ریڈار بھس،فوجی قافلہ، ایئر بیس و “ڈیتھ اسکواڈ” آتیا جلہوک – بی ایل اے جلہو آتا ویڈیو شینک کرے

بلوچ لبریشن آرمی نا آفیشل میڈیا چینل’ ہکل’ نا پارہ غان برجا دے تیٹ (مارچ) مروک ہمگرنچ جلہو تا ویڈیو لڑ شینک کننگانے۔

چانڑدہ منٹ آ تالان دا ویڈیو ئٹ ریڈار سسٹم نا بھس کننگ، شمسی ایئر بیس آ راکٹ خلنگ و جھل مگسی، سوراب و کردگاپ ئٹ فوجی قافلہ تیا جلہو آتون اوار دشت، کنڈان و مستونگ ئٹ فوجی کیمپ آتیا جلہو آتے نشان تننگانے۔

دا ویڈیو ئٹ پنجگور ئٹ اسہ وخت آ حکومتی مخ تف ٹولی”ڈیتھ اسکواڈز” آتا ٹکھانہ تیا جلہو و اوفتیا کنٹرول دوئی کننگ تون اوار دالبندین ئٹ مڈی کشوک سائٹ آتیا کنٹرول دوئی کننگ نا ندارہ غاتے خننگ کینہ، وختس کہ ویڈیو ٹی پاکستانی لشکر آن دوئی کروک سلہہ و ایلو جنگی مڈی تیتون اوار فوجی گاڑی تا بھس مننگ نا ندارہ غاک ہم اوار ءُ۔

بلوچ لبریشن آرمی نا ترجمان جیئند بلوچ شابیتی بیان ئس شینک کرسہ پارینے کے مقبوضہ بلوچستان نا ایب کیب ئٹ قوضہ گیر پاکستانی لشکر نا برخلاف بلوچ لبریشن آرمی نا سرمچار آک 29 مارچ آ ہمگرنچ جلہو آتا بناء ءِ کریر ہرا 1 اپریل اسکان برجا مسر۔ سرمچار آک پنجگور، شاپک، بیسیمہ، سبی، نصیر آباد، ڈیرہ بگٹی، مستونگ، کوئٹہ، نوشکے، زامران، دشت، سوراب، جھل مگسی، دلبندین، خاران، واشک و قلات ئٹ 65 کاروائی کریر ہرافتیٹی قوضہ گیر لشکر، ڈیتھ اسکواڈز و ڈھکوک ادارہ تا 86 آن زیات کارندہ مرگ ئنا گواچی و درزن آتے ٹپی کریر۔

ترجمان پارے کہ دا جلہو تیٹ قوضہ گیر لشکر نا کیمپ آتون اوار ایئربیس، ریڈار سسٹم، حوالکاری ٹاور، ریلوے پٹڑی، پول و گیس لین آتے ٹِک کننگا وختس کہ بنجاہی کسر تے گھنٹہ غاتے اسکان کنٹرول ئٹ ہلنگا ہندن پنجگور و زامران جھڑپ آتیٹ بی ایل اے نا شش جنگول شہید مسر۔

MONITORING: BLA media has published footages of coordinated attacks of March pic.twitter.com/TX3W5R8UmG

— Bàhot باھوٹ (@bahott_baloch) April 4, 2026