سفر زند و شاعری
نوشت: نزار قبانی | مَٹ: عتیق آسکوہ بلوچ
پانزدہمیکو بشخ
ہنپ
ہراتم ای اگست 1945 ئٹ شام نا سفارتی شعبہ ئٹ اوار مسوٹ او وخت کنا وہم و گمان ئٹ ہم اَلو کہ ای ہالینڈ نا چُک اس مروٹ و کنا دنز تیوہ غا براعظم آتیٹ تالان مرو۔ ہرا دے شامی سفارت ئٹ اسہ باسک ئسے نا رِدئٹ کنا اواری مس او وخت کنا سن بیست و دو سال ئس۔ ہراتم طیارہ، دمشق نا مینار، گنبد و باغ آتے پدی ہلا، آسمان ئٹ بڑز مس گڑا کنے گمان مس دنکہ ای ارضی و دیہاڑی اُست خواہی تیان کشکنگ اُٹ۔ شاعر کن وزن نا ایسری نا مارنگ چس کروک و جارات تروک مریک۔ دا مارنگ دا ہیت ءِ ممکن کیک کہ وہ تینا بدن نا گوانی درغ آتے پٹ و پول کے و تینا فکر و ہور تیا ساڑی پیشن نا باریم آن آجو مننگ کے۔
سفر نا گوازی کنے زَبر لگا و ای دوارالبحر (Sea-Sickness) نا عادتی مریسہ ہناٹ، داڑاسکان کہ دا جاز آتا تلہ غاک کنا بیرُم و طیارہ غاتا نشست آک کنا وطن جوڑ مسر۔ ای دا سفری گوازی تون بیست سال (1945-1966) اسکان تفوک مسوٹ، داڑ اسکان کہ کنا اُست زالبول نا بیگ نا ڈول پُر مس، ڈغار نا ڈول دا اسہ کُرہ اس جوڑ مس و چین نا اسہ شار ئسے نا ڈول بندغ آتیان پُر جوڑ مس۔ قاہرہ نا دیمون آن ہلیس استنبول نا مینار آتے اسکان، ہانگ کانگ نا پِر، روم نا فوارہ غاک، لندن نا یخ آ مہر، اسکاٹ لینڈ نا مرتفع خریسی، ماسکون نا برف، تھائی لینڈ نا معابد، چین نا بھلا دیوال، رائن نا شراب، ساہ ژرماں )پیرس( نا تلہ والا کیفے، ہسپانیہ ئٹ بُل فائٹنگ نا پَٹ، غرناطہ ئٹ رومی غار آک، ہالینڈ ئٹ گواڑخ نا باغک، سائٹزرلینڈ نا بلوریں جُوْک، نیس و مونٹی کارلو نا ریک آتیا رنگ رنگی چھتریک، و خیسن آ خشت آتیان ٹہیفوک لبنانی اُراک۔
ہر ارفوک گام تون کنا اُست بھلن مسکہ، کنا خن تا پڑدہ شابیت مریسہ مسکہ، تہہ ئنا دُونک پُر مسورہ، کنا تہٹی ساڑی بدو لطیف، ساف و شرفدار مریسہ ہناکہ۔ جہان، اونا شار، بولی و ربیدگ آتیتون ہڷ و تس کنا حافظہ ءِ اندن کریسر دنکہ دا اسہ کیمرے ئسے نا حافظہ مرے ہرا اسہ گڑا ءِ بے خیال کپک، اسہ گڑا غان مون ہڑسیپک۔
دا شابیت آ خزانہ آن، ہراٹی چھٹیک، رنگ، توار آک، سمندری جاز آتیا بروک تُرند آ گند، ہوٹل آتا زباد ہرا مہمان دروشم تے نوشتہ و تڑیفک، ریل گاڑی نا کھڑکیک ہرا کسر ئٹ بروک ہزار آ درخت آتے رخصت کروک آتا دسپاگ آتے، دمدر کیفے و قہوہ نا ڈکھ آتیان پُر پیالہ ءِ کیدرہ، و دوارہ انداڑتون کتاب و بندغی ذات نا تہٹی کروک سفر آتیان، کنتون اسہ شعری دریا اس وجود ئٹ بس۔ دا دریا نا لوز آک اسہ خاص ڈیہہ یا وطن ئسے آن تعلقداری تخپسہ۔ دا شعری دریا نا ہچو شاری چاہنداری اس اف، دا نہ دمشقی ءِ نہ مصری، لبنانی ءِ نہ ہی فرانسیسی، نہ انگریزی ءِ و نہ ہی چینی یا ہسپانوی۔
ای تینا شاعری ئٹ تیوہ غا جہان نا شاری چاہنداری تے ارفوک اُٹ و کنا تعلقداری اسہ مملکت ئسے آن ءِ، و او مملکتِ بندغ ءِ۔ اندا کنا اسٹ آ بنماسی ہمگرنچی ءِ، اندا سوب ای اسہ سیاسی جماعت اسیٹ اوار متوٹ، و نہ اسہ ہم ڈول نا جمعیت اسیتون تفوک مسوٹ۔ کنے دا ہیت آ بِسٹ باوری ءِ کہ اسہ ہم تعلقداری، چاہے او اخس مثالی و ساف مرے، اسہ نہ اسہ شعری بگھی اسیٹی تفوک مریک، ہراڑتون خاص زمانہ ئسے نا مہم جوئی ئسے نا ہُلی تفوک مریک، و دوارہ دا تعلقداری اودے تینا گواچن کسر آن مُر کیک۔ گڑا ای تینا چار آن مسہ بشخ شاعری کن تینا سفر نا منتواری اٹ۔ ربیع صدی آ تالان تیوی جہان نا جتا بالی پَٹ آتیا دڑنگ و بال کننگ آن گڈ ای سوج ارفیوہ کہ نما خیال ئٹ کنا شاعری نا گچینیک انت مسرہ اگہ ای تینا ملک نا خاک ئٹ میخ نا ڈول جِک مروک مسوٹہ؟ ای شاعری نا حالیت ءِ نمن کرینٹ، یعنی درخت والا حالیت ءِ، و شاعر نا قدر ءِ گچین کریٹ، یعنی چُک والا حالیت نا، دا سوب کہ درخت چاہے اخہ در کوشست کے تینا جاگہ ءِ بدل کننگ کپک، نہ تینا بُنچخ نا ہند ءِ بدل کننگ کیک و نہ تینا پَن آتا دروشم تے۔ ہراڑاسکان چُک ئنا معاملہ ءِ، اونا تیوہ غاتیان اہم آ گچینی اندادے کہ وہ ہر ساعت اسہ پوسکنو وطن اس پٹنگ نا لائخی تخک۔
کنا سیالی شاعر آتا ہمو خانہ بدوش )جپسی( کُڑدہ آن ءِ ہرا تینا گاڑی، گٹار و شراب نا جام ارفوک پیری کیرہ و ہر ہمو زمین ئٹ گدان خلیرہ ہراڑے اوفتے شاعری، مابت و آزاتی رسینگے۔ سفارت کاری کنے بھلا ماڑی تیا درے سر کرے۔ ای بادشاہ، ملکہ، امرا، اشراف، جمہوری ملک آتا سرکماش آتیتون واخب مسوٹ۔ دا تیوہ غاتیتون اوڑدئی آن گڈ کنے آ دا گواچن درشان مس کہ شاعری تنیا بادشاہ تا بادشاہ ءِ۔ ای ہرا شاہی محل ئٹ پیہاٹہ، ای ماراٹہ کہ بلّوریں فانوس، گوبلن نا قالین، اوپل نا رزانک، ریجانس و شہنشاہ لوئی شانزدہمیکو نا نشست آک، مِس ئنا چمچہ غاک، چاندی نا شمعدان، دا تیوہ غاک کنے اسہ شاعر ئسے نا رِدئٹ بخیر کننگ ئسر، سفارت کار ئسے نا رِدئٹ آخہ۔ انداکا دوارہ کنا گواچن و کنا پیشہ، دروشم و دروغ نا پلویڑ نا نیامٹ ہمو مونتس بناء مس ہرا بیست سال اسکان برجاء مس۔ سفارت کاری ہمو پلویڑ ئس ہرادے ای خاص وخت آتیا بیناٹہ۔ سفارتی محفل آتیٹ ای اسُل ہمو بے وسی تون ہناٹہ دنکہ ہمو خوانندہ مدرسہ تو ہننگ ءِ ولے اودے دوست تخپک۔ معصومیت نا ساعت آتیٹ ای اخہ وار ٹَک خلکٹ کہ ای دروغ نا لِواس، پیہن و موْن ٹائی و گروشکی بوٹ آتے خاخر ایتیو، سفارت کار آک ہرافتے بیننگ نا عادتی مریرہ، و اسہ شپاد چُنا یا بے سوار ہُلی نا ڈول پِر ئٹ ددینگسہ پیری کیو۔
سفارتی جہان موم ئنا عجائب خانہ ءِ۔ داڑے ساڑی ہر گڑا جوڑکروک، دروغ نا و بیدس گواچن ءِ۔ داڑے تخوک تیوہ غا گڑا تیا نشان تس نا و دروغ نا اسہ اندنو رنگ اس خلوک ءِ کہ اسہ سیلہ اسیکن ہم ممکن اف کہ کائے پیہے۔ سفارتی بولی زی آ آبازی کروک تالان بولی اس مریک۔ باہ ئنا دامون ایمون پوچکو تا ڈول تِرک ایتک و ہموڑے تینا مرگ مریک۔ دا نہ اسہ گڑاس ءِ رژنا کیک و نہ دانا اسہ مطلب اس مریک؛ دا نہ گڑاس ہلیک، نہ گڑاس ایتک۔ دا بیرفوک پُھل آنبار ءِ، شوخ آ رنگ ولے گند آن ہورک۔
سفارت کاری نمائندگی نا شعبہ ئسے، ای دا کاریم ئٹ چاہندار مننگ کتوٹ۔ کنا فطرت نمائندگی آن نمن ءِ۔ اسہ شاعر ئسے نا دروشم ئٹ کنا شرف و پِڑ لوز آتیتون گنڈوک ءِ، و کنکن دا تیوہ غاتیان بھلا المیہ مرو کہ کنے رَد شاغوک لوز آتا درشانی آ بیوس کننگے۔ کنا دوست و بد بروک بولی تا نیامٹ شیزوفرینیا نا دا تُرند دروشم یانزدہ سال اسکان برجا مس و کنا پیشہ کنے دوست بفروک بولی ءِ پاننگ آ بش ایتک۔ دوارہ ہیت داڑ اسکان سرمس کہ 1966 نا ہتم نا مُد ئٹ کنا شعری لغت دا لائخ مس کہ سفارتی بولی نا ایسری ءِ کننگ کے و اِرا ونڈ مروک کنا وجود ءِ اوار کریسہ اسہ بدن کے۔ 1966 ئٹ سفارت کاری آن کنا استعفیٰ ہمو ارٹمیکو بندغ نا آجو کننگ ئس ہرادے زوت ساندہی تینا مون ہنوک و قانون آن موْکل گاڑی تا پیہہ شیڑتیفسہ تخوسر، ہمو پہیہ غاک ہرافتیان نوشتوک مسکہ: ہیئتِ سیاسی۔
تینا سفارتی زند ئنا ایسری آن گڈ ہراتم ای بیروت ئٹ تینا دفتر نا میز آ توسٹ و ای تینا اولیکو سگار ءِ لگفیٹ گڑا او وخت ہمو بادشاہ نا ڈول کبریائی گمان مس ہرادے اولیکو وار طاغت رسینگے۔
قاہرہ اولیکو سفارتی مشن ئس ہراڑے کنے رادہ کننگاسس۔ او وخت ای ورنا ئسوٹ و کنا سن بیست و دو سال ئس۔ ای اوڑے مسہ سال (1945-1948) گدریفیٹ۔ کنے آ قاہرہ نا ہمو زیم تما ہرا ہتم نا وخت درخت آ مریک۔ 1948 ئٹ شینک مروک کنا ارٹمیکو شعری مجموعہ طفولۃ نھد )خد نا چُنک سنی( آ قاہرہ نا ہور تا نشانک پاش وڑئٹ خننگ مریرہ۔ اوننگے گڑا کنا شاعری ئٹ طفولۃ نھد اسہ الّمی تہذیبی ہنپ ئسے۔ قاہرہ کنا مارنگ، کنا چمشانک و کنا شعری بولی ءِ گروشک تس و کنے دا صحرائی دنز آن آجوئی تس ہرا کنا سِل آ لچوک ئس۔ چِل ئنا دہ یک ئٹ قاہرہ زہرۃ المدائن )شار تا گچین پُھل( و عرب دارالحکومت آتا دارالحکومت ئس، او فکر و فن ئنا چمن ئس ہرانا مَٹ بھاز سخت ءِ۔ کنے دا ہیت آن خوشی مس کہ ای ادبی، فنی و صحافیانہ بنجا ئٹ اونا گشادہ درغ آن پیہاٹ و اونا گچین آ عالم فاضل بندغ آتیتون درستی مسوٹ، دنکہ استاد توفیق الحکیم، استاد ابراہیم عبدالقادر المازنی، سازندہ محمد عبدالوہاب، شاعر کامل الشناوی، شاعر ابراہیم ناجی، شاعر احمد رامی، استاد محمد حسنین ہیکل، نقاد استاد انور المعداوی ایماندار۔
کنا شاعری ءِ اولیکو شون تروک نا داد انور المعداوی کن کاہک۔ اللہ اوڑا رحم کے، او قاہرہ ئٹ 1948 ئٹ شینک مروک کنا شعری کتاب طفولۃ نھد کن بھاز جوزہ تخاکہ۔ دا کتاب کن اونا جوزہ نا ترندی داڑاسکان سر مس کہ او الاستاذ احمد حسن الزیّات ءِ، ہرا مصری رسالہ ‘الرسالۃ’ نا خواجہ ئس و ہرا معداوی نا لائخی تا قدر کریکہ و اونا شرف تخاکہ، دا ہیت آ امنا کرفے کہ او الرسالۃ نا پنہ غاتیا اودے شینک کے۔ الرسالۃ جہان عرب نا ادبی ندارہ ئٹ بھلو پِن اس تخاکہ۔ معداوی کنا کتاب طفولۃ نھد آ نغدکار چمشانک ہم شاغا۔
تیوہ غاتیان چس کروک ہیت، و بلکن کنا ادبی زند ئنا تیوہ غاتیان زیات چس کروک ہیت، دا مس کہ المعداوی نا مقالہ الرسالۃ ئٹ شینک مس دنکہ اودے ٹہیفوک وخت آ شینک مروئی ئس، ولے الرسالۃ نا ربیدگی سوبری و پِنی مننگ نا رِدئٹ استاد زیات ءِ جُوان لگا کہ او کنا شعری مجموعہ نا پِن “طفولۃ نھا” )خد نا چُنک سنی( آن بدل کریسہ “فطولۃ نھر” )دریا نا چُنک سنی( کے۔ دارکن او تینا ناقد سنگت انور المعداوی ءِ امنا کرفے۔ و الرسالۃ نا ربیدگی خوانوک آتے ہم اُست جارات کرے ہرافتے “نھد” نا لوز بھیم نا گواچی و اوفتا شرف ءِ تُرڈیفیکہ۔ ولے دُن او کنا زیبا غا کتاب نا رغ رغ ءِ تڑے تخا۔
قاہرہ آن گڈ ای اللہ نا زمین آ دربدر مریسہ کریٹ و کنا ہِسک تیوہ غا سمندر آتیا تالان مسر، دنکہ بدھ مت نا منوک آتے ہشنگ آن گڈ اوفتا ہِس تے تالان کننگک۔ کنا تیوہ غا سفارتی آزموندہ غاتیان اِرا آزموندہ کنا شعری دیہاڑ ئٹ بھاز درشان مروک و فیصلہ کروک پَک مسر: انگریزی آزمونہ و ہسپانوی آزموندہ۔ لندن ئٹ (1952-1955) خاکستری جمر کنا پنہ و کتاب آتیا شلار و دے ٹکی آفتاب لندن نا کڑمب ساف پڑدہ تیٹ اودیم مسر۔
انگریزی آزموندہ کنے تہذیبی و بندغی سانچہ ئٹ شاغا، ہرانا کنے تیوہ غاتیان زیات خواست اس۔ رائل فیسٹیول ہال و البرٹ ہال ئٹ ای جہان نا زیبدار آن زیبدار زیمل تون گدریفیٹ۔ کینٹ نا چمن آتیا، بورن ماوتھ نا دیوال تیا ردوک بوچ آتیا، و لندن نا تھیٹر آتیٹ ای تینا زند ئنا تیوہ غاتیان زیات آبات دے تے گدریفیٹ۔ لندن کنے فکری جارات تس و اونا پِر ملاسی نا خلوک کنا دے ٹکی بوچ آتے غسل تس۔ لندن نا شابیت و بے ایسر مروک چمن آک کنے آزاتی نا اولیکو سبخ آتے تسر۔ آزاتی نا دا مدرسہ ئٹ ای تینا گچین آ شاعری تے نوشتہ کریٹ ہرا زیات تر بندغ نا بابت ءُ۔ شاعری نا دا کتاب نا پِن قصائد )نظم آتا کتاب( ءِ۔
ہراڑ اسکان کنا زند ئٹ ہسپانوی آزموندہ (1962-1966) نا تعلقداری ءِ، دا دیہاڑی و تمدّنی لاڑ و جوزہ نا تلہ درشان مس۔ عرب رِدئٹ ہسپانیہ اسہ بے سگنگوک کاٹم خڷ ئسے۔ اونا ہر خَل نا شیف آن اسہ خلیفہ اس تُنگان ءِ، ہر پاٹ نا درغ نا پد آن اِرا موْن ءُ خن ساڑی ءُ، و قرطبہ نا اُرا تیٹ ہر فوارہ نا شار و شِیر ئٹ اسہ اندنو زالبول ئسے توار بننگ ئٹ بریک ہرا واپس بفروک تینا شہسوار کن خڑینک خلنگ آ مرے۔ اَندلس نا سفر خڑینک آتیان پُر جنگل نا سفر ءِ۔ وختس دُن متئو کہ ای غرناطہ ہنانٹ و الحمرا نا ہوٹل ئٹ ہڈ کرینٹ و کنتون کنا اندلسی بالشت نا شیف آن دمشق تنگان مف۔ دمشقی یاسمین، گلِ کوکب، سور مالٹا و نسترن نا زباد ہوٹل نا کمرہ تیٹ کنتون اوار مسرہ، داڑاسکان کہ غرناطہ ئٹ جنّات العریف نا باغ آتیٹ دمشقی پشی تا میاوں میاوں ہم اوار مسکہ۔ غرطانہ نا اسہ پشی اسیتون ڈرامائی کسہ کنے دائسکان یات ءِ۔ او جنّات العریف نا چمن ئٹ پیری خلوک سد آ پیشن ملکی سوات کروک آتے یلہ کریسہ بیرہ کنا رند ئٹ بس کہ تینا اُست ئنا ہیت آتے کنتون کننگ کے و کنتون عربی ڈول ئٹ، انتیکہ پشی تا دیہاڑ داڑان بے سما ءِ، غزل تران کننگ کے۔ او اسہ عاشق زالبول ئسے وڑ کنتون لچا، تینا دوی ءِ کنا موْن و لخ آ پیری تننگ آ لگا، کنا تیرمئی قمیص نا بٹن تے ملنگ آ لگا کہ کنا اُست ئنا درپہ غاتے بننگ کے۔ دا پشی دیر ئس؟ دا پشی تون کنا اوڑدئی ءِ پنچ سال گدرینگا ولے ای باوری تخیوہ کہ اونا تعلقداری زیبا عربی پشی تا ہمو زنک آن ئس ہرا ہمو کشتی ئٹ سوار ئسر ہرا ہفتمیکو صدی ئٹ طارق بن زیاد ءِ ارفیسہ ہسپانوی کرک آ سر مسوسس۔
ای میڈرڈ ئٹ چار سال گدریفیٹ، ولدا ای واپس بسوٹ، و کنتون کنا کتاب آک، میڈرڈ نا آسمان نا اسہ ٹکر ئس، اونا زالبول تا خن تا باسنی، اونا گٹار آتا خڑینکی خنک، بُل فائٹنگ مونتس نا داستانک، اونا ناچ کروک مسن تا ہور تا شرارہ و اونا مغنی تا مونجھا غا دریا ئس۔
ای ولدپینیا نا انگور تیان جوڑ مروک شراب نا ہر جام ءِ نوش کریٹ۔ اوٹی لورکا نا دتر نا زباد ئس۔ دیگر ایسر آ دریائے وادی کبیر نا کرک آ زیتون نا درخت رافیل البرتی، انتونیو مچاڈو، خوان رامون خیمینیز و گستاو والونسو بیکر نا شئر تے پاریسہ بنفیرہ۔ ہسپانیہ کنا لوز و کنا ہڈ آتا بند بند ئٹ پیہاسس۔ فلیمنگو نا ناچ کروک آتا ہور تیا ساڑی کاستانویلاس نا ساہ رغ کنا و کنا لوز آتا ساہ رخ نا بشخ جوڑ مسوسر۔ دا ہسپانوی زیم آک 1966 ئٹ شینک مروک کنا شعری مجموعہ الرسم بالکلمات )لوز آتیٹ عکس کشی( و نثری نظم آتا کتاب مذکّرات اندلسیۃ )اندلسی یات آک( ئٹ پورو درشانی تون نشخ مسونو۔
تیوہ غاتیان الّمی ہیت ہرادے ای ہسپانیہ آن ہیل کریٹ او گڑا تیان چس ہلنگ و اوفتا بابت درشان کننگ ئٹ ترندی ءِ۔ ہندی مسالہ غاتیانبار ہسپانیہ ئٹ ہر گڑا باسن و ہشوک ءِ۔ ہسپانوی مابت وہوک دتر ءِ، شراب وہوک دتر، تونگری وہوک دتر، شاعری وہوک دتر، چھاپ وہوک دتر، و اشبیلیات ئٹ کشار کروک خیسن آ گلاب ارے ہی وہوک دتر۔ ہسپانی جوش و جوزہ و چِک تاڑ زمین ءِ۔ اسہ بندغ کن مننگ کروک اف کہ او داکان گدرینگے یا داڑے ہندی مننگ آن گڈ بے تعلق سلینگ کے۔
بے تعلق اسہ اندنو لوز ئسے ہرانا ہسپانیہ ئٹ ہچو معنہ اس اف۔ بیرہ پیرنہ نا ہد ہویل ئٹ پیہنگ آ، یا بارسلونا نا کرک آتیا بننگ تون، نی پُرجوزہ گوازی نا اسہ پارہ نا باسک اس مریسہ و منٹ آتیٹ ہشنگوک جنگل آتا درخت آتیان اسہ درخت ئسے نا دروشم تینا کیسہ۔ ہمینگوے چائسکہ گڑا تیان بے تعلقداری کننگ اونا مرک ءِ۔ و امریکہ اودے ہمو جوزہ ئی ایب کیب تننگ آ تیار اَلو ہرانا اسہ افسانہ نگار ئسے نا رِدئٹ او پٹ و پول ئٹ ئس۔۔۔ ژل، ہیم برگر، و یخ تفوک خوراک نا دود ہمو ایب کیب ئس ہرا اوڑا زند ئنا باسنی و رومانیت ءِ پُلاسس۔۔۔ گڑا او تینا کتاب آتا باریم ءِ ارفے و ہسپانیہ غا بس کہ داڑے اسہ ہسپانوی کاریگر ئسے آنبار تینا دلیری و زیبائی نا داد تریسہ کہنگ کے۔
کنا جاز چینی کرک آتیا ہم لنگر بٹیرے (1958-1960)۔ گڑا کنا چینی آزموندہ امر مس؟ اگہ ای اسہ شاعر ئسے نا رِدئٹ چین نا بابت ہیت کیو گڑا اوڑا بھاز تادی کروٹ۔ اگہ اودے اسہ ربیدگ نا چاہندار ئسے نا رِدئٹ اُریو، بھلا بھلا بندغی آزموندہ غاتیانبار کسہ آزموندہ ئسے آنبار، گڑا اونا لخ ئٹ پُھل آتا ہار شاغوٹ۔ شعری رِدئٹ، چین کنکن حواسِ خمسہ نا لیک آن پیشن سلیس۔ چینی بست و بند حکومت نا حالیت و سفار کار آتیا سخت ڈول نا رکھ آتا سوب ای دا لائخ متوٹ کہ چینی مخلوق تون حال احوال و اوفتون اسہ ڈول نا گپ تران اس کننگ کیو۔
دیوال چین اسہ دیہاڑی یا رمزی دیوال اس اف بلکن اسہ گواچنی دیوال ئسے ہرا اسہ غیر چینی ءِ اوٹی ٹُنگ کننگ نا موْکل تفک۔ ای ہمو چین ءِ خننگ کریٹ ہرادے اوننگ نا ننے موْکل تننگا۔ دا اوننگ انداخس ءِ کہ اونا قطر سی میل و اونا بنجائی شار بیجنگ ءِ۔ سلیس ہیت ایلو شار تا گڑا اوفتا سفر آخ سفارتی مسورہ ہرانا بست و بند چین نا وزارت خارجہ ئٹ پروٹوکول ڈپارٹمنٹ کریکہ۔ دا سفر تیٹ نا چرینگ اندن مسکہ دنکہ پرائمری اسکول نا چناک تینا اسکول نا ہیڈماسٹر تون سیل و سوات کریسہ کیرہ۔
کنا اُست خواہی مسکہ کہ چینی بانس درخت نا شیف آن تنیا تولیو، یا تنیا کنول نا پُھل ئنا زباد گند کشیو، یا اسہ چینی مسڑ چُنا ئسے تینا دو تیٹ ارفیو ولے دا چنائی اُست خواہی تا پوروی مننگ کتوکہ۔ بانس نا تیوہ غا درخت آک، کنول نا تیوہ غا پُھل آک، چین نا تیوہ غا چُناک ناولد آتیتون ہیت کپسہ، و اگہ ہیت کننگ خوار گڑا اسہ سرکاری مَٹ کروک ئسے نا مننگ الّمی مریک ہرا دا چُنا تا ہیت آتے رجسٹر ئٹ نوشت کریسہ کیک۔ ای چینی مخلوق ءِ اوفتا فطری دروشم ئٹ اوننگ خوائسوٹہ، او امر مخرہ بشخندہ کیرہ، امر شئر پارہ، امر زیبدار رزان تیا نشخ نگار کیرہ، امر یاسمین نا چاہ کنیرہ، و امر چُک آتیانبار پاٹی چھڑی تیٹ برنج نا دانہ ارفیرہ، ولے ای بے سُہب مسوٹ و ای تینا بے سہبی آ بھاز مونجھا اُٹ۔
ہرا شاعر تینا سرحال تون کُنٹ ہنپک و اوڑتون ہڑدے مونتس کپک، او روشنائی نا گڑد لیک آن پیش مریک۔ چین اسہ براعظم ئسے، لکھ ٹیکی تیان پُر ہرا سحر و گوڑینگ تون پیڑوک ءُ۔ اونا مزاج شاندار ءِ، اونا ہندیک ہنینی و ملائی نا اوار ایسری ءُ، ولے چین تینا عشاق نا مون آ اسہ پینگن ءُ سرکاری پچخ اس شاغانے ہرا اونا زیبائی و جمال نا اخہ دروشم اودیم تخانے۔ ای خواہسوٹہ کہ چین نا مابت ئٹ اسہ نظم اس نوشتہ کیو، ولے اختئیک کنے داڑان توروک مسر، و بام ئنا ندارہ نا در بند سلوک مس۔ داڑان بیدس ہم کہ چینی معجزہ کنے تینا رعب ئٹ دزگیر ہم کرے ہرا اسہ ارب بندغ ءِ ناجوڑی، بینگنی، افیون و استعماری پنجہ آتیان دو خلاسی تس۔
اگہ انصاف و بیدس پلوْ ہلنگ آن ہیت کننگ مرے گڑا ای پاروٹ کہ ہرا بندغ چین ءِ سرپد مننگ خواہک او بائدے تینا مسکوئی خیال آتیان ہورک مرے و معامہ و گڑا تیا، تینا دلیل نا جاگہ غا، چینی دلیل تون ہیت کے۔ اگہ او دن کیک گڑا او چین ءِ اونا قول و کاریم ئٹ حق آ خنو، سوب دادے کہ استعماریت چینی تے کچک و پشی نا ہند آ سر کرینے و استعماریت نا خرینی و سوری داسہ ہم اونا دوی نا شیف آن ساڑی ءِ۔ چین ئٹ کنا شعری کشار کمبوتی نا گواچی مس۔ اوڑے کنا شعری آمد نا حالیت اندن اس دنکہ شعری حافظہ نا چیرزمین کوڑ آن دیر کشنگے۔
چینی سفر نا وختا کنا زند آ ہرا رنگ تالان مروک مس او پوشکنا رنگ ئس۔ پوشکنا رنگ پینگن، جارات تروک و تہذیبی رنگ ءِ۔ کنا نفس و پوشکنا رنگ نا نیامٹ مروک اوڑدئی آن ہرا چُنا ودی مس اونا پِن ءِ حُزن۔ اولیکو وار حُزن کنے آ دے ٹکی ایشیا نا جاندمی پارہ غا جلہو کرے، دنکہ اسہ پالن پرہ والا طائرِ نورس مرے؛ داڑان مالو طائرِ حُزن تون کنا اوڑدئی متویسس، نہ ہی اودے تینا مچاچک آتیا کدام کننگ نا موْکل تسوسٹ و نہ دا ہیت ئنا موْکل کہ او کنا کمرہ ئٹ و کنا بیرم آ کنتون شریک مرے۔
ای ساندہ اسہ ہُلی ئسے آنبار مسونٹ ہرا خوشی و گل بالی نا زمین آ دُدینگ آ مرے، دیمون، بئے و آزاتی نا سوب خوشی آن شاکارنگ آ مرے۔ چین ئٹ کتاب آتیا پوشکنا پُھل آک ردار، دوارہ اوفک بھلن مریسہ کریر داڑاسکان کنا پنہ غاک خڑینک نا جنگل ئٹ بدل مسر۔ دا خاکستری آہنگ کنا پوشکنا نظم آتیان اِرا نظم ئٹ تیوہ غاتیان زیات بِننگ مریک و اوفک ءُ “نھر الاحزان” )ڈکھ آتا دریا( و “ثلاث بطاقات من آسیا” )ایشیا نا مُسہ ٹکٹ(۔ حُزن نا ودی مننگ تون، دروں بینی کنا کمکاری کرے و دن چین ئٹ کنا پورو اِرا سال دروں بینی ئٹ ڈُب ہلوک مسر، دوارہ اونا درشانی دے ٹکی زالبول نا مَٹ مننگ نا دروشم ئٹ مس، دیہاڑ نا دیوال تیا، جاہلی بد بننگ و قبیلہ نا خنجر آتا پلویڑ ئٹ مروک زالبول۔ دا گوڑیفوک ڈرامائی بدلی نا زیم آک ئسر ہراڑان کنا کتاب یومیات امراۃ لامبالیۃ )بے پروا زالبول نا ڈائری( مونا بس۔ دا کتاب بیروت ئٹ 1968 ئٹ چھاپ مس، یعنی اونا لکھنگ آن دئے سال گُڈ۔۔۔
کتاب نا دا باب “ہنپ” پورو کننگ کن کنے داسہ لبنان نا بابت ہم ہیت کروئی مرو ہرا 1966 نا ہتم نا مُد تون کنا و کنا لوز آتا وطن جوڑ مسوسس۔ گواچن دادے کہ لبنان تون کنا تعلقداری اسہ ہلہلہی تعلقداری اس اف۔ ہرا تاریخ نا پارہ غا ای داسہ اشارہ کرینٹ او بیرہ اسہ چنکو علامت ئسے، دا ہمو کسر نشان تیان اسٹ ءِ ہرا کنا اُست و لبنان نا کرک آتا نیامٹ تالان ءُ۔
لبنان تون کنا تعلقداری وختس ہم سیل و سوات ڈول نا متئو ہرا بیبلوس نا کرک ہویل آتیا سر مریسہ ایسر مریک، یا کازینو نا ہال نا خڑک سر مریسہ، یا دوارہ جمعیتا نا غار نا چھت تون ٹنگوک روشنائی نا گچھوں آتا رہی آ سرمریسہ تینا ایسری آ سر مریک۔ دا تعلقداری تو اوڑان بھاز زیات مُتکن و کُڑمب ءِ۔ لبنان ہمو رزان ءِ ہراٹی کنا شاعری مُچ مسونے۔ دا رزان کنا شاعری ءِ دروشم، رنگ و زباد تسونے۔
لبنان نا زمین ئٹ ای تینا بنائی نظم آتا بِج آتے کنڈ کریسٹ، اوفتے تینا سینہ تون خلکوسٹ، اوفتے خوراک تسوسٹ و اوفتے سیر دیر کریسٹ داڑاسکان کہ دا پینگن درخت آتا اسہ جنگل اس جوڑ مس ہرانا سیخاک بھاز مُر اسکان تالان مسونو۔ کنا توار لبنان نا مِش ئٹ اوار مسونے۔ ہچو لبنانی کُچ اس دنو اف، چاہے او مَش تا ٹیڑ آ مرے یا سمندر نا رہی آ، ہرانا خل تیا تینا لوز آتے نوشتہ کتنوٹ۔ بیروت آن جونیہ، طرابلس، صیدا، زحلہ، بعلیک، نطبیہ، بحمدون، برمانا، و زغرتا اسکان، تروبادور نا شاعر تا ڈول ای تینا گٹار و پنہ غاتے دوٹی ارفوک پیری خلیسہ مسونٹ۔
کنا عظمت نا نیمہ داستان بیروت نا امریکی جامعہ نا ویسٹ ہال و چیپل نا منبر آ نوشت ءِ و ایلو نیمہ داستان بغداد ئٹ ہلار نا درخت آتیتون اویڑدہ ءِ، و خرطوم ئٹ ہڑتوماک نیل، نیلی و پیہن، نا دیر تیٹ نشخ ءُ۔ بیدس شک ایلو عرب شار آک ہم اریر ہرافک جشنِ شاعری ہڈ ایترہ و داڑکن دسپاگ بال نشان ایترہ، ولے بیروت، بغداد و خرطوم تو شاعری ئٹ ساہ ہلیرہ، اندا لباس ئٹ جلوہ ایترہ و اندانا سرمہ خلیرہ۔
سودان و عراق ئٹ کنا شاعری بنیفنگ دود نا معنہ آتیٹ شاعری بنیفنگ اَلو، بلکن دا باسن آ ہِس والا زمین آ آتش بازی نا گوازی اس ئس۔ اُمَّ درمان نا ربیدگی بنجا ئٹ سودانی مخلوق اندن تولوک مسرہ دنکہ چُک آک ٹول و مکان تا زی تیا بریرہ تولرہ، دا مخلوق تینا پیہن آ چادر آتیان نن ءِ رژنا کروک و اوفتا خن تیٹ تیوی جہان نا چنکی و جُوانی نا کوڑ مُچ مروک مسکہ۔
مارچ 1962 ئٹ، بغداد نا ہیل کاری کالج نا چمن ئٹ، خڑک ئس کہ مابت نا چِٹ کنے گُٹو کے اگہ کالج نا استاد آتیان اسٹ کنے رکھیسہ ماڑی نا تہٹی دتوکہ۔ بغداد ہی نا الخلد ہال ئٹ 1969 ئٹ مشاعرہ مجلس برجا ئس، عراقی سہب اسکان ہال ئٹ تولوک مسر، مخلوق تینا اُرا تیٹ ٹی وی نا مونا تولوک دننگا عشقیہ نظم آتیان چس ہلیسہ کریر ہرا تصوف نا ہد اسکان سر مسرہ۔ ای ہر وخت پاوہ کہ لبنان تون کنا تعلقداری ہلہلہی تعلقداری اس اَلو۔ ای تینا چنکی آن لبنان تون وجودی، ربیدگی و شعری مِڑ تسونٹ۔ ننا باوہ جان ننے بیروت آ ایسکہ کہ نن تینا تیرمہ نا چھٹی تے الاوزاعی نا کرک نا ریک آتیا و زحلہ ئٹ دریاے البردونی نا کرک آ گدریفنگ کین۔
چِل ئنا دہ یک نا بنا تیٹ ہراتم شاعری کنا بخت سلیس، او دے تیٹ ای لبنان نا شعلہ بیاں شعرا۔۔۔۔ دنکہ بشارت الخوری، امین نخلہ، الیاس ابی شبکہ، یوسف غصّوب، صلاح لبکی، سعید عقل و میشال طراد، نا کلاب بھاز شونق تون خواناٹہ۔ ای اوفتا کلام ئٹ اندنو جارات و تازئی اس ماراٹہ ہرانا گمان کنے مالو ہچبر متوسس۔ دا مخلوق اسہ پین بولی اسیٹ کلام کریرہ و اسہ پین جتاو سیاہی اسیٹ نوشتہ کریرہ۔ کنے گمان مسکہ کہ کنا تعلقداری تینٹ لبنان نا شعری اُرا تون مسونے۔ کنے اندن گمان مسکہ کہ دا شامی لکھ وڑ ہرافتیان مخلوق تینا درشان ءِ کیک، دا اسہ جاڑی ءُ ہرا دمشق و بیروت ءِ اسہ لمہ نا پڈ ئٹ سُر پُر کروک اِرا بندغ جوڑ کرینے، اندنو اِرا خن ہرا زیبا گڑاتے اُریرہ و اسہ ڈول ئٹ اوفتا درشان ءِ کیرہ۔
ہراتم ای شامی حروف تہجی نا ہیت ءِ کیوہ گڑا داڑان کنا مراد لغوی، وجودی، تہذیبی و نفسی گواچن مریک ہرا بحرِ روم نا دا ڈیہہ ئٹ شاعریءِ اندنو لائخی و گچینی تیان پُر کرینے ہرا نن ایلو عرب ڈیہہ تیٹ خنپنہ۔ دا اندنو گچینی ءُ ہرا فیروز نا آہنگ ءِ اُمَّ کلثوم نا آہنگ آن جتا کرینے، و ادونیس نا شاعری ءِ علی الجارم نا شاعری آن جتا کرینے۔ کنا دا کلام ئٹ ہچ ڈول نا علاقائی یا چمشانکی پالو ہلنگ اس اف بلکن دا فطری قانود ءِ ہرا تبت نا ہندی تا خن تے سویڈن نا ہندی تا خن تیان جتا کرینے و دافتا بولی ءِ اوفتا بولی آن جتا۔