بلوچستان ئٹ 78 ہزار آئی بی اوز – ٹی بی پی سرگپ
چانڑدہ دسمبر آ سنٹرل پولیس آفس کوئٹہ ئٹ بلوچستان نا ایڈیشنل چیف سیکرٹری داخلہ و قبائلی امور حمزہ شفقت و ڈی آئی جی کاؤنٹر ٹیررازم ڈیپارٹمنٹ اعتزاز احمد گواریہ پریس ءِ بریفنگ ترسہ پاریر کہ سال اِرا ہزار بیست و پنچ ئٹ تیوہ بلوچستان ئٹ 78 ہزار انٹیلی جنس بیسڈ فوجی آپریشن کننگانے۔ اوفک بلوچ لبریشن آرمی و مجید بریگیڈ ءِ امریکی اسٹیٹ ڈیپارٹمنٹ نا پارہ غان دہشت گرد تنظیم آتا وڑئٹ پِن کننگ ءِ حکومت پاکستان نا اسہ بھلو سرسہبی اس پاریر، ہرا سکیورٹی پالیسی تا درست سمت ئنا درشانی کیک۔
حمزہ شفقت و اعزار گواریہ اندا بریفنگ ئٹ دا دعویٰ ہم کریر کہ سکیورٹی فورسز و ایلو قانود نافذ کروکا ادارہ تا جُوان انگا حکمت عملی تا سوب آن برجاء سال آجوئی دوست سلہہ بند تنظیم آتا جلہو تیٹ کمبوتی بسنے۔ واہم دا دعویٰ نا ایلودے بلوچ لبریشن آرمی نا سد آن زیات سلہہ بند مزاحمت کار آک پنجگور شار آ کنٹرول کریسہ تینا ہدف آتے پورو کریر، ہراڑان دا پاش مریک کہ سرکاری بیان آک بلوچستان نا زمینی گواچنی تیتون تفوک افس و بیرہ ریاستی بیانیہ ءِ طاغت تننگ کن وار وار پاننگنگ ءُ۔
سال اِرا ہزار بیست و پنچ ئٹ بلوچ سلہہ بند تنظیم آک پاکستان نا معاشی و عسکری ہدف آتیا کیہی بھلو و بھیم بش کروکو جلہو کرینو۔ جنوری ٹی تربت آن خڑک پاکستانی لشکر نا بس آتا قافلہ غا مجید بریگیڈ نا جند ندری جلہو مس، اندن فروری ٹی بلوچ لبریشن آرمی زہری شار آ کنٹرول کریسہ لیویز تھانہ، بینک و نادرا آفس ءِ خاخر تس۔ مارچ ئٹ جعفر ایکسپریس نا ہائی جیک مننگ اسہ لس ءُ تدینی اس الو، ہراٹی پاکستانی لشکر ءِ جانی نسخان آتیتون اوار عسکری تلہ غا دیہاڑی نسخان ہم ارفوئی تما۔
اندا توہ نوشکے، اندن ستمبر ئٹ دشت نا علاقہ ٹی پاکستانی لشکر نا قافلہ غا مجید بریگیڈ نا جند ندر آک مرگ ئنا گواچی کروک جلہو کریر۔ مئی ٹی بلوچ لبریشن آرمی سوراب شار آ کنٹرول کریسہ پولیس نا سلہہ تے کوزہ کرے و تزویراتی اہمیت تخوک دا شار آ کیہی گھنٹہ تے اسکان تینا ساڑی گری ءِ برجاء تخا، ہرا ریاستی رٹ اکن اسہ بھلو سوج ئنا نشان اس ئس۔
اگست ئٹ زہری نا تحصیل کیہی دے تے اسکان بلوچ راجی آجوئی سنگر نا مزاحمت کار آتا کنٹرول ئٹ مس، اندن تیوہ بلوچستان ئٹ بلوچ راجی آجوئی سنگر پاکستانی لشکر آ اسہ سد و پنجاہ آن زیات جلہو کرے۔ سال نا ایسری توہ تیٹ بلوچستان لبریشن فرنٹ نا سدو آپریشنل بٹالین نوکنڈی ٹی فرنٹیئر کور نا بریگیڈ ہیڈ کوارٹر آ جلہو کرے، ہراٹی سیندک و ریکوڈک تون تفوک پیشن ملکی انجینئرز آتے ہم ٹک کننگا۔
تیوہ سال پاکستانی لشکر آ مروک دا بھیم بش کروک جلہوک حکومتی دعویٰ تے رد کیرہ و بلوچ سلہہ بند تنظیم آتا ودوک آپریشنل لائخی تے پاش کیرہ۔ پاکستانی میڈیا ٹی بلوچستان نا ہرا عکس شان تننگانے او زمینی گواچنی تا ردئٹ اف، اندن بلوچ مزاحمت کار آتا کاروائی تا ترندی ٹی نہ بیرہ ودکی مسنے بلکہ ہدف آتا گچین کننگ و حکمت عملی تیٹ ہم پاش جدت پسندی خننگک۔