آ ئس او فیصلہ کریسس کہ فتح اسکواڈ نا سنگت آک کُل آن مون ئٹ مریرے، شہید وشین اندا وخت ئٹ فتح اسکواڈ نا باقاعدہ سنگت اس مسس او دا جنگ ئٹ شہید وشین ءِ کمانڈر اسلم نا ٹولی ٹی فتح اسکواڈ نا سنگت آتیٹ اوار مننگ نا شرف رسینگاسس۔ او بھاز خوش ئس و تینا کلاشنکوف آ گرنیڈ لانچر ئس فٹ کریسس و ہشت گولہ تینتو ارفہ و جنگ کن روان مس۔ ظاہر ءِ کہ گچین کروک آ جاگہ باز مُر ئس ؤ غٹ سنگت آتے کیموفلاج مروئی ئس و سفر نا بھلا بشخ ءِ ننکان کروئی ئس۔
31 مئی بیگہ نا 6 بجہ و 36 منٹ آ اول کور دژمن نا سنگر آ سم کاری کرے و فتح اسکواڈ نا سنگت آک تینا مزل کن سر الکر و کم و ود 9 منٹ ئٹی کمانڈر اسلم و شہید لیلا دژمن نا اولیکو سنگر آ قوضہ کریر۔ داکان پد اڑتما کنڈ آ جنگ بنا مس و شہید سارنگ اول سر دژمن نا سم تا شِست ءِ بنا کرے اوکان پد شہید وشین اسہ رنگ گرنیڈ لانچر ئٹ گولہ خلیسہ کرے۔ داکان پد شہید وشین دژمن نا سنگر تا تہٹی پترینگا نن ایلو پارہ غا جنگ ئٹ اختہ ئسون کہ ناگمان آن مخابرہ (واکی ٹاکی) آن توار بس کہ وشین ٹپی مسونے۔ گُڑا ننے تینا سنگر تے الوئی تما و نن پوسٹ نا جاندمی کنڈ آن شمالی پارہ غا بسون ہراڑے وشین ٹپی حالیت ئٹ تموک ئس و دترک وہارہ اوڑان، او ننا توار ءِ بننگ ئس، سنگت آک سیم ءِ پرغسہ ایپار مسر گڑا وشین کوک کرے کہ ماما تہٹی بفیرے نمے خلیک بڑوا ولے سنگت آک سلتویر و وشین ءِ اونا توفک تون اوار پیشن کشار، وشین پورا تینا سار ئٹ ئس او ننتون ہیت کریسہ پارے کہ ”ماما سنگتاتے پا کہ کنکے فریشان مفیرے اللہ خیر کیک“ سنگت آک وشین ءِ ارفیر پدی دریر و نن وا جنگ ئٹ اختہ مسون، دہ پانزدہ منٹ آن پد دوارہ مخابرہ آ توار بس کہ وشین ننے آن رخصت کرے و شہید جنرل اسلم و ایلو شہید آتیتون اوار مس، گڑا نن ہکل کرین کہ شہید آتے داکان دبو ولے اندا وخت آ اسہ سنگت ئس رُمب کریسہ بس کہ وشین وصیت کرینے کہ ننا جون تے انداڑے الیرے تانکہ ننا خاہوت آک ننا جون تے دوئی کیر، گڑا نن ہکل کرین کہ نن خواپنہ شہید وشین نا لمہ دژمن نا مون آ خوار مرے، و غٹ سنگت آتا اصل وارث تو نم کُل سنگت آک اُرے، گڑا انت نم تینا ایلُم تا جون تے دشمن نا دوٹی تیرے؟ تاکہ دژمن اوفتا خن تے کشے؟ اسُل ہم نہ تینا سنگت آتے انتئے الین، گڑا انبو شہید آتا جون تے داکان دبو ای غصہ ئٹ پاریٹ کہ نن تینا ہیرو تے دشمن نا دوٹی تفنہ شہید آتے ارفبو، گڑاس سنگت شہید آتیتون اوار روان مسر دائسکان جنگ چلنگاکہ کہ توار بس ”لیلا ٹپی مسنے دادے سمبھالبو“ گڑاس سنگت لیلا ءِ سمبھالنگ کن رُمب کریر و ایلو سنگت آک دشمن نا کیمپ ءِ قوضہ کننگ اسکان جنگ کریسہ کریر۔
کیمپ ئٹ قوضہ و اوٹی ساڑی کل کارندہ تے کسفنگ آن پد شہید آتا جون و ٹپی آ سنگت لیلا تو ہمراہ واپس مسون، گڑا ہمو ننکان اُرے مسس، کسر ئٹ لیلا ءِ دوا تننگا ولے لیلا نمن کریسہ کرے کہ تینے تکلیف کپبو، کم و ود نن ئنا یک بجہ آ نن کُل سنگت آک یک جاہ مسون و نن شہید وشین و شہید سارنگ ءِ ڈغار نا باہوٹ کننگ ئسون کہ کمانڈر میرو حوال تس کہ لیلا ہم ننے آن رُخصت کرے و وشین و سارنک تون اوار مس، گڑا نن ہر مسٹ انگا شہید آتے بولان نا مش تا ڈغار نا باہوٹ کرین و اوکان پیشتمان۔
اندُن شہید سارنگ، شہید وشین، و شہید لیلا ننے آن جسمانی وڑئٹ رخصت کریر ولے فکری بابت او مدام نن تون اوار ءُ، شہید آک ننا کوپہ نا باریم ءِ گیشتر کریر و ننے پین زمہ واری تسر کہ اوفتا مشن ءِ مونی دین، دا زمہ واری بیرہ مش تیٹی سرمچار تا زی آ فرض اف بلکن دا زمہ واری تیوہ انگا راج و خاص وڑئٹ ورنا تیا حق مریک کہ او شہید آفتاب، شہید سارنگ، شہید لیلاوُ ایلو ہزار آ شہید آتا ارمان تے پورہ کننگ کن نن تون اوار مریر و وطن نا آ جوئی کن تینا بشخ ئنا کاریم تے کیر تاکہ شہید آفتاب آنبار انگا شہید تا دترک زوال مفس۔
شہید آک بیدس لالچ و غرض آن تینا جوان انگا زند آتے بروک آ زنک نا گچین آ بروک آ وخت کن قربان کریر، و داسہ دا نما زمہ ٹی ءِ کہ نم تینکن ہرا زند ءِ گچین کیرے، اسہ زند ہمودے ہرا ٹی مخنگ، شرم و بے شرفی ارے، ایلو زند دادے کہ اوٹی ایلو بندغ تا آجوئی ءِ، ہراٹی نی مرگ آن پد ہم زندہ مریسہ، او زند وشین، سارنگ و لیلا نا زند ءِ۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔