بلوچستان نا ضلع خضدار نا علاقہ نال ئٹ سلہہ بند بندغ آک شش گھنٹہ اسکان کنٹرول ءِ تینا برجا تخار و پولیس چوکی، تعمیراتی کمپنی نا کیمپ و کسر آ ناکہ بندی کریسہ کیہی گاڑی و سلہہ تے کوزہ کریر۔
ہندی احوال کار آتا رد ئٹ، بلوچ آزادی پسند آک سی پیک کسر نا جتا انگا جاگہ تیا ناکہ خلیسہ سنیپ چیکنگ نا لڑ ءِ برجا تخار۔ آزادی پسند آک پولیس چوکی آ کوزہ کریسہ اوڑے ساڑی آ مڈی و پولیس نا گاڑی تے کوزہ ئٹ تینا ہلکر۔
مستی سلہہ بند بندغ آک کیہی بوزر گاڑی تے ہشار و پولیس نا مُسہ گاڑی ءِ ارفیر۔ نال ئٹ کلیڑی نا ہند آ ڈی بلوچ تعمیراتی کمپنی آ ہم جلہو کننگا و کیمپ ئٹ مشینری تون اوار ہشار۔ او وخت 13 بندغ ءِ دزگیر کریر۔
اسہ ہم سلہہ بند تنظیم نا پارہ غان دسکان دا جلہو نا بابت ئٹ ہچو بیان اس مون آ بتنے، واہم ہندی احوال کار آتا رد ئٹ جلہو کار آتا تعلقداری بلوچ آزادی پسند تنظیم آن ئس۔