کرفیو خلوک شار – ٹی بی پی سرگپ
کوئٹہ، بلوچستان نا بنجائی شار ءِ، ہرا جانجوڑی، خواننگی، سیاسی و معاشی کاریم تا بنجاہ تکنگک، واہم داکان بیدس شار اینو ہم بنداوی آسراتی تیان پدماندہ ءِ۔ پاکستان پیپلز پارٹی نا حکومت نا اقتدار ئٹ بننگ آن پد کم و ود ہر توہ کوئٹہ ئٹ انٹرنیٹ سروس آ بے پڑو رکھ خلنگک، ہرانا سوب آن شاری زند سلیسنے۔ دفعہ 144 خلنگ نا پِن آ کسر تیا سخت چیکنگ لس مسنے، ہراڑے شاری تا بے شرفی ہڑدے نا کاریم جوڑ مسنے۔ ننکان اُرا تیا چھاپہ و ورنا تا زوراکی نا بیگواہی شار نا کیہی علاقہ تیٹ عملاً کرفیو کون آ حالیت ودی کننگ ءِ۔
کوئٹہ شار ئٹ زوراکی نا بیگواہی تا تدینی تیٹ پاش ودکی مسنے، اندن دا زوراکی نا بیگواہی تا برخلاف کاریم کروک سیاسی راہشون تے بندی کریسہ مزاحمتی سیاست آ عملی دروشم ئٹ رکھ خلیسہ ءُ۔ دا کاریم نا سوب آن شار ئٹی بھیم و بے باوری تالان مسنے۔ اقتدار ئٹ تولوک حکومت دا پالیسی تا دفاع کریسہ دافتے انسداد انسرجنسی نا خواست آتیتون گنڈک، ولے زمینی گواچنیک دا بیانیہ نا نفی کریسہ خننگرہ۔
حکومت و پاکستان نا سکیورٹی ادارہ غاک کوئٹہ ئٹ دا گام تے ترند سکیورٹی حالیت نا سوب آن المی گوندرہ، واہم نومبر نا توہ ئٹ شار نا اہم کسر تے ہڑاند بش کریسہ بند کننگا۔ ٹرانسپورٹ و انٹرنیٹ سروس آ تیوہ رکھ خلنگا، ولے دا غٹ گام تیان پد ہم پاکستانی لشکر آ جلہو تیٹ ہچو پاش ءُ کمبوتی اس خننگپک۔ سلہہ بند تنظیم آتا پارہ غان بلوچستان نا اہم کسر تیا ناکہ بندی تا لڑ برجاء ءِ و نوکنڈی ٹی پاکستانی لشکر نا بریگیڈ ہیڈ کوارٹر آ بھلو جلہو اس ہم مس۔
ریاستی ادارہ غاک تینا بے سہبی ءِ ڈھکنگ کن کوئٹہ شار ئٹ کرفیو کون آ حالیت ءِ گڈو کریسہ مخلوق کن گیشتر مصیبت ودی کننگ ءُ۔ کوئٹہ تون اوار تیوہ بلوچستان ئٹ انٹرنیٹ رکھ آتیا السی ردعمل آن پد حکومت حکمت عملی نا ردئٹ انٹرنیٹ نا رفتار ءِ انداخس کم کرینے کہ عملی دروشم ئٹ سروس کاریم ئٹ ہتنگ نا لائخ اف۔ حکومت نا دا گام تیان گواچن حالیت آتیٹ جوانی بننگ نا جاگہ غا کوئٹہ نا شاری تا سختی تیٹ گیشتر ودکی مرو۔