وطن کن مہر
تحریر: مہر جان
دی بلوچستان پوسٹ
اینو نا دا وخت ئٹ ہر اسٹ نا مہر وطن تون خننگ ئٹ بریک انتئے کہ او تینا دُژمن ءِ سرپند مریرہ، و اونا ہر زوراکی ءِ خنرہ، او دا ہم پہہ مریرہ کہ ننا راج اسہ مڈی آن پُر ءُ ڈغار ئسے نا خواجہ ءِ ولے نن تینا مڈی تیان آسودئی خمپنہ، انتئے؟ انتئے کہ او دوشہ نا وڑ ننا مڈی تا زی آ تولوک ءِ تینا پِڈ ءِ پُر کننگ ءِ تینے آسودہ کننگ ءِ تینا پنجابی مخلوک ءِ آسودہ کننگ ءِ ننا مڈی تیان۔ ولے ننے انت ایتک؟ ننے ہچ تفک، اینو اگہ نن پام ایتن تیوہ بلوچستان نا زی آ گڑا اوہُنو ہچ اس خنوفن کہ ہرافتے او ننا مڈی آن ننے تسونے، بلوچستان نا گیشتر جاگہ غاتیا مخلوک کُننگ کن ساف ءُ دیر خمپسہ، ہمو لُڑد انگا دیر ءِ کُننگ کن ہم اوفتے سد خواری جلوئی تمک، گیس ءِ تو اسُل خمپسہ کہ دا انت بلا ئسے نا پن ءِ خاخر کَننگ کن پاٹ پٹوئی مُچ کروئی تمک تا، وخت اس کہ دے تا دے لنگڑی کشوئی تمک تا کُننگ کن ہچو گڑا اس مفک کہ لُمہ اس تینا چُنا ءِ ایتہ و تینٹ لنگڑی ءِ سگے۔
ننا ہرا ورناک تینے وطن کن ندر کرینو و اوفتا سوچ اوفتا مہر آتا سوب آن اُلس نا است ئٹ ودیک مہر جہی مننگ ءِ ڈیہہ ئکن و او زیات آن زیات پٹ و پول کیرہ، ہر جاگہ آ مروک آ ظالم نا ظُلم نا برخلاف توار بُڑز کیرہ، و اودے خن نشان ایترہ کہ نن نے آن کم ءُ راج اس افن ولے ہاں نے آن ودّ ءُ راج اس ارین۔
دژمن ہر وڑ ئٹ تینا زوراکی آ زور خلیک۔ ورنا تے بیگواہ کننگ و اوفتے تارمہ آ کوٹی تیٹی بند کریسٹ اوفتیا ہر ظلم ءِ کننگ، و نیاڑیک ہرا بیوس مریرہ تینا ہیڑ و ایلم یا باوہ ئسے کن روڈ آتیا تولنگ آ بیوس مریرہ و او ہمو نیاڑی تیا بیدادی کیک لاٹی چارج کیک او ہموفتیا ہر وڑ ئنا ظلم ءِ کننگ نا کوشست کیک ولے اودے انت سما کہ اونا دا کروک آ ہر ظلم ئنا پد آن اُلس نا است ئٹ اوڑکن ودیک نفرت ودی مریک، بلکن ہموخس زیات اوفتے ئٹ شعور گیشتر مریک، ہر مروک آ گڑا غا نظر تخک و اودے سرپند مننگ نا کوشست کیک۔ اینو بلوچ نا ہر چُنا چُنا نا است ئٹ اوڑکن زہر نا وڑ نفرت جہی مریسہ کیک۔
ہندُنی آ ہر اسٹ نا ہندا است خواہی مریک کہ ای تینا ڈیہہ ئنا مہر ئتون تفوک مریو، و تینا ڈیہہ ئنا آجوئی کن توار ہرفو و ہرا ورناک مش تیٹ خوار و زار ءُ اوفتون کمک اس مریو، اوفتا خواری تیان مچٹ اس کم کننگ کیو۔
اینو ہر اسہ ورنا نا سوچ ہندا وڑ جوو مروک ءِ۔ سوچ انتئے؟، دژمن نا ہر ظلم ئنا سوب آن، انتئے کہ او پہہ مسونے کہ اینو ہنت مننگ ءِ ننتون ہمونا سوب آن مننگ ءِ، انت کہ زوراکی کننگ ءِ ہمود کننگ ءِ ننتو۔ گڑا اونا است ئٹ اوڑکن نفرت ودی مریک او تینا لُمہ وطن نا زی آ کوزہ کروک آ ءِ سگنگ کپک۔
دی بلوچستان پوسٹ: دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔