بلوچ اسٹوڈنٹس آرگنائزیشن پجار، بلوچ اسٹوڈنٹس آرگنائزیشن، بلوچ اسٹوڈنٹس ایکشن کمیٹی تربت زون نا اوڑدئی مجلس اڈ تننگا۔
مجلس ئٹ پاننگا کہ یونیورسٹی آف تربت نا بست و بند نا کنڈ آن سمسٹر فیس ئٹ بے کچ ودکی، ہاسٹل فیس ءِ اسہ ہزار آن ودفیسہ پنچہزار کننگانے و ٹرانسپورٹ فیس ءِ 250 روپئی آن ودفیسہ ہر سمسٹر ئٹ پنچ ہزار کننگانے۔
خوانندہ تنظیم آک یونیورسٹی بست و بند نا کنڈ آن غٹ فیس آتیا نمن کرینو و بست و بند نا عمل ءِ خوانندہ دشمن پالیسی پاریسہ اوفتاپاننگ ئس کہ یونیورسٹی آف تربت دا وخت باز نیستی تا گواچی ءِ۔ یونیورسٹی بست و بند نا شاہ خرچی و کرپشن اینو یونیورسٹی ءِمالی و بست و بندی پڑ آ شَل کرینے۔
مجلس ئٹ فیصلہ کننگا کہ یونیورسٹی بست و بند نا مسکین آ خوانندہ آتے تعلیم آن مُر تخنگ نا پالیسی ءِ اسُل منِپنہ، مجلس ئٹ فیصلہکننگا کہ تربت یونیورسٹی نا بست و بند ءِ پیسےکھٹنگ نا فیکٹری جوڑ مننگ الیپرون۔
مجلس ئٹ فیصلہ کننگا کہ یونیورسٹی آف تربت نا فیس ئنا ویل آ ہر مُسہ تنظیم نا کنڈ آن اوار برانز کننگو۔
مجلس ئٹ دا ہم فیصلہ مس کہ غٹ خوانندہ آک سمسٹر فیس، ہاسٹل فیس، ٹرانسپورٹ فیس و ایلو ودوکا فیس تے تفس۔
اجلاس ئٹ فیصلہ مس کہ تحریک ہمو وخت اسکان برجاء مرو ایسکان کہ یونیورسٹی بست و بند تینا ناجائز فیس آتا فیصلہ ءِ واپسہلپک۔ مجلس ئٹ اوڑدئی ئٹ پین وختی نا لائحہ عمل نا پڑو نا فیصلہ کننگا۔