بلوچستان نا علاقہ پسنی، کوئٹہ و تربت آن پاکستانی لشکر پین مُسہ بندغ ءِ دزگیر کریسہ بیگواہ کرے۔
شابیتی حوال تا ردئٹ ضلع گوادر نا علاقہ پسنی ٹی پاکستانی فورسز سی ٹی ڈی نا کارندہ غاک اسہ اُرا ئسے آ چھاپہ خلیسہ ورنا ئسے دزگیر کریسہ زوراکی ئٹ بیگواہ کریر۔
بیگواہ ورنا نا چاہنداری سخی بخش نا مار شوکت نا پِن ئٹ مسنے، ہرا پسنی نا علاقہ ببر شور نا ہندی ئسے۔
حوالکار تا ردئٹ شوکت ءِ 14 اپریل نا نن دزگیر کننگ آن پد زوراکی ئٹ بیگواہ کرینو۔
ایلو پارہ غان منگچر نا ہندی ماہ دیم بلوچ نا پاننگ ءِ کنا ایلم ڈاکٹر نصیر نا مار سلال ءِ اینو پاکستانی لشکر نا کارندہ غاک ننا خاہوت نا مون آن زوراکی ئٹ بیگواہی نا گواچی کریسہ ننے اذیت ئٹی شاغانو۔
اونا پاننگ ئس کہ اینو اودے ہموتم زوراکی ئٹ بیگواہ کننگا ہراتم ننا خاہوت عئید آن پد منہ ساہت کن پکنک نا ردئٹ چلتن (کوئٹہ) نا پارہ غا ہناسن۔ نن تینا خاہوت تون ہموڑے ئسون کہ اِرا ویگو گاڑی بسر و ننا خن تا مون آن ننا ہفتدہ سال نا ایلم زوراکی ئٹ بیگواہی نا گواچی کریر۔
او پارے کہ ریاستی تادی ءِ اُربو کہ ریاست داسہ خاہوت آتیا پاش جلہو کننگ ءِ۔ کنا ایلم ہرا سیکنڈ ایئر نا خوانندہ ئسے۔
ماہ دیم بلوچ ریاستی ادارہ تیان خواست کریسہ پارے کہ نن ریاستی ادارہ تیان خواست کینہ کہ ننا ایلم ءِ آجو کیر یا اودے عدالت ئٹ ہتیر۔ ایلم نا زوراکی ئٹ بیگواہی نا برخلاف نن ہچ وڑ آ چپ مروفن۔
اندن کیچ آن رسینگوک حوال تا ردئٹ اینو 15 اپریل 2025 آ استو یک بجہ غا پاکستانی لشکر بلوچستان نا علاقہ تربت نا ہند جوسک آن شیرخان نظر ءِ دزگیر کریسہ نادرست ہند آ درینے، خاہوت اونا رکھوک آجوئی نا خواست کرینے۔