ریاستی بے سہبیک – ٹی بی پی سرگپ
بلوچستان نا سیاسی ہند آ مسلط کروک اقتدار ئٹ تولوک حکومت دا گمان کرینے کہ داڑے غٹ ویل آتا ایسری حوالکاری سروس نا بند کننگ و دفعہ 144 نافذ کننگ ئٹ ءِ۔ 6 نومبر آن بلوچستان حکومت تیوہ بلوچستان ئٹ 30 دے اکن دفعہ 144 نافذ کرینے، ہراٹی جلسہ جلوس، تولوک برانز و پنچ آن زیات بندغ نا مُچ مننگ آ رکھ خلوک ءِ۔ ریلوے سروس وختی آن بند ئس، و داسہ ٹرانسپورٹ اتھارٹی 12 آن 14 نومبر اسکان ٹرانسپورٹ سروس ءِ بند کرینے۔ حکومت رکھ ئنا خُلیس آتے بنیاد جوڑ کریسہ بلوچستان نا سی آن زیات ضلع تیٹ انٹرنیٹ سروس ءِ ہم بند کرینے۔
بلوچستان نا متنازع سر وزیر سرفراز بگٹی ہر ارٹمیکو دے آ دا دعویٰ کیک کہ بلوچستان ئٹ ریاستی رٹ بحال مسنے و اہم کسرک رکھوک ءُ۔ واہم دا گام تیان کرفیو کون آ حالیت ءِ ودی کریسہ حکومت تینا بے سہبی ءِ ڈھکنگ نا کوشست کننگ ءِ۔ الس نا زند ئنا بنداوی خواست آتیا رکھ خلیسہ بلوچستان نا الس نا ہڑدے ئی زند، پوریا و خواننگ ءِ بھاز زہمی کریسہ ءُ۔ حکومت نا دن انگا گامک آجوئی کن کاریم کروک ادارہ تیا زہم شاغنگ نا جاگہ غا بیرہ السی سختی تیٹی ودکی نا سوب جوڑ مننگ ءُ۔
آجوئی کن کاریم کروک سلہہ بند تنظیم آتا کاروائیک تیوہ بلوچستان ئٹ ودانو۔ بلوچستان ءِ سندھ، پنجاب و ایران تون گنڈوک کسر تیا دا تنظیم آتا ناکہ بندیک چرجوئی ئٹ برجاء ءُ۔ پاکستانی لشکر آ بھیم بش کروک جلہو تیٹ ودکی مسنے و بلوچستان ئٹ جہانی ڈٹ بندی تا بے سہبی نا نشانیک پاش ءُ۔ دا خراب حالیت آتیٹ بلوچستان حکومت و حکومتی بندغ آتا دعویٰ غاک زمینی گواچنی تا ردئٹ افس۔
آجوئی دوست آتیتون تفوک اہم دے تیٹی تیوہ بلوچستان ئٹ فوجی کاریم تیٹ ودکی خننگ ئٹ بریک۔ واہم حکومت نا دن انگا فیصلہ غاک، ہرافتیان لس مخلوق نا زند زہمی مریک، حالیت آتے جُوان کننگ ئٹ کمکار پاش مننگ کپسہ۔ اگست نا توہ ئٹ انٹرنیٹ سروس تے بند کریسہ و دفعہ 144 نافذ کریسہ اندا ڈول نا کاریم کننگاسس، ہر اڑان آجوئی دوست آتا کاروائی تیا ہچو پاش ءُ زہم اس تمتو۔ بلوچ راجی مزاحمت نا ترندی ودیسہ ءِ و دن انگا مصنوعی گامک دا جنگ ئنا تہوش ءِ کم کننگ ئٹ ہچبر سرسہب مروفس۔