اوار انگا خاص سکیورٹی یونٹ – ٹی بی پی سرگپ
پاکستان نا وزیر داخلہ محسن نقوی چین ئنا دورہ نا وخت آ بیجنگ ئٹ وزارت عوامی سکیورٹی نا ہیڈکوارٹر ئٹ چین ئنا پبلک سکیورٹی نا وزیر وانگ ژیاؤ ہونگ ئتون اوڑدہی ٹی چین و پاکستان نا اوار ءُ خاص سکیورٹی یونٹ اس ٹہفنگ نا فیصلہ کرینے تاکہ پاکستان ئٹ چینی شاری تا رکھ اکن گامگیج آتے جُوان جوڑ کننگ مرے و دا مسخت کن پاکستان نا کارندہ تا تربیت و پیشہ ورانہ لائخی تا ودفنگ کن اوار حکمت عملی جوڑ کننگ مرے۔
پاکستان و چین ئنا اوار انگا خاص سکیورٹی یونٹ ءِ جوڑ کننگ نا مسخت دادے کہ پاکستان و خاص وڑئٹ بلوچستان ئٹ چین ئنا کان کنی و ایلو اقتصادی ڈٹ بندی تیتون تفوک چینی انجنیئرز و تکنیکی چاہندار آتا رکھ ءِ ممکن جوڑ کننگ مرے۔ دا یات سلے کہ چینی شاری و انجنیئر آک کراچی، خیبرپختونخواہ و بلوچستان ئٹ کیہی وار بھیم بش کروک جلہو تا گواچی مسنو۔ پاکستان نا نیشنل کاؤنٹر ٹیررازم اتھارٹی نا ڈیٹا نا ردئٹ 2021 آن دسمبر 2024 اسکان جتا جلہو تیٹ چین ئنا 20 شاری مرگ ئنا گواچی و 34 ٹپی مسنو۔
تدوکا سال تیان بلوچستان ئٹ چین ئنا اقتصادی و عسکری ڈٹ بندی تیتون تفوک چینی انجنیئر و تکنیکی چاہندار آتیا جلہو آتیٹ ودکی مسنے۔ بلوچ لبریشن آرمی نا مجید بریگیڈ نا جند ندریک کراچی و بلوچستان نا جتا علاقہ تیٹ چینی شاری تیا مرگ ئنا گواچی کروک جلہو کرینو۔ اکتوبر 2024 ئٹ کراچی انٹرنیشنل ایئرپورٹ آ مجید بریگیڈ نا جند ندری جلہو ئٹ مُسہ چینی انجنیئر مرگ ئنا گواچی و کیہیک ٹپی مسوسر اندن بلوچستان لبریشن فرنٹ نا سدو آپریشنل بٹالین نومبر 2025 ئٹ نوکنڈی ٹی ریکوڈک و سیندک نا انجنیئر آتیا بھیم بش کروک جلہو کرینے۔
چین پاکستان، خاص وڑئٹ بلوچستان ئٹی تینا اقتصادی ڈٹ بندی تے برجاء تخنگ کن رکھ ئنا خُلیس آتا گواچی ءِ، ہرافتے مُر کننگ کن پاکستان و چین اوار خاص سکیورٹی یونٹ اس جوڑ کرینو۔ واہم، خدو پاکستانی سکیورٹی فورسز آتا پارہ غان بلوچستان ئٹ 90 ہزار انٹیلیجنس بیسڈ آپریشن کننگ آن پد ہم بلوچ آجوئی دوست سلہہ بند تنظیم آتا جلہو تا ترندی ٹی ودکی مسنے و دا ہیت ئٹ ہچو شک اف کہ اوار انگا خاص سکیورٹی یونٹ نا جوڑ کننگ آن پد ہم چین ئنا لٹ و پلی پِن کروک ڈٹ بندی تیا جلہو آک برجاء مرور۔