بارکھان آن پنچ سال مالو زوراکی ئٹ بیگواہی نا گواچی مروک ڈاکٹر جمیل بلوچ نا خاہوت نا پارہ غان عئید نا مُسٹمیکو دے برانز کننگا۔
برانز کروکا اسپتال چوک آن بارکھان پریس کلب اسکان دپ درشانی کریر۔ برانز ئٹ ڈاکٹر جمیل بلوچ نا خاہوت، ہندی مخلوق، سول سوسائیٹی و بارکھان ویلفیئر سوسائیٹی نا باسک آک اوار ئسُر۔
یاتی مرے کہ جمیل بلوچ ہرا اسہ ڈاکٹر ئسے، تدوکا سال 23 فروری آ بلوچستان نا ضلع بارکھان آن دزگیر کننگ آن گُڈ بیگواہ کننگاسس۔
برانز ئٹی اوار مروکا بلوچستان تون اوار ایلو شار تیان بلوچ ورنا تا زوراکی نا بیگواہی و بلوچ خوانندہ آتے خواننگ جاہ تیٹ بیم تننگ نا مذمت کریر۔ اوار مروکا بلوچستان حکومت و قانود نافذ کروکا ادارہ آتیان ڈاکٹر جمیل بلوچ کھیتران و ایلو بیگواہ غا بندغ آتے زُوت آجو کننگ نا خواست ہم کریر۔
برانز ئٹ اوار مروک آتا پاننگ ئس کہ ہر بروکا دے بلوچستان ئٹ زوراکی نا بیگواہی تا تدینیک مریرہ، ریاستی ادارہ آک الس ءِ رکھنگ نا جاگہ غا اوفتے بیگواہ کننگ ءُ، الس سیکورٹی ادارہ آتے خنیسہ رکھ محسوس کننگ نا جاگہ غا خُلیس نا گواچی مریک و سیکورٹی نا پِن آ بلوچستان ئٹی بیگواہ کروکا تے تولِفینو۔
برانز ئٹ بیگواہ جمیل بلوچ کھیتران نا مسڑ مہرناز ہم اوار ئس۔
مہر ناز نا پاننگ ئس کہ اونا باوہ نا بیگواہی ءِ داسا پنچ تُو مننگ ءِ و او آجو متنے، مہر ناز نا پاننگ ئس کہ دا پنچ تُو ئٹی تینا باوہ نا آجو کننگ کن نن برانز کرینن، انصاف نا خواست کرینن ولے کنا باوہ ءِ آجو کننگ افس۔
ایلو نیمہ غان بلوچستان نا ضلعی شار حب چوکی آن پاکستانی فورسز آک اسہ بندغ ئسے دزگیر کریسہ نا درست ءُ ہند ئسے آ درینو۔
بیگواہ مروک بندغ نا چاہنداری فیصل ولد حاصل نا پنا مسنے ہرا پیر کس لعل محمد گوٹھ نا جاگہی سے۔
اونا خاہوت تدینی ءِ پک کریسہ پارے کہ پِن کروک ورنا ءِ دہ دے مالو فورسز آک اُرا آ چھاپہ خلیسہ دزگیر کرینو۔
خاہوت بندغی حق آتا ادارہ آتیان خواست کرینے کہ او فیصل نا آجوئی کن تینا کڑدار ءِ ایسری ایتر۔