بلوچستان نا ساحلی شار گوادر نا علاقہ جیونی ئٹ زوراکی ئٹ بیگواہی تا لڑ اسہ وڑ برجا ءِ۔ پوسکن آ حوال آتا رد ئٹ دسمبر 2025 و جنوری 2026 نا وخت کم و ود چار ورنا مچی ہلوک آتے جتا انگا ہند آتیان پاکستانی لشکر زوراکی ئٹ بیگواہ کرینے۔
دو بروک حوال آتا رد ئٹ پانوان جیونی نا ہندی بیست و دو سالہ مچی ہلوک نور بخش نا مار اسراج ءِ 5 جنوری 2026 نا نن کم و ود سئے بجہ غا او نا اُرا غا چھاپہ خلیسہ پاکستانی لشکر دزگیر کرے و نادرست ہند آ سر کرے۔
ہندا وڑ بیست و پنچ سالہ مچی ہلوک مراد بلوچ نا مار جہانگیر ءِ 27 دسمبر 2025 آ پیشیم نا دوانزدہ بجہ غا جیونی نا اسہ ہوٹل (گوادر ہوٹل) آن پاکستانی لشکر زوراکی ئٹ بیگواہ کرے۔
اندن رستم بلوچ نا ہژدہ سالہ مار شمس الدین ءِ 25 دسمبر 2025 نا سہب دہ بجہ غا آئی ایس آئی نا دفتر، گوادر آن دزگیر کننگ آن گڈ بیگواہ کننگا۔ و عبداللہ بلوچ نا بیست و پنچ سالہ مار شبیر ءِ 5 جنوری 2026 نا نن دوانزدہ بجہ غا جیونی، گوادر آن برمتہ کننگا، ہرافتیٹی ایف سی و آئی ایس آئی نا کارندہ غاک اوار مننگ نا احوال آک ءُ۔
یاتی مرے کہ زوراکی ئٹ بیگواہ مروک بندغ آک تعلقداری اسہ علاقہ پانوان، جیونی آن ءِ، و اوفتا کاریم مچی ہلنگ ءِ۔ ہندی بندغ آتا رد ئٹ مچی ہلوک تپہ مالو آن ترند زرگزرانی بدحالیت نا گواچی ءِ، ہندن زوراکی ئٹ بیگواہیک علاقہ ئٹ خلیس اس تالان کرینو۔
بندغی حق آتا کارندہ غاک اقوام متحدہ، ایمنسٹی انٹرنیشنل و ایلو جہانی ادارہ غاتان خواست ءِ کہ او بلوچستان ئٹ برجا زوراکی نا بیگواہی تیا دمدستی نوٹس ہلیر و پاکستان آ زور شاغر کہ او جہانی بندغی حق آتا قانود آ سلیر۔