مری قبیلہ نا اِرا بھلو شاعر
نوشت: سمو بلوچ
مٹ: آصف بلوچ
دی بلوچستان پوسٹ
مری قبیلہ بلوچستان نا ہند کوھلو کاھان چمالنگ ماوند تمبو نلی و پین کوچہ آتیٹی آبات ءِ۔ مری قبیلہ بلوچ راج ئنا بھلا قبیلہ ءِ۔ دا قبیلہ تینا دلیری ڈیہہ دوستی و تینا راج دوستی کن چاننگک۔ گڑاس بندغ آتا پاننگ ءِ مری نا معنہ ضد کروکا ءِ۔ ولے فارسی ٹی مری بغاوت کروکا ءِ پارہ۔ دافک ہر وخت پیشن آن بروکا طاغت آتا بر خلاف ڈیہہ ءِ رکھانو۔ دا قبیلہ ٹی کیہی پنی و دلیر بلوچ جنگجو و شاعر آتا ودشت مس ہرافتیٹی خدادا مری، بھار خان مری، نہالاں مری، بیورغ مری، نواب خیربخش مری اولیکو و ارٹمیکو، مست توکلی، بجار خان مری، رھم علی مری، علی ھان مری، غلام محمد مری زکر ئنا لائخ ءُ۔ دافتیان بیدس شاہ محمد مری، میر مٹھا خان مری و صورت خان مری آنبار انگا نوشتکار آک ہم ہندا قبیلہ آن تعلقداری تخیرہ۔
مری قبیلہ نا مُسہ بھلو ٹک ءُ:
1- بجارانی
2- گزینی
3- لوھارانی
مری قبیلہ نا ارا عظیم آ شاعر آک:
دن تو مری قبیلہ ٹی بھاز آ شاعر آک اریر و دیہاڑ ئٹی ہم کیہی شاعر آتا زکر ارے ہرا تینا شاعری کن دیہاڑ نا خیسُن آ پنہ آتیٹی نوشت کروک ءُ۔ ننا سرحال مست توکلی و رحم علی مری ءِ۔
مست توکلی:
ودشت:
مست توکلی بلوچستان نا ہند کاھان (مانڑک بند) ئٹی ودی مسک۔ اونا ودشت ئنا اصل سال تو سماء تمتو ولے پاننگک کہ او 1829-1825 نا نیام ئٹی ودی مسونے۔ او اسہ لس بلوچ اس ئسک و تینا علاقہ ٹی میڷ و ہیٹ تے خوافیکہ۔ انتئے کہ او وخت آ دا علاقہ آتیٹی خواننگ الو گڑا او تعلیم دوئی کتو۔ اونا تعلقداری مری قبیلہ نا شیرانی ٹک آن ئس۔
مست توکلی نا سمو تون اوڑدہی:
مست توکلی اسہ وار اس تینا سنگت آتیتون اوار سیل و سواف کن ارا غان پیشتما۔ اسہ دے اس او کوھلو نا پارہ غا راہی مسر و ہموڑے اوفتے پِر مُستی پند کننگ الیتو و اوفک رامو پنی ءُ اسہ بندغ ئسے نا ارا ٹی اڈ کریر۔ ننکان ہرا وخت آ پِر ترند مسک و ہمو ارا نا گودی پیشن پیشتما و تورا (پیش ئنا تمبو) نا پاٹ ءِ سمبھالنگ ئسک تو ہندا وخت آ مست توکلی نا نظر ہمو مسڑ آ تما۔ اونا پژہ آک ملوک ئسر و گُد ہم ترند آ تہو نا سوب آن بال کریسس۔ مست توکلی تینا سار ءِ گوہا و دا مسڑ نا مابت ئٹ گنوک مسک۔ دا مسڑ نا پن سمو ئسک۔ سمو اسہ برامی ءُ مائی اس ئسک و او وخت کم و ود اونا سن 17-18 سال ئسک۔ سمو اسہ گونکی رنگ وھش_دروشم مسڑ اس ئس۔ سمو نا ارا کوھلو نا کوچہ مخمار ئٹی ئسک۔ مست سمو آن پد اسل پینگر مس او مچا نن سمو نا باروئٹ سوچ خلیسہ کرے۔ سہب ئنا ہرا وخت سنگت آک پدی ہننگ کن ڈٹ بندی کریر گڑا مست ہننگ آن نہ من کرت و پارے کہ او ہنداڑے سمو نا کوچہ ٹی رہینگک۔ مست اوکان پد ہموڑے رہینگ بناء کرے۔
مست اسہ شعر اسیٹی سمو نا زیبائی ءِ مچٹ دن بیان کیک:
شف گروخی گوں لاغریں شینکاں
ملغّی ڈئیل گوں ریشمی ھبّراں
دروشماں داث چھو تانہی نوزاں
چھم ئے شراں گوں بارغیں سرین ءَ
ترنداں چھو آمِڑ داثخیں تیغ ءَ
گنوکی و شاعری:
مست توکلی ہراتم آن کہ سمو ءِ تینا خن تیٹی خوندی کرے اوکان پد اودے پین کس نظر بتو او ہنداخس گنوک مسس کہ او ہرا جاگہ غا ہناکہ سمو نا زکر ءِ کریکہ و ہندا سمو نا یات ئٹی او کوہلو آن وختس سندھ تو وختس کوہ سلیمان نا مش تیٹی شاعری کریسہ کریکہ و سمو ءِ یات کریکہ۔ مست ئنا شاعری سمو آن بناء مریک و سمو آ ایسر۔
اسہ جاغہ اس مست سندھ ئنا زکر کریسہ پائک۔
تھئی زھیر من ءَ سندھ ءِ چو بیٹاں گار کھناں
من شتو سندھ ءَ اژ مژو جھنگاں گوستاں
پھازاں نال بستہ پہ ڈغرانی چھاگغاں
چھماں ھون مستاں پہ شوانی گوزوھاوہاں
اسہ پین جاغہ اس پارے:
مست جالی من کوہ سلیمان ءَ
کوہ ئے بیھو ءُ سندھ ءِ میزان ءَ
گنجیں دلی دا شھر خراسان ءَ
مست ئنا گنوکی نا گڑاس کسہ آتے بنفنگ خواوہ:
اسہ وار مست اسٹ ئسے نا ارا ٹی اڈ کریسس اُرا والا مست اکن ارغ ہیسک مست ارغ کننگ آن نہ من کرے و پارے:
”شا یک مڑدے نغن پچھے آڑتہ سمو تھامیں ؟“
مطلب نی بیرہ اسہ بندغ اسیکن انتئے ارغ ہیسنس سمو نا ارغ آک ارادو؟
اسہ وار اس پٹھان و مری تیٹی ڈغار ئسے آ توار توار اس بش مسک۔ انتئے کہ مست اسہ کماش و انصاف دوست بندغ اس ئس گڑا بندغ آک مست ءِ خوائفیر و پاریر کہ او دا دھرتی نا فیصلہ ءِ کے گڑا مست پارے:
”سمو ءِ زوین ئے بھر ءَ دئیں گڑا من شئے فیسلہ کھناں “
مطلب کہ سمو نا ڈغار نا بشخ ءِ ایتبو گڑا ای فیصلہ کیوہ۔
مست ئنا گنوکی نا حد ءِ ہر کہ او ہر وخت سمو ءِ تینا رہی آ ماراکہ کہ سمو ہر وخت اونا رہی آٹے۔
وفاداری:
مست سمو تون مچ زند مابت کرے سمو آن بیدس او پین اسہ نیاڑی ئسے نا پارہ غا ہم ہرتو۔
اسہ وار اس اودے ڈیرہ غازی خان ئٹ اسہ کوٹھی اسیٹی اسہ پین نیاڑی اسیتون اوار الار تانکہ او مست ئنا وفاداری ءِ ہُننگ کیر۔ سہب ئنا دا نیاڑی اوفتے پارے کہ مست اسہ وار ہم اونا پارہ غا خنتے بڑز کتو ہرتو۔
مست تینٹ ہم دا تدینی نا زکر ءِ تینا شاعری ٹی دا وڑ ئٹ کیک۔
دیروئے زالاں مان اثنت درگوشیں پری
سملے عھداں من تہ بھوریناں امبری
مست و پخیری:
مست اسہ پخیر و درویش نا وڑ ءُ بندغ اس مسس، مچا نن و دے او سمو نا یات آتیٹی گوہنگاکہ و تینا خدا ءِ یات کریکہ۔ مست نا پخیری و کماشی نا کیہی کسہ غاک بھاز پنی ءُ ہرافتیان گڑا ئسے نا زکر ءِ ای کروٹ۔
ہرا وخت آ سمو ءِ دوشہ ڈنگ خلک و مست ءِ دا ہیت ئنا سما تما گڑا او بڑزا ہرا پارے۔
”ھموزا کی سمو سیاہ مار واڑتہ اوزا کڈھی ھور مواث“
یعنی ہرا جاغہ آ سمو ءِ دوشہ ڈنگ خلکونے اوڑے اسُل پِر مف و پاننگک کہ اینو اسکان ہموڑے پر مفک۔
اسہ وار اس مست توکلی سندھ ئٹی تینا اسہ سنگت اسیتون ریل ئنا کسر آ تولوک ئسک۔ ہرا وخت آ سنگت خنا کہ ریل بننگ ءِ گڑا او کسر آن مُر مسک و مست ءِ ہم پارے کہ شیف برک ولے مست ہموڑے توسک ہراتم ریل بھاز خڑک کرے گڑا مست پارے:
”بہ اوشت سمو ئے لاغ“
و ریل ہموڑے سلیس۔
مست و جام درک:
مست توکلی جام درک آن بھاز زہمی مسس۔ اونا شاعری نا ڈول مست ءِ بھاز دوست ئس۔ مست ئنا شاعری ٹی جام درک نا شاعری نا کیہی ڈول آک خننگرہ۔ ہمر کہ اسہ جاغہ اس جام درک پائک:
ھجر مناں مھمیلی جنت پاسان
چھو کھیرانی آڑویں آساں
ہندا وڑ مست پائک:
ایزا تھئی زھیر سمو پہر پہ پہری ءَ نوخ باں
ایزا چھو کھیرانی آڑویں آساں روخ باں
ڈیہہ دوستی و راج دوستی:
مست توکلی اسہ ڈیہہ دوست و راج دوست بندغ اس ئس۔ او ساندہ پیشن نا تاغت آتا برخلاف شاعری نا وسیلہ ئٹ بغاوت کرینے۔ او مدام تینا راج و ڈیہہ ئنا رکھ اکن ہیت کرینے۔ اسہ وار اس او سندھ ئٹی ئس اودے سما تما کہ انگریز آک کاہان آ جلہو کرینو۔ مست بھاز مونجا مس و پارے:
”کس نہ اِنت کوہا کہ دلی اھوال ئے گراں
نی پھزا گڑدوں کہ گپتغاں کاھان کافراں“
مست توکلی بیرہ ڈیہہ دوست اس الو بلکن او اسہ انصاف دوست انسانیت دوست بندغ اس ئس۔ او چاگڑدی ویل آتیا ہم ہیت کریکہ و اوفتے ایسر کننگ نا ہم کوشست کریکہ۔
کذیت:
مست توکلی نا کذیت نا سال کس ءِ سما اف ولے پاننگک کہ کم و ود 1890-1896 نا نیام ئٹی کذیت کرینے۔ مست تینا کہنگ آن مُست پارے کہ کنے کہنگ آن پدا ہموڑے کڈ کیرے ہراڑے ہنیسہ ہمو ہُچ سلیس ہراڑا ای مروٹ۔ ہرا وخت آ مست کذیت کرے گڑا بندغ آک اودے ہُچ آ تخار و راہی مسر۔ کوہلو آن بیست کلومیٹر مُستی ہنا ہُچ توس۔ بندغ آک ہُچ ءِ بش کننگ نا کوشست کریر ولے او بش متو۔ گڑا بندغ آک بیوس مسر مست ءِ ہموڑے کڈ کریر۔ دا ہند مست میزانگری نا پن ئٹ چاننگک۔
اینو ہم بندغ آک ہموڑے کارہ خیرات کیرہ و منت خوارہ۔ بندغ آتے باور ءِ کہ مست اوفتا منت آتے پورو کرو۔
مست توکلی بلوچ راج ئنا اسہ عظیم ءُ شاعر اس مسنے ہرا کہ دیہاڑ ئٹی تینا پن ءِ جوڑ کرے و راج ئنا دیہاڑ ءِ ادب تون درستی راستی کرفے۔
شاعر رحم علی مری:
ودشت:
رحم علی مری کوہلو نا کوچہ سگھنڑی ٹی کم و ود 1876 ئٹی ودی مسک۔ ہرا وخت آ او ہفت سال ئنا اس ئس گڑا اونا باوہ بجار خان کذیت کرے۔ بجار خان مری ہم بلوچ راج ئنا اسہ دلیر، جنگجو و شاعر اس ئسک۔ اونا لمہ ہم وختی کذیت کریسس۔ رحم علی مری داسا چوری اس ئس۔ او چُنکی آن تینا ماما نا اُرا ٹی رہینگا و میڷ خوافے۔
شعر و شاعری:
رحم علی مری ءِ انتئے کہ شاعری میرات ئٹ رسینگا گڑا او چنکی آن چنکو چنکو شعر جوڑ کریکہ۔ اونا باوہ بجار خان مری و اونا پیرہ ہم اسہ شاعر اس ئس۔ رحم علی مری چنکا سن ئٹی شاعری ءِ بناء کرے۔ او چاگڑد نا ہر کنڈ آ خوڑتی ئٹ ہرا و او انصاف، برابری و چاگڑد ئٹی مروکا ہر عمل آ پام کریکہ۔ او غریبی آ ہم پام کریکہ۔ او سڑداری نظام نا برخلاف ئس و مخلوق نا ویل آتیکن جہد کریکہ۔
اسہ شعر اسیٹی پائک:
”گنڑسہ سے چھیار ننگ ءَ
سلاہ بستہ ھمے رنگ ءَ
مری اِنت پھولغیں درنگ ءَ
دلش پہ پیسواں ٹنگ ءَ“
اونا زیات شاعری جنگ آٹے۔ او وخت آ بلوچستان آ انگریز آتا کوزہ ئس گڑا مری علاقہ آتیٹ مری قبیلہ و انگریز آتا نیام ئٹ جنگ ترند ئس۔ او تینٹ انگریز آتا برخلاف ئس و کیہی جنگ آتیٹ بشخ ہم ہلک۔
اسہ شعر اسیٹی پاہک:
”گنڑسہ سے چھیار ننگ ءَ
سلاہ بستہ ھمے رنگ ءَ
مری اِنت پھولغیں درنگ ءَ
دلش پہ پیسواں ٹنگ ءَ“
مست توکلی و رحم علی نا تدینی:
اسہ وار اس مست توکلی کوہلو آ بس۔ رحم علی نا ماما اودے تینا اُرا ٹی باہوٹ تس رحم علی او وخت آ چنک ئس۔ کل بندغ آک بسر مُچ مسر و مست توکلی تون حال حوال کریر و ننکان ہُرے اسکان کچاری برجاء مس۔ رحم علی ہم دا کچاری ٹی تولوک ئسک۔ نن نیمہ مس گڑا بندغ آک بش مسر تینا اُرا تیا ہنار۔ مست ہرا وخت آ خنا کہ اسہ چنا اس یکہ ہموڑے تولوک ءِ گڑا او پارے:
”نی ہم داسا اُرا غا ہن نا باوہ نیکن ہُروک مرو“
رحم علی ورندی تس:
”مناں ابا نیست“
مست توکلی پدا پارے:
”گڑا تھئی امے تھئی انتزار کھنغیں برو لوغا بچ“
رحم علی ورندی تس:
”مناں امے دہ نیستیں“
دا بِننگ تون مست توکلی ارمانی مس و رحم علی نا پُٹی آ دو تخا و پارے:
”مرشی تھرا مات پت نیست اِنت بل بانگہا تھو اے قوم ئے مات پت بئے“
بلوچی حال حوال:
بلوچی حال حوال بلوچی دود ربیدہ نا بشخ ئسے۔ اگہ کس ءِ حال حوال بتو گڑا او عیبدار مریک۔ رحم علی مری آن ہرا وخت آ کس اس حوال ہلککہ گڑا او شاعری ٹی تینا حال حوال ءِ بنفیکہ۔ او ہندا وڑ ئٹ حال حوال تسکہ کہ شعر ہم جوڑ مسکہ و حوال ہم بندغ آتے رسینگاکہ۔
اسہ وار اس کچاری باسُن ئس ہنداڑتون رحم علی ہم بس۔ اودے حوال کننگا کہ۔
”جی ادا ھالے“
گڑا او پارے:
”ھال مے ھیراں بیسغوں ھندا
شان بھری کوہا نزدہ ءُ مندا“
گُمبد جنگ:
1914- 1918 نا جہانی جنگ ئنا وخت آ انگریز تینا بڑزی آ ئس۔ اوفک بلوچ آتیان ہم لشکر ئٹ بھرتی خواہار۔ ولے مری تا اولیکو سردار نواب خیربخش مری اوفتے نمن کرے و پارے او اوفتا لشکر ٹی اسل بھرتی مروفس۔ اوکان پد نواب خیر بخش مری جنگ ئنا پڑوْ کرے کہ گمبد ئٹی انگریز آتا قلعہ آ جلہو کروئی ءِ۔ کُل راج دوست و ڈیہہ دوست مریک اوار مسُر و جنگ ئنا تیاری ٹی لگار۔ کس اس توفک ہرفے تو کس اس زغم کل تینا ڈیہہ ئنا رکھنگ کن تینا ساہ ءِ قربان کننگ ئسر۔ دا مری تا خیالداری کروکا نواب خیر بخش مری اول تینٹ ئسک۔ اوڑان بیدس خداداد مری، بیورغ مری، نھالاں مری، علی خان مری و پین ہم دلیر ءُ زمیندار جنگ ئٹی اوار ئسر۔ ہرا وخت مری لشکر گمبد نا قلعہ اسکان سر مس گڑا ایلو پارہ غان انگریز آک، ہرافتیتون کیہی سلہہ توپ، توفک و کیہی وڑ ئنا سلہہ ئس و اوفک ہزار آتا کچ ئٹ ئسر، سُم تا پِر کریر۔ مریک گڈیکو ساہ اسکان جنگ تسر و داڑے اسکان کہ علی خان مری قلعہ غان ہیپار مریسہ اونا در اسکان ہم جنگ کرے سر مس۔ رحم علی مری علی خان مری نا دلیری ءِ دن بیان کیک۔
”الی ھان پُجسہ تاک ءَ
مزتے داسغنت پاک ءَ“
رحم علی مری گمبد نا جنگ ئٹی بشخ ہلوکا کل دلیر آتیا شعر و شاعری کرینے۔ او گمبد نا جنگ آ اسہ مچا ءُ داستان اس نوشت کرینے۔
دا داستان نا گڑاس بند داد ءُ:
”سرا نوازاں گوں نوز گوارا
شھیدی کپتہ بازارا
مڑغ اَث داز الی مستیں
بھازر اَث داز الی مستیں
بھازر ءُ داز الی مستیں
سماراں کھلوانڑی آں
گزایاں گون ءُ سانڑی آں“
کردار نگاری:
رحم علی مری جنگ ئنا پڑ ئٹی مسکہ اندا خاطران اونا مچا شاعری جنگ و جنگ کروکا دلیر آتیاٹے۔ او کل شہید آتا ذکر ءِ تینا شاعری ٹی کرے و اوفتے دیہاڑ ئٹ زندہ تخا۔ ڈغار آ شہید مروک آتے ڈغار تینٹ زندہ کیک دا ہیت راست ءِ۔ رحم علی مری ہمو کُل شہید آتے تینا شاعری ٹی زندہ تخا و اونا شاعری ءِ اینو دے اسکان بلوچ راج زندہ تخانے۔
او ہمو وخت ئنا کل دلیر و ڈیہہ دوست بندغ آتے تینا شاعری تیٹ نازیفینے۔ ہرافتیٹی خدا داد مری، نواب خیر بخش مری اول، علی خان مری، بیورغ مری آن بیدس پین ہم دلیر ءُ بندغ اوار ءُ۔
نواب خیر بخش مری اول نا بابت رحم علی نوشتہ کیک:
”ھزار شاواش ایں خیر بشک ءَ
ھزوری جاپری درشک ءَ
سکی ءُ سھو ءِ لکھ بشک ءَ
مزن ناو ءُ گریب پالا
نخسئی کافر ءَ ٹالا“
خداداد مری نا باروئٹ رحم علی پائک:
”خداداد بنگ ءُ بورانی
وروھنیں لیڑو ءِ سانی
سلاہ اش بستاں جنگانی
براھنیں تیغ ھراسانی“
بیورغ مری نا بابت شاعر رحم علی نوشتہ کیک:
”جڑی جینھر کھناں گواراں
رواں بیورغ ءَ سنگھاراں
تھئی تازی مں جھنڑ ساراں
ھمے زات ۓ سپاہ داراں
نئیں ماث اش پھزا کھاراں
پھزی نند اَنت ءُ گیراراں“
باھر ءُ نھالاں نا بابت شاعر نوشتہ کیک:
”نہکیں باھر ءُ نھالاں
کواں زیراں ھور پالاں
سخی ءُ نیغ ءُ ننگ پالاں
درہ بے مٹ ءُبے سیالاں“
خداداد مری، باھر مری، نھالاں مری و بیورغ مری چار انگاک ایلم ئسر و گمبند ٹی اوار ئسر۔
راج دوستی و وطن دوستی:
رحم علی مری اسہ وطن دوست و راج دوست بندغ اس ئس او چائسکہ کہ انگریز آک اوفتیا و اوفتا ڈیہہ و ڈغار آ کوزہ کرینو۔ او دا کوزہ نا برخلاف جنگ و شاعری ہڑتوما وڑ تیٹ جہد کننگ ئس۔ اونا بھازی شاعریک ڈغار، راج و شہید آتیا ئسر۔ او غلامی نا برخلاف ہر وخت ہیت کرینے۔
اونا پاننگ ئس:
”اغاں گلامی شئے جسم و ھون نیاما جور رنگ ءَ برو گڑا ایشی کشغ باز گراں بی“
یعنی اگہ غلامی نا بدن و دتر ئٹ زار آنبار اوڑدہ مرے گڑا اودے کشنگ بھاز سخت مرو۔ اونا مچا زند جنگ و جدل ئٹی گدرینگا و او تینا بندغ آتے قربانی تننگ آ خنا او تینا دوستخواہ تا لاش تے ڈغار آ تموک خنا۔ او تینا اسہ شعر اسیٹی پائک:
”ھئیرانی تمن ویران اِنت
سئیت ماں شکلیں جنگاں اِنت“
کذیت:
رحم علی نا کذیت نا ہچ سما اف ولے میر مٹھا خان تینا کتاب رحم علی مری ٹی اونا کذیت ءِ 1933 پارینے۔
اینو مست توکلی و رحم علی مری نا پن بلوچ راج نا دیہاڑ ئٹی خیسن آ پنوْ آتیٹی نوشت ءِ و ہرا وخت اسکان بلوچ راج ارے و ہرا وخت اسکان بلوچستان ارے اوفتا پن و اوفتا شاعری زندہ سلو۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔