21 فروری لمئی بولی تا جہانی دے نا ردئٹ بلوچ اسٹوڈنٹس کونسل ملتان و رژن ریڈرز کلب کردگاپ نا پارہ غان مجلس اڈ تننگا۔
بلوچ اسٹوڈنٹس کونسل ملتان نا سروکی ٹی 21 فروری آ لمئی بولی تا جہانی دے نا ردئٹ اسہ علمی و فکری سیمینار اس اڈ تننگا، ہراٹی بلوچی، براہوئی و کیتھرانی بولی تا اہمیت، لسانی مڈی و اوفتا رکھنگ نا خواست آتیا ہیت کننگا۔ زبان ہر راج ئنا فکری، تہذیبی و دیہاڑی پجار ءِ۔ اسہ بولی ئسے نا گم مننگ بیرہ لوز آتا گم مننگ اف بلکن اسہ تیوہ ءُ تہذیب، طرز فکر و اشتماعی دامش نا زوال ءِ۔ لمئی بولی تا رکھنگ و تالان کننگ نئے بیرہ دود و ربیدئی پوسکنی ءِ برجاء تخنگ کن المی ءِ بلکن فکری آجوئی، تخلیقی درشانی و راجی وحدت کن ہم بنماسی ہند تخک۔
بلوچ اسٹوڈنٹس کونسل ملتان نا پاننگ ءِ کہ دا سیمینار ورنا غا نسل ئٹ لسانی شعور ودی کننگ، لمئی بولی تا علمی و ادبی تالانی نا گرج ءِ پاش کننگ و راجی مڈی تا رکھنگ نا اشتماعی ذمہ واری نا احساس تننگ نا بابت اسہ اہم گام اس مس۔
اندا وڑ درو 21 فروری آ لمئی بولی تا جہانی دے نا ردئٹ رژن ریڈرز کلب کردگاپ نا پارہ غان اسہ مجلس اس اڈ تننگا ہراٹی علاقہ نا جتا بندغ آک بشخ ہلیسہ لمئی بولی تون مہر ئنا درشانی کریر۔
مجلس نا بناء قرآن نا تلاوت آن مس ہراٹی بی بی ضحی نظر ءِ تلاوت نا شرف دوئی مس۔ مجلس نا شونکاری ءِ رزاق بلوچ ایسری تس۔ اسامہ سیف بلوچ اسہ مکالہ اس ”لمئی بولی تا جہانی دے“ نا سرحال آ خوانا۔ اندا وڑ اسہ زالبول اس تینا خیال آتے شاعری نا دروشم ئٹ مونا ایس۔
مجلس نا ایلو بشخ پینل ڈسکشن ئس ہرانا موڈریٹر خواجہ ظہیر و پینلسٹ آک شاعر و ادیب جمیل فاکر و لسانیات نا خوانندہ مقصود ئسر۔ خواجہ ظہیر اوفتیان لمئی بولی نا زی آ جتا ءُ سوج کرے و اوفک است جمی ئٹ ورندی تریسہ کریر۔
پینل ڈسکشن آن پد مشاعرہ نا بشخ بنا مس ہراٹی جتا بندغ آک لمئی بولی نا بابت تینا شاعری تے بِنفیر۔ اندن مجلس نا ایسری بشخ بلوچی چاپ ئس ہراڑان پد مجلس ایسر مس۔