گڈیکو جلسہ
نوشتکار: آندرے گروشینکو (روس)
اردو مٹ: ستار طاہر | براہوئی مٹ: درناز رحیم
دی بلوچستان پوسٹ
پیرنگا باشکوف تینا ملخُڑ ئے پارے:
“ نے سما ءِ، اینو اَرا دے ءِ۔ دے پیشتمانے، کنا پیشن تولنگ نا بست و بند ئے کرینُس؟”
ملخُڑ بشخندہ کرے، او خن ءَ مون ئٹی زیباؤس اسک، ولے او ہولُن و مچٹ بے ڈول مننگ اس، پیرنگا باشکوف تینا اُست ئٹی پارے:
“ نرینہ باز ظالم ءِ، نیاڑی نا زیبائی ئے پُھلیک۔”
“ ہئو! پیشن کرسی ئے نا تخانُٹ، پوغ لگِفینُٹ چُلہہ ئے باسِفینُٹ۔۔۔ پین انت خواہسہ۔۔۔”
“ بس گُڑا کنے دوٹی ہڷ پیشن در، آہ، دا گھنٹیک۔۔۔ ششکا! نا اَرغ تو ہنو داسا؟
“ ہئو باوہ! چُناک ہم اوڑتون اوار ہنانو۔”
ملخڑ تہ اونا دو ٹی ہلک اودے بیرُم آن بش کرے، ولدا اودے پیشن ہیس، ہراڑے اسہ بھلو کرسی ئس تخوک اسک و اونا مونا اسہ چُلہہ ئسیٹی پوغ آک لگنگ اسر۔
“ باوہ بھاز پیر، ولے بھاز کبین مسُنے۔”
ملخڑ اُست ئٹی پارے، ولدا بشخندہ کرسا اُراٹی ہِنا۔
باشکوف مُستی پِڑ ئے ہُرا۔ منَہ گز ئنا مُری آ بندغ آک مُچ اسر۔ مئی نا جلس مروئی اس۔ دا مُچی ٹی اوار مروکا کیہی مزور آتے او چائسکہ۔ چھار سال مہالو ئسکان او ہم دا مُچی ٹی اوار مسَکہ، حالانکہ فیکٹری آن اونا ریٹائیر مننگے نُہہ سال مسس۔ گوڈ آتا دڑد اودے ہچ کاریم ئسے نا الیتویسس۔ ہمو ہڈ آک و بند آک ہرا اونا تاغت اسر، داسا اونا نزوری جوڑ مسوسر۔ مُچا دے او لیپ آتیٹی دانگ اینگ نا وڑ وڑ ئنا کتاب خواناکہ، مار تہ فیکٹری آ ہناکہ، نواسہ غاک اسکول آ، اُراٹی اود و ملخڑ مسُرہ۔ ملخڑ اونا بھاز خذمت ئے کریکہ۔ اونا خذمت آتیٹی پیرنگا باشکوف تینا زائیفہ نا خذمت آتے گیرام کریسس۔ پیشن ہننگ تہ سلیسس، ہئو ولے، ہر سال مئی نا جلسہ ئے خف تورنگ کن او بسَکہ پیشن توسَکہ۔ او چائسَکہ کہ دا وڑ او تینا سنگت آتا خوشی و ڈکھ ئٹی اوار مریک، ولدا جلسہ نا ایسر ئٹی جلسہ کروکا تے اونا ضرورت ہم تماکہ۔
او بشخندہ کرے۔
او دو ئے سُرفے و کوٹ ئنا جیب ئٹی دو ئے شاغا، جیب ئٹی “کوپک” آتے حساب کننگ بناء کرے۔۔۔ یانزدہ کوپک۔۔۔ او حساب ئے چُھٹفے۔
“ہئو”
او تینا اُست ئٹی پارے:
“ داکان زیات اوفتے انت ضرورت مرو۔”
او بشخندہ کننگ اس، ہر سال ہندن مسَکہ، ہرا وخت جلسہ ایسر مسَکہ تو جلسہ نا بست و بند کروکا کمیٹی ئے سما تماکہ کہ فرنیچر و دری تا کرایہ کن اوفتتون پیسہ غاک کم تمانو، ولدا او اسٹ ایلو آن پیسہ خواہارہ، پَوڑی کریرہ و دُن کرایہ ئے تِسُرہ۔ ہشت نُہہ سال مُست وختس پیرنگا باشکوف ریٹائر مسس، ہندا ہیت مس تو او کُل ئے تورِسا پارے:
“ ای داسا پیر مسُنٹ، نوکری آن ہم فارغ مسنُٹ، تینا سنگت آتا جہد ئٹی اوفتتون عملی بشخ ہلنگ کپرہ، ہندا خاطر آن داسا ای دا جہد ئٹی ہندا وڑ بشخ ہلنگ کیوہ کہ مئی نا جلسہ نا بست و بند آتے نُم کبو، اخس پیسہ کم تما اوفتے ای ایتوٹ۔”
ہمو وختان او پنچ، ہفت، ہشت، دہ کوپک ترسا مئی نا جلسہ ٹی عملی بشخ ہلکئکہ۔
جلسہ بناء مسس۔ کیہی مزور اوڑے تولوک اسر۔
وڑ وڑ ئنا ٹھوپ بینوک و کُوٹنگا کاٹُم تا اسہ بندغی سمندر ئس خننگاکہ۔
پیرنگا باشکوف بشخندہ کرے، اونا بشخندہ ٹی زرس خرینی ہم اسک۔
“ہرا ٹھوپ بیناسُر، اوفتیان ہم بھاز آتا کاٹُمک کوٹ ءُ۔ نن مزوراک داخس زو انتئے کوٹ مرینہ؟”
مزوراک ترانہ خواننگ اسر۔ او پام ترسا بِننگ اس و اُست ئٹی ترانہ ہم خواننگ اس۔۔۔ او جوزہ ٹی بننگ اس۔ ترانہ آن گڈ اسہ ورناؤ مزور ئس تران کننگ بناء کرے۔
“بھاز جوش ارے بھئی دانا ہیت آتیٹی۔”
باشکوف اُست ئٹی پارے۔
“ دیر ءِ دا پوسکنا راہشون۔۔۔۔ خیر۔۔۔ دا فیکٹری ہم تو جہان نا وڑ ءِ۔ کس بریک، کس کائک، ولے۔۔۔
دانا ہیت آتیٹی بیرہ جوش ارے، دا وڑ تو ویل آک ایسر مفسہ۔ خیر، ورنائی نا جوش ءِ۔۔۔ دا بھٹی ٹی بِسو پیشتمو تو کندن جوڑ مرو معقولیت۔۔۔ او مخا تو اونا پیہُنا بروتاک لڑزار۔ معقولیت۔۔۔ اَراڑے ارے جہان ٹی؟ ہراڑے بین مرے، غریبی مرے۔۔۔ اوڑے معقولیت نا گزران امر مننگ کیک۔”
تلہ غا گڈیکو ہیت کروکا بندغ بسک، دا اناطولی اَس، خیسُنا مُرغنا بامُس، ہرادے وار وارا دو خلنگ و گوازی کننگ اونا عادت اس۔اناطولی مزور آتا راہشون ءِ، باشکوف اونا ستا ئے کرے، انت سوبرو بندغ ئسے، اُسل سمجوتہ کپک، لچک تو ارے ٹی تہ پولات افک، پیرنگا باشکوف خن تے تر کرے۔
“انت زیباؤ نیاڑی ئس اسک اناطولی نا زائیفہ۔۔۔ کھسک بیوس۔۔۔ ای اخس ہن ءَ بر کریٹ اودے تینا کنڈ آ پام کننگ کن، ولے دنو وفادارئس اسک، واہ۔۔۔ اخس زیبا اس۔۔۔ اخس وفادار اس۔”
بابو متکنا یات آتا نشہ ٹی آواننگ بناء کرے۔
چاپ ءَ کوکار نا توار ئے بِنگک او ہجم کرے۔
جلسہ ایسر مس، بندغ آک ہِننگ اسر، نعرہ خلسا، ناچ کرسا، شئیر پارِسا۔۔۔
بھاز آ بندغ آک اونا رہا بسُر، اودے سلام کریر، اونا کبینا بے ڈول آ دو ئے تینا دو تیٹی ہلِسا باسُنا دو تیٹ پِڷار ٹھپارہ۔ کس اونا گوڈ آتے دو خلک و کس ڈغار آ اونا رہا توس۔ او بشخندہ کننگ اس۔ حال حوال کننگ اس و کسر ہروک اس۔۔۔
او چائسکہ کہ داسا کمیٹی نا بندغ آک حساب کتاب کننگ مرور، ولدا اوفتیان اسٹ دود نا رِدئٹ اونا رہا برو۔
“بابا باشکوف صاحب۔۔۔ شش کوپک کم تمانو۔۔۔ ہفت روبل۔۔۔ ہشت روبل۔۔۔ دہ روبل کم تمانو۔”
او جیب ئٹی دو شاغو، کوپک تے کشیسہ حساب کرو اودے ایتو۔ او منتوار پارِسا سلام پارو و ہنو۔
پیرنگا باشکوف اوور کوٹ نا جیب آن کُل کوپک آتے کشا تینا مُٹ ئٹی ہلک۔۔۔
جلسہ نا پِڑ ہورک مسس۔ تینا پیرنگا خن تے چنجی کرسا او منَہ بندغ ئے ہُننگ اس ہرا تلہ نا شیفا سلوک اسر، او اوفتا توارئے بِننگ کتوکہ، اگہ توار اودے سر مسئکہ تو بِنگکہ کہ اسٹ پاننگ ءِ:
“ پیسہ غاک تو پورو ءُ بلکہ اِرا کوپک ودیک ءُ۔”
“ دا ہم جوان مس۔”
ایلو مزور پارے:
“ ہر سال نن بابا باشکوف ئے تکلیف تسُنہ۔”
“ ای اوڑان پیسہ خواہنگ آ بھاز ملامت مسُٹہ، کاریم اف تہ، پیر ءِ، ناجوڑ ءِ۔۔۔ نن اودے کمک کننگ نا جاگہ غا اوڑان۔۔۔۔”
“ ہئو او تینٹ اندن خوائسکہ۔”
ایلو پارے:
“تینا خوشی ئٹ تسکہ۔”
“ہان جوانے فارغ کبو فرنیچر و دری والا تے۔۔۔”
“ ہئو۔۔ ہئو ای ہم پیسہ غاتے ایتوہ۔”
“ بابا باشکوف توسُنے۔۔۔ کانبو، اوڑتون سلام دعا ئس کین۔”
“آخہ او اندا پُہہ مرو کہ نن پیسہ خُواہنگ کن بسونُن، شام ئنا برون۔”
“ہئو! جوان ءِ، شام ئنا برون اوڑا۔”
بابا باشکوف ہُننگ اس، اسٹ اسٹ آ کُل اِلار ہنار۔ داسا اونا خن تا مونا ہورک آ پِڑ اسک۔ کرسی، ٹیبل، تلہ نا تختہ، دری، کُل ئے ڈوہاسُر و اونا مونا ٹانگو مڈی ئے ہرفِسا ہنا۔
اودے اندن گمان مس کہ اونا بدن نا تیبہ دتر ترندی ئٹ اونا کاٹُم آ لگنگ ءِ، اندن کہ چَپی تولوک ءِ، لڑزنگ ءِ۔۔۔
چُلہہ نا پوغ آک پُھدین مسُنو۔
“تو داسا دافتے کنا بکار اف۔۔۔ ای تینا سنگت آتا جہد ئٹی ہچ وڑا اوار مننگ کپرہ۔۔۔”
اونا مار و نواسہ غاک، جلسہ غان گڈ جلوس تون ہناسر، ہرا وخت او بسُر تو اونا کبین آ کاٹُم اونا سینہ نا پارہ غا لڑوک اس، مار توار کرے۔
“باوہ بر، داسا تہٹی کان۔”
اونا اسہ نواسہ توار کرے:
“داڑے ہُر، کوپک آک ڈغار آ تموک ءُ۔”
منَہ کوپک اونا مُٹ ئٹی داسکان اسر۔
او کھسکَسس۔۔۔
ملخڑ، مار و نواسہ غاک اوار اودے ہرفیر۔۔۔ ملخڑ نا خن تیان خڑینک آک زِرنگ اسر و اُست ئٹی پاننگ اس:
“باوہ۔۔۔ اخس سُبک مس۔۔۔”!
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔