افغانستان نا وزیر داخلہ پارینے کہ ملک نا دے ٹکی صوبہ تیٹ استو مارنگوک زمین جمب آن صوبہ کنڑ ئٹ 622 بندغ کسکنو اندن اسہ ہزار آن زیات ٹپی مسنو۔
افغان کوالخواک پاریر کہ رپورٹ آتا ردئٹ ہندی بندغ و کمکار ٹولیک دائسکان ہم مِش تا شیف آن کشنگ و ٹپی آتا کمک ئٹ اختہ ءُ۔
کوالخواہ تا ردئٹ پک مفروک کچ و حساب آک پارہ کہ دا زمین جمب ئٹ 2000 آن زیات بندغ ٹپی مسنو اندن درزن آک دائسکان گم و گار ءُ۔
وزیر داخلہ و زیر دفاع تینٹ ہم کمکی کاروائی تیٹ بشخ ہلکنو و ٹپی آتے ہیلی کاپٹر و گاڑی تا ذریعت ئٹ کنڑ، ایلو صوبہ و کابل نا اسپتال آتے اسکان دریسہ ءُ۔
استو (پاکستانی وخت نا ردئٹ کم و ود 12:30 منٹ آ) پاکستان و افغانستان ئٹ زمین جمب نا چنڈیک مارنگار، ہرافتا ترندی شش ریکارڈ کننگاسسس۔
پاکستان ئٹ زمین جمب بنجائی شار اسلام آباد ایب کیب نا علاقہ و خیبر پختونخواہ نا کیہی ضلع تیٹ مارنگا۔
پاکستان نا محکمہ مُد نا نیشنل سیسمک مانیٹرنگ سینٹر حوال تس کہ زمین جمب ننکان دو بجہ ہژدہ منٹ آ مس و اونا بنجاہ جاندم دے ٹکی افغانستان ئس۔
زمین جمب نا چنڈیک کوہ ہندوکش ئٹ ڈغار سطح آن 15 کلو میٹر شیف ریکارڈ کننگار۔
پشاور، مردان، مری و ایب کیب نا علاقہ تیٹ ہم زمین جمب نا ترند چنڈیک مارنگار ہراڑان بندغ آتیٹ بھیم تالان مس و اُرا تیان پیشتمار۔ اندا وڑ نا حوال آک چکوال، ٹیکسلا، واہ کینٹ و لاہور آن ہم رسینگانو۔
واہم پاکستان ئٹ دائسکان بھلو نسخان یا جانی نسخان نا حوال رسینگتنے۔ پدان زمین جمب ءِ اُروک بنجاہ اسلام آباد، راولپنڈی، چترال و پشاور ئٹ آفٹر شاکس نا حوال ہم تسنے۔
بھاز آ حوال تا ردئٹ زمین جمب نا چنڈیک انڈیا نا منہ بشخ آتیٹ ہم مارنگار۔
کابل بست و بند نا ردئٹ افغانستان ئٹ زمین جمب پاکستان نا صوبہ خیبرپختونخوا تون گنڈوک دے ٹکی صوبہ کنڑ ئٹ کل آتیان زیات مارنگا۔
کابل بست و بند نا رپورٹ نا ردئٹ صوبہ کنڑ ئٹ چوکی نا یوہ گل و نورگل نا مزار درہ غا ہنوکا کسرک مَش تا تمنگ نا سوب آن بند مسنو، ہراڑان کمکی کاروائیک زہمی مریسہ ءُ۔
افغان کوالخواہ تا پاننگ ءِ کہ مرگ و ٹپی آ تا دا کچ و حساب ایسری اف انتیکہ مُر ئنا علاقہ تیٹ دائسکان ہندی بندغ آتیتون حوال برجاء ءِ و کمکی ٹولیک ہموڑے سر مننگ نا کوشست کننگ ءُ۔
بھاز آ حوال تا ردئٹ زمین جمب نا چنڈیک دائسکان ہم دیخس ساہت آن پد محسوس مریسہ ءُ۔