ایس سی او سمٹ بنجائی درشان – ٹی بی پی سرگپ
شنگھائی تعاون تنظیم نا بیست و پنچمیکو سربراہ ملک آتا کونسل مجلس نا بیان ئٹ بلوچستان نا ضلع خضدار ئٹ اسکول بس آ جلہو و ڈھاڈر ئٹ جعفر ایکسپریس ءِ بندی کننگ نا مذمت کننگانے۔ دا بیان ئٹ بلوچ راجی تحریک ءِ دہشت گردی تون گنڈنگ نا کوشست کننگانے ہرا بلوچستان نا زمینی گواچنی تا جوان کوالخوائی اف۔ ہفت دہائی آ تالان بلوچ تحریک بیرہ بیدادی آ تالان کاریم اس متنے بلکن دا راجی حق، آجوئی و تینٹ خواجئی نا جہد ئسے، ہرادے دہشت گردی ٹی شاغنگ گواچنی تے لتاڑنگ نا برابر ءِ۔
پاکستان نا سر وزیر شہباز شریف مجلس ئٹ تران کریسہ دعویٰ کرے کہ پاکستان ساندہ بھاز آ پِڑ تیا، گپ و تران و سفارت کاری آ باور تخانے۔ ولے گواچنی دادے کہ بلوچستان نا نیستی ٹی اسلام آباد ساندہ گپ و تران نا جاگہ غا فوجی طاغت نا کاریم ئٹ ہتنگ ءِ اہمیت تسنے، ہرا پاکستان نا پالیسی تیٹی کڑمب انگا تضاد ءِ پاش کیک۔ بنجاہ نا بیان آک و بلوچستان ئٹ برجاء عملی گام تا نیام ئٹ دا فرخ پاش کیک کہ ریاستی رویہ تہہ ئٹ طاغت و بیدادی آ تالان ءِ اندن جہانی تلہ غاتیا ایمنی و اواری نا ہیت کننگک۔
جہانی تلہ غا بلوچ جہد ءِ دہشت گردی گوندنگ نا مہم زمینی حالیت آتے بدل کننگ ئٹ سرسہب مننگ کپک انتیکہ دا تحریک تینا بنماس ئٹ ہندی ءِ۔ پیشن نا بندغ آتا اوار مننگ یا مفننگ آن زیات، دا جہد ئنا روتہ غاک بلوچ چاگڑد و اونا دیہاڑی شکائست آتیتون خلوک ءُ۔ بلوچ آجوئی کن کاریم کروک سلہہ بند تنظیم آتیا جہانی رکھ ہم خلنگانے، ولے دا رکھ آتیان تحریک نا ڈھانچہ ءِ نزور کننگ نا جاگہ غا بھاز وخت دا تنظیم آک گیشتر سوگو مریسہ مونا بسر۔ داڑان پاش مریک کہ پیشن نا زور تحریک ءِ زہمی کتو۔
بلوچ راجی تحریک ءِ شنگھائی تعاون تنظیم کن بھیم گوندنگ اصل ئٹ پاکستان نا ودی کروک ئسے، ہرانا مسخت جہانی ہمدردی و مخ تفی دوئی کننگ ءِ۔ گواچنی دادے کہ بلوچستان ئٹ برجاء جہد نا مسخت اسہ پیشن نا ریاست یا خطہ نا برخلاف اف بلکہ تینا مڈی و ڈغار آ تینٹ خواجہ مننگ نا ءِ۔ اندا پالو اودے دا خطہ نا ایلو تنازعہ تیان جتا کیک و اودے بیرہ ”دہشت گردی“ نا بیانیہ ٹی کننگ بے گواچن دوست رویہ ئسے۔